မတ်မလီု၊ ဂျူလာၚ် ၂၃
အပ္ဍဲတွဵုရးမန် ဒပ်ဗၠာဲသၟိၚ် အလဵုအသဳဒပ်ပၞာန်တံ ဗက်ဂၠာဲရပ်မံၚ် ရဲသွံချေဝ် ၜါမ၊ ပိမတံရောၚ် ညးဒေသတံ ဟီုကဵု ဌာန်ပရိုၚ် သြၚ်လောန်တိုၚ်မ်ရ။
ဒပ်ဗၠာဲသၟိၚ် အလဵုအသဳဒပ်ပၞာန် စနူသတ္တဟပထမ ဂိတုဂျူလာၚ်ဏံတုဲဂှ် ဗက်ဂၠာဲရပ်မံၚ် ရဲသွံကဝ်မယှေန် ချေဝ်ၜါမ၊ ပိမတံ စဵုကဵုစိုပ်ဒၞာဲသ္ၚိဌာန်တံတုဲ ပံက်အမှုကေတ်မံၚ်အရေဝ်ရောၚ်။
ပ္ဍဲဂိတုဂျူလာၚ် ၂၀ တုဲကၠုၚ်တေံဂှ်လေဝ် ပ္ဍဲကွာန်ဝေၚ်ပ ပွိုၚ်ဍုၚ်သဓီုဂှ် ရပ်ဂွံရဲသွံချေဝ် ၁ တၠတုဲ ပံက်လဝ်အမှု ကေတ်အရေဝ် ပ္ဍဲကဵုဗ္ဒိုပ်ဗၠာဲသၟိၚ် တိဍာ်ဒေသ တိၚ်သုက်ဂှ်ရောၚ် ပ္ဍဲလိက်ပရိုၚ်တြးဝါဒအလဵုအသဳဒပ်ပၞာန်တံ ချူထမံက်လဝ်ရ။
တုပ်သာ်ဂှ်ကီု ပ္ဍဲပွိုၚ်ဍုၚ်လေဝ်မျက်နှာ ရးဧရာဝတဳ ကေုာံ ပွိုၚ်ဍုၚ် တေန်ဂါန်ကျေန် ရးလ္ဂုၚ်တံဂှ်လေဝ် ရပ်ဂွံရဲသွံချေဝ် ၜါမ၊ ပိမ ညး ၂ တၠ တုဲ သီုကဵုသြန်ရာန်လဝ်ချေဝ်တံကဵု ကပေါတ်ဆက်စပ်တံကီု သီကေတ်ဏာလဝ်ရောၚ် လလောၚ်တြးလဝ်ရ။
ပရေၚ်ဗက်ရပ်မံၚ် ရဲသွံချေဝ်တံသာ်ဏံဂှ် ဟိုတ်နူ သမ္မတဥူမေန်အံၚ်လှိုၚ် ကဵုလဝ်စၞောန်ပ္ညုၚ် သွက်ဂွံဗတိုက်ပလီု ပရေၚ်ဝေၚ်ဇျှၚ်အန်လာၚ်တံတုဲ ဒးစှ်ေအာဗတိုက်သရိုဟ် အကြာဗလးတိဍာ်တံရောၚ် သ္ဂးရ။
အတိုၚ် ဌာန်ပရိုၚ်သြၚ်လောန်တိုၚ်မ် ဂွံလဝ်ပရိုၚ်နူကဵုရိုဟ်ကၞက်ပရိုၚ် ဒပ်ဗၠာဲသၟိၚ်ဟီုလဝ်ဂှ်မ္ဂး အပ္ဍဲတွဵုရးမန် အကြာဂိတုဏံ ရဲသွံချေဝ်ၜါမ၊ ပိမတံ ဒးဒုၚ်ရပ်လဝ် လၟိဟ်စှ်ပြၚ်နွံတုဲ သီုဖအိုတ်တံဂှ် ပံက်လဝ်အမှု နကဵုဥပဒေ ပရေၚ်ဝေၚ်ဇျှၚ်လံၚ်သြန်တံရ။
အပ္ဍဲတွဵုရးမန် ၜိုန်ရဗက်ရပ်မံၚ် ရဲသွံချေဝ်တံဇၞော်ကဵုဇြဟတ်ကီုလေဝ်၊ ဝိုၚ်ဝေၚ်အပ္ဍဲဒေသတံဂှ် ဆက်ကဵုအခေါၚ်ပံက်လဝ် ဒၞာဲရုၚ်ဗြဲကျာလုၚ်ၚ်တံနွံမံၚ်ရဂှ် ဂွံတီရ။
ပရိုၚ် – သြၚ်လောန်တိုၚ်မ်
Photo – MOI