မတ်မလီု၊ ဂျူလာၚ် ၂၃
အပ္ဍဲဍုၚ်ဗၟာ ကာလသီအဝဵု ၅ သၞာံပြၚ်ဏံ ပ္ဍဲကဵုဇၟာပ်ပ်ထံၚ်တံမ္ဂး ဟိုတ်နူဟွံဂွံအခေါၚ်ဝဳယဲ ရုံရုံဂပ်ဂပ်တုဲ ကောန်ထံၚ်သၟာ ပရေၚ်ဍုၚ်ကွာန် ၁၄၈ တၠ ဒးချိုတ်အာလဝ်နွံမံၚ်ရောၚ် နူကဵုဇာဖိုၚ်ကောန်ထံၚ်ပရေၚ်ဍုၚ်ကွာန် အလုံမွဲဍုၚ်ဗၟာ PPNM ပတိတ်လဝ် လိက်လလောၚ်တြးရ။
စနူဖေဖဝ်ဝါရဳ ၁ သၞာံ ၂၀၂၁ စနူသီလဝ်အဝဵု ဟၟဲကဵုပရေၚ်ဓဝ်ဍာံတေံ စဵုကဵုစိုပ်ဂိတုမေ သၞာံ ၂၀၂၆ ဏံဂှ် ပ္ဍဲကဵုထံၚ် ၃၂ မ အလုံမွဲဍုၚ်တံဂှ် ဟိုတ်နူဟွံဂွံအခေါၚ်ဝဳယဲရုံရုံဂပ်ဂပ်တုဲ အခိၚ်ဒးဒုၚ်ရပ်ထိၚ်လဝ်တံဂှ် ကောန်ထံၚ်သၟာပရေၚ်ဍုၚ်ကွာန်တံဏံ ဒးချိုတ်အာလဝ်ရောၚ်။
အတိုၚ်တၚ်နၚ် PPNM မ္ဂး အပ္ဍဲညးချိုတ်အာ ၁၄၈ တၠတံဂှ် ကောန်ထံၚ်သၟာပရေၚ်ဍုၚ်ကွာန် ညးတြုံ ချိုတ်လဝ်ဂၠိုၚ်အိုတ်ဒှ်တုဲ ညးနွံအာယုက်အကြာ ၃၆ သၞာံ ကဵု ၅၅ သၞာံတံ ချိုတ်ဂၠိုၚ်အိုတ်ကီု သီုကောန်ၚာ် သၟတ်သၟဝ်အာယုက် ၁၇ သၞာံ ၂ တၠ ကေုာံ ကောန်ထံၚ်သၟာပရေၚ်ဍုၚ်ကွာန် အာယုက် ၇၀ ပြၚ်တံလေဝ် ပါလုပ်မံၚ်ကီုရောၚ် သ္ဂးရ။
နူသၞာံ ၂၀၂၃ တုဲကၠုၚ်တေံ ဟိုတ်နူဟွံဂွံအခေါၚ်ဝဳယဲရုံရုံဂပ်ဂပ်ဂှ်ရ ဒှ်သၞာံ ကောန်ထံၚ်သၟာပရေၚ်ဍုၚ်ကွာန်တံ ချိုတ်အာဂၠိုၚ်အိုတ် မွဲသၞာံတုဲ ပ္ဍဲထံၚ်အၚ်စိၚ်ဂှ်ချိုတ်အာလဝ်ဂၠိုၚ်အိုတ်ရောၚ် သ္ဂးရ။
အပ္ဍဲထံၚ်တံမ္ဂး ပရေၚ်မၚ်မွဲထတ်ယုက်ဂှ် နွံမံၚ်အဆံၚ်ကဵုလဝ်ဖျုန် ဒုတိယတုဲ ဟိုတ်နူစၟတ်ပိုၚ်ခြာကၟာတ်လဝ် အခေါၚ်ဝဳယဲဗွဲမဂတာပ်အခိၚ်တံတုဲ ကောန်ထံၚ်သၟာပရေၚ်ဍုၚ်ကွာန်တံဂှ် ပ္ဍဲအခိၚ်အကာဲအရာ စဵုဒၞာဂွံဝဳမံၚ်ယဲတံဂှ်ဟေၚ် ဒးချိုတ်အာလဝ်ရောၚ် PPNM သ္ဂးလဝ်ရ။
ယဝ်ကလေၚ်ရံၚ်အာ မၞိဟ်ယဲဒးချိုတ်လဝ်တံဂှ်မ္ဂး ဒှ်လဝ်နကဵုယဲကောန်တၟံ၊ ယဲဂြိုဟ်လီု၊ ယဲဆီၜေတ်၊ ယဲခယျာဍာတ်၊ ယဲကေန်သာကေုာံ ယဲဍာ်ဇမၠိၚ်တံတုဲ ဒးချိုတ်အာလဝ်ဂှ် ၆၄ တၠ ဂၠိုၚ်အိုတ်ဒှ်အာကီု၊ ညးချိုတ်အာတၞဟ်ဟ်တံဂှ်ပၠန် ဟိုတ်နူအံက်သဳဂျေန်အိုတ်၊ ယဲကဝ်ဗေတ် ၁၉၊ ယဲဒှ်ဂျိဆီတိုန် ကေုာံ ယဲတဳဗဳခဍက်တံဂှ်ဒးချိုတ်လဝ် မဒှ်ရ။
မွဲလပါ်ပၠန် ကောန်ထံၚ်သၟာပရေၚ်ဍုၚ်ကွာန်တံဂှ် ကဵုလဝ်အခေါၚ်ဝဳယဲရုံရုံဂပ်ဂပ်ရောၚ် ဂကောံပၞာန်သီအဝဵုတံ လီဠာန်ဟီုလဴမံၚ်ကဵု ဂကောံဂၠးကဝ်တံကီုလေဝ်၊ ဗီုပြၚ်ချိုတ်လဝ်တံမ္ဂး တၞဟ်ခြာမံၚ်ကဵုဒပ်ပၞာန်တံ လလောၚ်တြးလဝ်ဂှ်ရောၚ် သ္ဂးရ။
ဟိုတ်ဂှ်တုဲ ၜိုန်ရ စဵုဒၞာဝဳအာမံၚ် ယဲကောန်ထံၚ်သၟာပရေၚ်ဍုၚ်ကွာန်တံကီုလေဝ်၊ ဟိုတ်နူကၟာတ်ဗဒေါအ်လဝ် အခေါၚ်ဝဳယဲ ဗွဲမဂတာပ်အခိၚ်တံတုဲ ပရေၚ်ဒးချိုတ်အာလဝ်ဟၟဲကဵုဓရ်မနုဿမၞိဟ်တံဂှ် က္ဍိုပ်သ္ကိုပ်ပၞာန် မေန်အံၚ်လှိုၚ်ကီု သီုကဵုရဲထံက်ပၚ်လဝ်တၠအဝဵုတံ မွဲတ္ၚဲမ္ဂးဒးကေတ်တာလျိုၚ်ရောၚ် နူကဵု PPNM လလောၚ်တြးလဝ်ရောၚ်။
ပရိုၚ် – သြၚ်လောန်တိုၚ်မ်
Photo – CJ