နေပျဳဒဝ်၊ ဂျူလာၚ် ၂၂
က္ဍိုပ်သ္ကိုပ်ပရေၚ်ဍုၚ်ကွာန် ဒဝ်အံၚ်သာန်သုကျဳကေုာံ ဂကောံဇြဟတ်ပရေၚ်ဍုၚ်ကွာန်တံ ညံၚ်ဂွံပါလုပ်သဳကၠဳအာ ဗၠးဗၠးၜးၜးမာန်ဂှ် ဖန်ဗ္ဒျ်လဝ်ကဵု ပွဳပွူမွဲမာန်မှ သွက်ဂွံဖအိုတ်ကၠေံ ပဋိပက္ခဍုၚ်ဗမာဂှ် သၠုၚ်ပတိုန်အသိၚ်မာန်ရောၚ် ညာတ်တုဲ ပ္ဍဲဂိတုဂျူလာၚ် ၂၀ ဂှ် ဗော် NLD ပတိတ်ဏာ လိက်လလောၚ်တြးရ။
ပ္ဍဲအရာသောၚ်ကလးအာ ပရေၚ်အခက်အခုဲဍုၚ်ဗမာက္တဵုဒှ်ကၠုၚ် ဟိုတ်နူပရေၚ်သီအဝဵု ၂၀၂၁ တေံမ္ဂး တၚ်တုပ်စိုတ်ဘုံ အာသဳယာန် ၅ တၚ်ကီု အခန်ကဏ္ဍဒဝ်အံၚ်သာန်သုကျဳကဵု မူဗော်ညးတံဂှ် ကမ္မတဳရေၚ်တၠုၚ်ကေၚ်ကာဗဟဵု ဗော် NLD ကဵုသမ္တီ လလောၚ်တြးလဝ်ရောၚ်။
နူကဵုအာသဳယာန်မွဲ ပ္ဍဲအရာ ဂစာန်ကၠောန်သောၚ်ကလးအာမံၚ် ပရေၚ်ဍုၚ်ဗၟာဂှ် စပ်ကဵုမူဝါဒပရေၚ်လုက်စုက် အရာကၠောံက္ဍဆက်ဆောံတံမ္ဂး ပတဝ်ဏာမံၚ်က္ဍိုပ် ဇရေၚ်သောၚ်ကလးပရေၚ်ဍုၚ်ကွာန်နတဲကီုလေဝ် ပရေၚ်အုပ်ဓုပ်မံက်ဂတဝ်ကၠုၚ်လဝ် နူကဵုပေါဲရုဲမာဲအလီဂှ် ညံၚ်ဟွံဂွံစိုပ်အာအဆံၚ်ပရေၚ်သ္ပစၟတ်သမ္တီဂှ် ကိစ္စဇၞော်မံၚ်ရောၚ် NLD ကဵုလဝ်သမ္တီရ။
အပ္ဍဲဟိုတ်ပရူပရာ ပြသၞာပရေၚ်ဍုၚ်ကွာန်ဍုၚ်ဗၟာမ္ဂး ဟိုတ်နူပလီုထောံလဝ် သွဟ်ပေါဲရုဲမာဲ သၞာံ ၂၀၂၀ တုဲ ပတေဟ်ကေတ်ဇြဟတ်လွဟ်သီကေတ်လဝ်အဝဵုဂှ်ရ ပရေၚ်သောၚ်ကလးပြသၞာဗွဲကြဴတံဏံ တောဲမံက်ကၠုၚ်လဝ်တံဂှ် အခန်ဒဝ်အံၚ်သာန်သုကျဳ ဟွံပါဟွံတုဲ နွံမံၚ်ပၟိက်ရောၚ် သ္ဂးရ။
ပြသၞာပရေၚ်ဍုၚ်ကွာန်တံဂှ် နကဵုနဲကဲပရေၚ်ဍုၚ်ကွာန်တံဟေၚ် ဒးသောၚ်ကလးရောၚ် ဗော် NLD ပတှ်ေကေတ်လဝ်တုဲ၊ မူဝါဒ ပရေၚ်ဆဵုဂဗသဳကၠဳပ္ညဳပ္ညပ် ဂၠာဲသွဟ်သောၚ်ကလးတံဂှ်ဟေၚ် ဆက်ရပ်ကေမ်ဇျှာပ်လဝ်လၟိုန်ရောၚ် ဂွံဆဵုကေတ်ရဂှ် ကဵုလဝ်သမ္တီ အပ္ဍဲကဵုလိက်လလောၚ်တြးရ။
ဟိုတ်ဂှ်ရ အရာထမံက်မံၚ်ရုပ်ရဴ လၟေၚ်ကမၠောန်သွက်ဂွံဒက်ပ္တန်အာ ကၟိန်ဍုၚ်ပံၚ်ကောံဖိတ်ဒရေဝ်ဒဳမဝ်ကရေဇြဳ၊ ပရေၚ်ညဳသၟဟ်ကောန်ဂကူကေုာံ ပရေၚ်ၜိုဟ်လလမ်တံမ္ဂး ဒးဒုၚ်သ္ဇိုၚ်ကဵုညးဍုၚ်ကွာန်၊ သ္ဇိုၚ်မူဒဳမဝ်ကရေဇြဳကေုာံ ပရေၚ်ဥပဒေသၞောဝ်ဓရ် အုပ်ဓလီုတံရောၚ် သာ်ဝွံ NLD ပတှ်ေကေတ်လဝ်ရောၚ်။
တူရဴ နူကဵုကမ္မတဳရေၚ်တၠုၚ်ကေၚ်ကာဗဟဵု ဗော် NLD တံမ္ဂး ဒးသောၚ်ကလးအာ ပြသၞာပရေၚ်ဍုၚ်ကွာန်တံဂှ် နကဵုနဲကဲ ပရေၚ်ဍုၚ်ကွာန်တံဟေၚ် မူဝါဒပရေၚ်ဆဵုဂဗသဳကၠဳပ္ညဳပ္ညပ်ကေုာံ လ္တူမအရေဝ် ကၟိန်ဍုၚ်ပံၚ်ကောံဖိတ်ဒရေဝ် ဒဳမဝ်ကရေဇြဳတံဂှ်လေဝ် ပရေၚ်ပါ်ပါဲတံ နွံကၠုၚ်မံၚ်ကီုရ။
မွဲလပါ်ပၠန်ဂှ် ဟိုတ်နူဥပဒေပတိုန်စရၚ်စၟတ်သမ္တီဗော်ပရေၚ်ဍုၚ်ကွာန်တုဲ ပ္ဍဲလက်ထက်ကံၚ်သဳပၞာန်မ္ဂး နူကဵုဗော်ပရေၚ်ဍုၚ်ကွာန်ဂှ် ဗော် NLD ဒးဒုၚ်ပလီုထောံလဝ်တုဲ၊ ပြဟ်ဟ်ဏံ ဂတဵုမုက်ရုၚ်ဗဟဵုဗော် နွံမံၚ်ဍုၚ်လ္ဂုၚ်ဂှ်လေဝ် အလဵုအသဳပၞာန် ပလှ်ပ္တိတ်ဖျေံထောံလဝ်ယျ။
အပ္ဍဲအကာဲအရာဏံ ဗော် NLD မွဲ နကဵုပရေၚ်ဍုၚ်ကွာန် ဆဵုဂဗသဳကၠဳပ္ညဳပ္ညပ်ဂၠာဲသွဟ်သောၚ်ကလးအာကဵု ဒပ်ပၞာန်ဂှ် ဟွံကိတ်ညဳမံၚ်ကဵု နတဲကီုလေဝ် အပ္ဍဲဗဟဵုတင်ဆဵုဂ္ဗမွဲဒၞာဲတေံမ္ဂး ပ္ဍဲအရာသောၚ်ကလးအာပရေၚ်ဍုၚ်ဗၟာဂှ် အခန်ကဏ္ဍ ဒဝ်အံၚ်သာန်သုကျဳ ဆက်နွံအာမာန်ရောၚ် ညးအုပ်ကာ ကံၚ်သဳမဳဒဳယာပရိုၚ်ဗၟာဗၠးၜး ဥူတိုဲဇြဝ်လာတ် သ္ၚဳဂၠိပ်လဝ်ရ။
“နကဵုဗော်မွဲ NLD အာနကဵုပရေၚ် Dialogue ပရေၚ်သောၚ်ကလးပ္ညဳပ္ညပ်အာကဵု ဒပ်ပၞာန်ဟီုဂှ် ဟွံကိတ်ညဳမံၚ်ကဵု နတဲကွေံကွေံပုဟ်။ သာ်ဂှ်တုဲ ယဝ်ရသောၚ်ကလးအာ နကဵုနဲပၞာန်မ္ဂး ဂွံဇၞးမာန်ဟာဂှ် ပြသၞာနွံမံၚ်။ ဟိုတ်ဂှ်တုဲ ပြဟ်ဟ်ဏံ ဒှ်ဒၞာဲတင်ဆဵုဂဗဏံဂှ် ဟၟဲဏီပုဟ်။ ဆဂး ဒဝ်အံၚ်သာန်သုကျဳ ဂှ် နဒဒှ်ဒၞာဲတင်ဂဗဆဵုမွဲ ဆက်နွံအာမာန်။ ပါဲထောံဟွံဂွံပုဟ်။ ဗီုပြၚ် အကာဲအရာဗီုလဵုဒှ်ဒှ် လတူဒဝ်သု ဒပ်ပၞာန်ရပ်စပ်ဗီုလဵုဂှ် ဒှ်ဒၟံၚ်အကာဲအရာပၞောန်ၜတ်ကၞာတ်အာကဵု ပရေၚ်တောတက်ဆုတ်ယောၚ်ပရေၚ်ဍုၚ်ကွာန်ဗၟာတံတုဲ ပရေၚ်ဏံ ဆက်နွံအာရောၚ်ဂှ် မိက်ဂွံဟီုရအဴ” သာ်ဝွံ သ္ဂးရ။
ပ္ဍဲအရာသွက်ဂွံသောၚ်ကလးအာ ပရေၚ်ကေၚ်ကာဍုၚ်ဗၟာမ္ဂး တၚ်တုပ်စိုတ်ဘုံအာသဳယာန် ၅ တၚ်ဂှ် ဒှ်မံၚ်သ္ဇိုၚ်မူအဓိက ထပ်သ္ပလဝ်ဒတန်ဂှ်ဒုၚ်တၠုၚ်တုဲ ပေါဲဆဵုဂဗသဳကၠဳညးဆေၚ်စပ်တံသီုဖအိုတ် ညံၚ်ဂွံပါလုပ်အာဂှ် ဟွံမွဲဟွံတုဲ နွံမံၚ်ပၟိက်ကွေံကွေံရောၚ် NLD ကဵုလဝ်သမ္တီရ။
ပရေၚ်ဆက်ရပ်ထိၚ်လဝ် ကောန်ထံၚ်ပရေၚ်ဍုၚ်ကွာန်တံဂှ် သွက်ဂွံသောၚ်ကလးအာ ပရေၚ်အခက်အခုဲဍုၚ်ဗမာဏံ ဒှ်မံၚ်ပရေၚ်တာဒၞာအဓိကမွဲတုဲ ညးဆေၚ်စပ်တံသီုဖအိုတ်ပါလုပ်ဂှ်တှ်ေ ဒးဒုၚ်သ္ဇိုၚ်ကဵုပရေၚ်ဂလာန်ပတှ်ေ ညးဆေၚ်စပ်တံဖအိုတ်ရောၚ် သ္ဂးရ။
ဒဝ်အံၚ်သာန်သုကျဳကီု ဂကောံဇြဟတ်ပရေၚ်ဍုၚ်ကွာန် နွံကဵုပရေၚ်သ္ပစၞးတံကီု၊ ဂကောံဇြဟတ်ကောန်ဍုၚ်အရၚ်တံကီု ယဝ်ရဟွံဂွံပါလုပ်အာပေၚ်ၚ်မ္ဂး လၟေၚ်ကမၠောန် ပရေၚ်ဍုၚ်ကွာန်လဵုမွဲလေဝ် သွက်ဂွံဂွံဂလာန်ပတှ်ေ ဒုၚ်တဲပရေၚ်ပံၚ်တောဲ နူကဵုညးဍုၚ်ကွာန်တံပေၚ်ၚ်ဂှ် ဝါတ်ဂါတ်မာန်ရောၚ် ဗော် NLD ပတှ်ေကေတ်လဝ်ရောၚ်။
စနူအခိၚ်သီအဝဵု ၂၀၂၁ စဵုကဵုအခိၚ်လၟုဟ်ဏံ ဒဝ်အံၚ်သာန်သုကျဳ ဒးဒုၚ်ရပ်ထိၚ်လဝ်ဂှ် ညံၚ်ဂွံကလေၚ်ဗလးကဵု ကေုာံ ညံၚ်ဂွံထ္ၜးကဵု သက်သဳ ဒဒှ်ရ ညးဂျိုၚ်တဴမံၚ်ဏီဂှ် ဂကောံဇြဟတ်ဒဳမဝ်ကရေဇြဳ တံကဵု ပွဳဗွိုၚ်ဂၠးကဝ်တံ အာတ်မိက်ကၠုၚ်မံၚ် အဆက်က်နွံရ။
နူကဵုအာသဳယာန်မွဲအဆံၚ် နကဵုပရေၚ်ဍုၚ်ကွာန် ညံၚ်ဂွံကလေၚ်ပါလုပ်အာ ပ္ဍဲဒၞာဲ UN မာန်ဂှ် နွံပၟိက်မံၚ်ကွေံကွေံ ကီုလေဝ်၊ ကိစ္စသွက်ဂွံကလေၚ်ဗလးကဵု ဒဝ်အံၚ်သာန်သုကျဳကီု၊ ကိစ္စသွက်ဂွံကဵုအခေါၚ်ဆဵုဂဗ ကုညးစၞးတၟေၚ်အာသဳယာန်တံဂှ် စဵုကဵုလၟုဟ် နူကဵုအလဵုအသဳပၞာန်ပတေၚ်လဝ်တုဲ ဆက်တးပါဲလဝ်ဖိုဟ်ဏီ ဒှ်မံၚ်အကာဲအရာဏံရ။
နကဵုအလဵုအသဳပၞာန်ဂှ် ဒဝ်အံၚ်သာန်သုကျဳ ဂျိုၚ်မံၚ်ဏီဟာ ဟွံမွဲဟာဂှ် ဟွံဂံၚ်ထ္ၜးတုဲ၊ ပြဟ်ဟ်ဏံ အတိုၚ်ပရေၚ်ဍုၚ်ကွာန် အလဵုအသဳကြုက် ဗဂေတ်ဝေၚ်အာမံၚ် ကဵုမံၚ်ဇြဟတ်ဟရိုဟ်တံဂှ် ကၠောန်အာမံၚ်ရောၚ် ညးလ္ၚတ်သ္ၚဳဂၠိပ် ပရေၚ်ဍုၚ်ကွာန် မွဲတၠ ဟီုဂးကဵုလဝ် လညာတ်ညး အတိုၚ်ဏံရ။
“သွက်ဂွံကဵုအခေါၚ်ဆဵုဂဗကဵု ဒဝ်အံၚ်သာန်သုကျဳ ဂှ် ကုညးလဵုမွဲလေဝ် မေန်အံၚ်လှိုၚ် ဟွံကဵုဆဵုပုဟ်။ တုဲပၠန် လမျီု ဒဝ်အံၚ်သာန်သုကျဳ နွံမံၚ်ဂျိုၚ်ၚ်ဂှ်လေဝ် ဟွံဂံၚ်ထမံက်ပတိတ်ထ္ၜးပုဟ်။ တၚ်မွဲ အကာဲအရာစွံလဝ်ဒဝ်သုဂှ် ပရိုၚ်မံက်အာမ္ၚး ညးဖေက်မံၚ်ရောၚ်၊ တၚ်ၜါ ဒဝ်အံၚ်သာန်သုကျဳ ဂျိုၚ်မံၚ်ဟာ ဟွံမွဲဟာဂှ် ဟွံဂံၚ်ထ္ၜး၊ တၚ်ပိဂှ် ပြဟ်ဟ်ဏံ ဇြဟတ်ဟရိုဟ်တံ ဂၠိုၚ်ကၠုၚ်တုဲ ဝေၚ်ပရေၚ်ဍုၚ်ကွာန်မွဲမွဲမ္ဂး တန်တဴမံၚ်လတူကြုက်တုဲ အတိုၚ်ကြုက်ဖန်ဂှ် ဝေၚ်အာရောၚ် အဲဆဵုကေတ်ရ” သာ်ဝွံ သ္ဂးရ။
တၠုၚ်လအာ ဍုၚ်ဗမာပြဟ်ဟ်ဏံမ္ဂး နူကဵုဒပ်ပၞာန်သီအဝဵု ပြံၚ်လဝ်ဗီုပြၚ် အလဵုအသဳညးဍုၚ်ကွာန်ကေုာံ ၜိုန်ရစၠတ်ထဝ်တံ မံက်ကၠုၚ်ကီုလေဝ် ပေါဲဗတိုက်ထပိုတ်ရိုဟ်ကၞက် သၞောတ်တၠအဝဵုပၞာန်ညံၚ်ဂွံအးဂှ် သွက်ဂွံဒေါအ်ဇူအာ ဟၟဲဏီပုဟ်။
တုဲပၠန် နကဵုအလဵုအသဳဒုၚ်ရုဲစှ် နဲကဲဒဳမဝ်ကရေဇြဳရောၚ် ၜိုန်ရအလဵုအသဳပၞာန် ကညာၚ်ကမြေဲဟီုမံၚ်ကီုလေဝ် ပရေၚ်စၟတ်ပိုၚ်ခြာကီု၊ ပရေၚ်ဖံက်ပကဝ်အခေါၚ်အရာမၞိဟ်ကေုာံ ပတဝ်က္ဍိုပ်လတူညးဍုၚ်ကွာန်တံတုဲ ပန်ဗတိုက်မံၚ်ကဵုပၞာန်ကျာတံဂှ်လေဝ် အကာဲအရာဆက်ပရေံအာမံၚ်ဏီရောၚ်။
စပ်ကဵုသောၚ်ကလးအာ ပရေၚ်အခက်အခုဲဍုၚ်ဗမာဂှ် သွက်ပေါဲဆဵုဂဗသဳကၠဳညးဆေၚ်စပ်သီုဖအိုတ်တံ ညံၚ်ဂွံပါလုပ်ကီု၊ ပရေၚ်ညဳသၟဟ်ကောန်ဂကူကေုာံ လၟေၚ်ကမၠောန်ပရေၚ်ၜိုဟ်လလမ် တံဂှ် ပါဲပတိတ်လဝ် အခန်ကဏ္ဍ ဒဝ်အံၚ်သာန်သုကျဳ ဟွံဂွံပုဟ်ဂှ် ညးလ္ၚတ်တံထံက်ထ္ၜးမံၚ်အိုတ်ရ။
အဟိန်ကၠောန်ဗဒှ်အာမံၚ် ကောံဓရီုဝန်ဇၞော်ပရေၚ်ဍုၚ်သအာၚ် အာသဳယာန်တံဂှ် ဒဒှ်ရ ဒဝ်အံၚ်သာန်သုကျဳ ဂျိုၚ်မံၚ်ဏီဂှ် ညံၚ်ဂွံထ္ၜးကဵုသက်သဳသွက်ဂွံကဵုအာ ဇြဟတ်ဟရိုဟ်ကုအလဵုအသဳပၞာန်ဂှ် နူကဵုဂကောံအမာတ်စၠတ်ထဝ်အာသဳယာန် ဆေၚ်စပ်ကဵုအခေါၚ်အရာမၞိဟ် APHR တံ နကဵုလိက်ပံက်ထာၚ် ဗတိုက်ဖအောဝ်လဝ် ဥက္ကဌအာသဳယာန်ကေုာံ သမ္မတတဳမဝ်တံရ။
ပရိုၚ် – သြၚ်လောန်တိုၚ်မ်
Photo – Social Media