ကျာ်ထဝ်၊ ဂျူလာၚ် ၁၈
အပ္ဍဲဂိတုဂျူလာၚ် ၁၅ တုဲကၠုၚ်တေံ ဒၞာဲသကုတ်ဂၠံၚ် ကွာန်ခလောန်ကေုာံ ကွာန်သပ္ပနူ ပွိုၚ်ဍုၚ်ကျာ်ထဝ် တွဵုရးမန်ဂှ် သၟတ်ပန်တၠ ဒးဒုၚ်တံၚ်ပဝ်တာသွက်ဂွံယိုက်ဝန်ပၞာန်ရဂှ် ညးဒေသတံဟီုကဵု ဌာန်ပရိုၚ် သြၚ်လောန်တိုၚ်မ်ရ။
ရဲနူကွာန်ကၟာတၟအ်ကေုာံ ကွာန်သပ္ပနူ သၟတ်အာယုက်နွံအကြာ ၂၀ သၞာံကဵု- ၃၀ တံ အဟိန်စဴကၠုၚ်နူကမၠောန်ဂှ် ဒးဒုၚ်တံၚ်ရပ်ဏာပဝ်တာ မဒှ်ရ။
ဒပ်ပၞာန်သီအဝဵုကဵု ဒပ်မၚ်ကွာန်ပံၚ်တောဲတံ ရပ်ကေတ်သၟတ်ပန်တၠ အဟိန်စဴကၠုၚ်နူကမၠောန်ဂှ်တုဲ ပတိုန်ဏာ လ္တူကွဳစက်ပြဟ်ဟ်တုဲ၊ ကွဳလိုန်ဓါတ်သှ်ေမံၚ်တံဂှ် ထောံစွံလဝ်လတူဂၠံၚ် အတိုၚ်ဂှ်ရောၚ် ညးဒေသတံဟီုရ။
သၟတ်ဒးဒုၚ်ရပ်ဏာတံဂှ် ရပ်ထိၚ်စွံလဝ် ပ္ဍဲဇြပ်သဘၚ်ဓရ် ဂတမုက် ဗဒိုပ်ဗၠာဲသၟိၚ်ၝောံဍုၚ်ကျာ်ထဝ်ဂှ်တုဲ မိမကၟိန်သ္ၚိဌာန်ညးတံ အာဗက်နုက်ပတိတ်ကဵုသြန်ကီုလေဝ် ဟိုတ်နူဒှ်မံၚ်ပရေၚ်ယိုက်ဝန်ပၞာန်တုဲ ကလေၚ်ဗလးကဵုဟွံဂွံပုဟ် သ္ဂးရ။
ပ္ဍဲကဵုဇြပ်သဘၚ်ဓရ် ဂတမုက်ဗဒိုပ်ဗၠာဲသၟိၚ်ၝောံဍုၚ်ကျာ်ထဝ်ဂှ် အပ္ဍဲဂိတုဏံ သၟတ်ဒးဒုၚ်ရပ်လဝ် သွက်ဂွံယိုက်ဝန်ပၞာန် ဟွံအောန်နူ ၁၀ တၠ နွံမံၚ်တုဲ၊ အကြာသတ္တဟဂတဏံမ္ဂး ပလံၚ်ဗ္စိုပ်ဏာသၟတ်တံဏံ ဇရေၚ်ဒၞာဲဒပ်ပကောံကောန်ပၞာန်တၟိ ဍုၚ်မတ်မလီုရောၚ် ဂွံတီရ။
အပ္ဍဲပွိုၚ်ဍုၚ်ကျာ်ထဝ် စနူဂိတုမေဏံ ဒပ်ပၞာန်ဗမာကဵုဒပ်မၚ်ကွာန်တံ ဗက်ရပ်ကေတ်မံၚ်သၟတ်အပ္ဍဲဒေသ နကဵုနဲကဲနာနာသာ်တုဲ ဖန်ဖက်ပကောံကေတ်မံၚ် ကောန်ပၞာန်တၟိတံရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ် ပကောံဂွံလဝ်ဂှ်မ္ဂး အပ္ဍဲတွဵုရးမန် ဒပ်ပၞာန်သီအဝဵု ပံက်လဝ်တန်ဗတောန် ယိုက်ဝန်ပၞာန်ညးဍုၚ်ကွာန် ဇၟာပ်ပ်ဂိတုတံ စနူလၟေၚ် ၁ စဵုကဵုလၟေၚ် ၂၆ သၟတ်အပ္ဍဲဒေသ ဟွံအောန်နူ ၅၄၀၀ တၠ ဒးဒုၚ်ရုဲစှ် ပကောံဏာလဝ် နဒဒှ်ကောန်ပၞာန်တၟိရ။
ပရိုၚ် – သြၚ်လောန်တိုၚ်မ်
Photo – CJ