ၜဳကလေၚ်၊ ဂျူလာၚ် ၂၃
အပ္ဍဲတွဵုရးမန် ပွိုၚ်ဍုၚ်ၜဳကလေၚ် အခိၚ်ဒပ်ပၞာန်ဗမာလုပ်ပန်သီကေတ်လဝ် ဗ္ဒိုပ်ကူသာန်ဗၞိက် ကွာန်တိတ်တူကုၚ်ဂှ် ရပ်ဏာညးဍုၚ်ကွာန် ၂ တၠတုဲ ၜုၚ်တက်လဝ်တံဂှ်ကၠေံမံၚ်ရောၚ် ညးဒၟံၚ်ကြပ်ကဵု ကၟိန်သ္ၚိဌာန်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန်ဒပ်ပၞာန်ဗၟာ ဇြဟတ် ၁၀၀ ပြၚ်တံ ပ္ဍဲဂိတုဂျူလာၚ် ၅- ၆ တုဲကၠုၚ်တေံ လုပ်ပန်ဗတိုက်သီကေတ်လဝ် ဗဒိုပ်ကူသာန်ဗၞိက် ကွာန်တိတ်တူကုၚ်ဂှ်တုဲ ပေါဲဗတိုက်အကြာၜါလပါ် ဒှ်လဝ်ကဵုဒပ်ပံၚ်တောဲ KNLA တံရောၚ်။
အပ္ဍဲပေါဲဗတိုက်ဏံ ဒပ်ပၞာန်သီအဝဵု ဒးအာလဝ်ဘဲဂိလောန်တုဲ စံၚ်ပလီုထောံသ္ၚိဌာန်ညးဒေသ ၁၂ မကီု သီုကဵုရပ်ဏာ ခေါန်ထက်ဥူ ကောန်ကွာန်တိတ်တူကုၚ်ကဵု ညးလိၚ်ဒဳစကွဳစက် ၁ တၠတံတုဲ ၜုၚ်တက်ကၠေၚ်ဏာပျဲပျာံလဝ်ရောၚ်။
ဒပ်ပၞာန်ၜုၚ်တက်ပျဲပျာံရပ်ကၠေၚ်ဏာလဝ် ကောန်ကွာန် ၂ တၠဏံ စဵုကဵုဂိတုဂျူလာၚ် ၂၂ ဂှ်လေဝ် ဟွံကလေၚ်ဗၠးတိတ်ကၠုၚ်ဏီတုဲ ပရိုၚ်လေဝ်ကၠေံမံၚ်ဂှ်တှ်ေ ရဲကၟိန်သ္ၚိဌာန်ညးတံ ဒှ်မံၚ်ဒွိၚ်ကဵု သွက်ဘဲအန္တရာဲလမျီုညးတံရောၚ် သ္ဂးရ။
အပ္ဍဲကဵုပေါဲဗတိုက်ၜါလပါ် က္တဵုဒှ်လဝ် ပ္ဍဲကွာန်တိတ်တူကုၚ်ဂှ် လပါ်ဒပ်ပၞာန်သီအဝဵု ညးတာလျိုၚ်ပၞာန် ၁ တၠ၊ အပံၚ် ၅ တၠတံ ချိုတ်အာတုဲ ၉ တၠတံဂှ် ဒးဝပ်လဝ်ရောၚ် အတိုၚ်လိက်ပတိတ်လလောၚ်တြး ခရိုၚ်သဓီု KNU ပတိတ်လဝ်ဂှ် ဂွံတီရ။
အပ္ဍဲပေါဲဗတိုက်ဏံ ဒပ်ပၞာန်သီအဝဵု ရပ်သီကေတ်ဏာကွဳစက်ဖ္ဍိုက် ကပေါတ်ဟွံလုပ်သၞောဝ် ၃၀ မ ပြၚ်နွံတုဲ တၠကွဳစက်ကဵု ညးပလံၚ်ကပေါတ်တံဂှ် ကေတ်အာအရေဝ်ရောၚ်ဂှ်လေဝ် ပတိတ်လဝ်လိက်လလောၚ်တြးနွံရ။
ပရိုၚ် – သြၚ်လောန်တိုၚ်မ်
Photo – CJ