မတ်မလီု၊ ဂျူလာၚ် ၂၁
ၜိုန်ရ ပရေၚ်ပါ်ပါဲတံနွံမံၚ်ကီုလေဝ် ပ္ဍဲတွဵုရးမန် သွက်အရာဂွံရုဲစှ်ပတိုန်အာ သ္ကိုပ်ပရေၚ်အုပ်ဓုပ်အရာပ်/ကွာန်တံမ္ဂး မၞိဟ်ကေၚ်ယိုက်ဂၠေၚ်လဝ်တာလျိုၚ် ပ္ဍဲလက်ထက်အလဵုအသဳ ၜါအဆက်တုဲကၠုၚ်တံဂှ်ရ ကလေၚ်ရုဲစှ်အာရောၚ် ဂၠိုက်ဂၠာဲတုဲ ဂွံတီကေတ် နူကဵုပွဳဗွိုၚ် ပရေၚ်အုပ်ဓုပ်တွဵုရးတံရ။
အပ္ဍဲတွဵုရးမန် ပွိုၚ်ဍုၚ်ဗွဲမဂၠိုၚ်တံမ္ဂး သ္ကိုပ်ပရေၚ်အုပ်ဓုပ် အရာပ်/ကွာန်တံဂှ် ဟွံကလေၚ်ရုဲစှ်ကဵု အတိုင်ဆန္ဒညးဍုၚ်ကွာန် တံတုဲ အကြာဒေသညးတံကဵုညးတံ ကၠတ်ခါန်ကၞက်ကေတ်မံၚ် သ္ၚိတ်တ်ဂှ်တုဲ ပရေၚ်ပါ်ပါဲတံ နွံမံၚ်ရောၚ်။
ဟိုတ်ဂှ်ရ နူကဵုဂကောံအလဵုအသဳ တွဵုရးမန် သွက်ဂွံကလေၚ်ရုဲစှ်အာ သ္ကိုပ်ပရေၚ်အုပ်ဓုပ်ဂးတုဲ ပ္ဍဲအရာပ်/ ကွာန်တံဂှ် ဗက်အာပံက်မံၚ် ဂကောံကောပ်ကာဲတံရောၚ်။
ဆဂး သွက်ဂွံကလေၚ်ရုဲစှ် ဒၞာဲသ္ကိုပ်ပရေၚ်အုပ်ဓုပ်တံဏံဂှ် ညးကေၚ်ယိုက်ဂၠေၚ်လဝ်တာလျိုၚ် စနူလက်ထက်အလဵုအသဳ ဥူတိၚ်သိၚ် စဵုကဵုစိုပ်လက်ထက်အလဵုအသဳ NLD တံဂှ်ရ ကလေၚ်ရုဲစှ် အာရောၚ် သ္ဂးရ။
အတိုၚ်သၞောဝ်ဥပဒေ ပရေၚ်အုပ်ဓုပ်အရာပ်/ ဂကောံကွာန် ပတိတ်ကၠုၚ်လဝ် ပ္ဍဲသၞာံ ၂၀၁၂ ချူခၞံသ္ပဒတန်လဝ် အခန် ၄ ၝောံပိုဒ် ၉ (က) ဂှ်မ္ဂး သ္ကိုပ်ပရေၚ်အုပ်ဓုပ်ဂှ် အာယုက်တာလျိုၚ် ညံၚ်ဟွံဂွံၜက်အာ ၂ ဝါရောၚ် စၟတ်သမ္တီလဝ်နွံရ။
စပ်ကဵု ပရေၚ်ဟွံကလေၚ်ရုဲစှ် သ္ကိုပ်ပရေၚ်အုပ်ဓုပ်သီုဖအိုတ်တံဂှ် ဒှ်အရာပရေၚ်ဖံက်ပကဝ် ဥပဒေတန်ကြန်မံၚ်ဒှ်တုဲ ပ္ဍဲလက်ထက်အလဵုအသဳပၞာန်တှ်ေ ဒှ်သဘဴ ဗီုဍေံတံမိက်ဂွံကၠောန်ဂှ် ကၠောန်အာရောၚ် သၟာပရေၚ်ဍုၚ်ကွာန်ဝှ်ကြံၚ်မွဲတၠ ပါ်ပါဲရ။
အတိုၚ်သၞောဝ် ဥပဒေပရေၚ်အုပ်ဓုပ်အရာပ်/ဂကောံကွာန် သၞာံ ၂၀၁၂ ဂှ်မ္ဂး သ္ကိုပ်ပရေၚ်အုပ်ဓုပ်အရာပ်/ ကွာန်တံဂှ် နူကဵုအလဵုအသဳတၟိ ဒးကလေၚ်ရုဲစှ်ပတိုန်ကဵု အတိုၚ်ဆန္ဒ ညးဍုၚ်ကွာန်တံရောၚ် ချူခၞံလဝ်နွံရ။
မွဲလပါ်ပၠန် သ္ကိုပ်ပရေၚ်အုပ်ဓုပ် ဂကောံအလဵုအသဳတွဵုရးမန် ကၠတ်ပၞုက်ရုဲစှ်ပတိုန်လဝ်သ္ၚိတ်တ်တံဂှ် စနူသတ္တဟပထမ ဂိတုဂျူလာၚ်ဏံ ကဵုမံၚ်တန်ဗတောန် သၠုၚ်ပတိုန်အစောံစရာဲ မဒှ်ရ။
ပ္ဍဲတွဵုရးမန် နွံမံၚ် ၁၀ ပွိုၚ်ဍုၚ်ဂှ် ဂကောံအရာပ်ကွာန် ၄၆၈ ဂကောံ၊ ကွာန် ၁၁၄၇ ကွာန်နွံမံၚ်ကီုလေဝ် နူကဵုဂကောံအလဵုအသဳ တွဵုရးမန်ဂှ် ၜိုတ် ၁၀၀ ဒၞာဲရ ကလေၚ်ရုဲစှ်ပတိုန်အာ သ္ကိုပ်ပရေၚ်အုပ်ဓုပ်ရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – MOI