နေပျဳဒဝ်၊ ဂျူလာၚ် ၂၃
သွက်ဂွံထမံက်ရုပ်ရဴ လၟေၚ်ကမၠောန်ပရေၚ်ၜိုဟ်လလမ် ဒုၚ်သ္ဇိုၚ်ကဵု လိက်ကသုက်တုပ်စိုပ်ပရေၚ်ဒေါအ်ပန်ပှော် အလုံမွဲဍုၚ် NCA ဂှ် ကမ္မတဳပ္ညဳပ္ညပ်ထမံက်ရုပ်ရဴညဳသၟဟ်ဂကူ ပရေၚ်ၜိုဟ်လလမ် NSPNC အလဵုအသဳပၞာန်ကေုာံ ဂကောံထပက်စၟတ်တဲဒေါအ်ပန်ပှော် ၇ ဂကောံတံ ဆဵုဂဗသဳကၠဳလဝ်ညးသ္ကံရ။
အပ္ဍဲဂိတုဂျူလာၚ် စၟတ်တ္ရဲ ၂၀-၂၁ တေံ ပေါဲသဳကၠဳကလေၚ်သ္ၚဳဂၠိပ် ဆေၚ်စပ်ကဵုလၟေၚ်ကမၠောန်ပရေၚ်ၜိုဟ်လလမ် ကၠောန်ဗဒှ်လဝ် အပ္ဍဲဟဝ်တေဝ် M Gallery နေပျဳဒဝ်ဂှ် က္ဍိုပ်သ္ကိုပ်ကေုာံ ညးစၞး နူဂကောံသီုၜါလပါ်တံ တိုန်စိုပ်သဳကၠဳလဝ်ညးသ္ကံရောၚ် အပ္ဍဲကဵုလိက်ပရိုၚ်တြးဝါဒကၟိန်ဍုၚ်တံ ထမံက်ထ္ၜးချူလဝ်ရ။
သွက်ပရေၚ်ၜိုဟ်လလမ်အပ္ဍဲဍုၚ် ဂွံခိုၚ်ကၠိုက်ဗိုန်ဗတ်အာ ရန်တၟအ်ကဵုပရေၚ်ဒက်ပ္တန်ကၟိန်ဍုၚ်ပံၚ်ကောံ ဒုၚ်သ္ဇိုၚ်ကဵုပရေၚ်ဒဳမဝ်ကရေဇြဳ သၞောတ်ဖိတ်ဒရေဝ်တုဲ ပရေၚ်ဆဵုဂဗသဳကၠဳကုဂကောံရပ်လွဟ် ကောန်ဍုၚ်အရၚ်တံဂှ် နူကဵုအလဵုအသဳပၞာန် သၠုၚ်ပတိုန်အာအသိၚ်ရောၚ် သ္ဂးလဝ်ရ။
လတူပရေၚ်ဏံ သွက်ဂွံဖျေံအာလၟေၚ်ကမၠောန် ပရေၚ်ၜိုဟ်လလမ် ညံၚ်ပဵုတုဲဂွံစိုပ်တရဴမာန်ကီု လတူပရေၚ်သွဟ်ပေါဲသဳကၠဳ ဂွံလဝ်တုဲတုဲတံဂှ် သွက်ဂွံဂၠာဲအာနဲကဲထမံက်ရုပ်ရဴနတဲမာန် ရန်တၟအ်တုဲ ကၠောန်ဗဒှ်လဝ် ပေါဲသဳကၠဳကလေၚ်သ္ၚဳဂၠိပ် ဆေၚ်စပ်ကဵုလၟေၚ်ကမၠောန်ပရေၚ်ၜိုဟ်လလမ်ဂှ်ရောၚ်။
အပ္ဍဲတၚ်ပ္ညဳပ္ညပ်သီကၠီဂွံလဝ် ပွိုၚ်ၜါတ္ၚဲဂှ်မ္ဂး သွက်ဂွံထမံက်ရုပ်ရဴပရေၚ်ၜိုဟ်လလမ် ဒုၚ်သ္ဇိုၚ်ကဵု NCA၊ လတူပြသၞာပရေၚ်ဍုၚ်ကွာန်ဂှ် ညံၚ်ဂွံသောၚ်ကလးအာနဲကဲပရေၚ်ဍုၚ်ကွာန် ၊ ပေါဲသဳကၠဳ ပရေၚ်ဍုၚ်ကွာန် ညးဆေၚ်စပ်တံသီုဖအိုတ်ပါလုပ်ညံၚ်ဂွံဒှ်ကၠုၚ်ဂှ် အကြာဂကောံညးစၞးပ္ညဳပ္ညပ်တံ ဆဵုဂဗသဳကၠဳလဝ် မဒှ်ရ။
တုဲပၠန် ပ္ဍဲကဵုဒေသသ္ဇိုၚ်ဒၞာဲ EAO တံဂှ် သွက်ဂွံရေၚ်တၠုၚ်ဖန်ဖက်အာ ကမၠောန်ပရေၚ်ညိၚ်ဝပ် ဇၞော်မောဝ်ဖောအ်ဗြဳတံကီု ကဵုအာအရီုဗၚ်ပရေၚ်ဓရ်ဗ္စာရဏာမၞိဟ်တံတုဲ သွက်ပရေၚ်ဇၞော်မောဝ်ဒေသကေုာံ လၟေၚ်ကမၠောန်ပရေၚ်ၜိုဟ်လလမ်တံဂှ်လေဝ် ဆက်စပ်တုဲသွက်ဂွံထမံက်အာရုပ်ရဴတံလေဝ် ပါလုပ်မံၚ်ရ။
စိုပ်အခိၚ်ကၠောန်ဗဒှ် ပေါဲသဳကၠဳသ္ဇိုၚ်မှာဇန် ဖဝ်ရာမ် (Forum) ရး၊ တွဵုရးတံမ္ဂး ဂကောံ EAOs ထ္ပက်လဝ် NCA တံ ညံၚ်ဂွံပံၚ်တောဲရေၚ်တၠုၚ်အာကီု၊ ပရေၚ်ကေတ်အရီုဗၚ်နဲကဲပညာ နူအပ္ဍဲဍုၚ်/မ္ၚးဍုၚ်တံ၊ ပရေၚ်ဆဵုဂဗဗွဲပလးတံ ပရေၚ်ဆဵုဂဗ Bilateral တံ သွက်ဂွံဆက်ကၠောန်အာဂှ် သဳကၠဳလဝ်ညးသ္ကံရ။
ဂကောံမဟာမိတ် ဒေါအ်ပန်ပှော် ၇ ဂကောံတံ ပကောံဂွံလဝ်တင်လစွံစိုတ်တံဂှ်တုဲ ပတိုန်ထ္ၜးသဳကၠဳ ကေတ်အာတၚ်စၞောန်ပ္ညုၚ် အတိုၚ်ပၠတရဴဂကောံညးတံတုဲ သွက်လၟေၚ်ကမၠောန်ပရေၚ်ၜိုဟ်လလမ်ဌာန်ဂတတေံ အစဳဇန်ဒးကၠောန်တံဂှ်ဆက်ကၠောန်အာရောၚ် သ္ကိုပ်ဂကောံပ္ညဳပ္ညပ်သဳကၠဳ သ္ကိုပ်ပၞာန်ဇၞော် သာၚ်ၚေန် ဟီုလဝ်ရ။
မွဲလပါ်ပၠန် သွက်ဂွံကလေၚ်ထမံက်ရုပ်ရဴ လၟေၚ်ကမၠောန်ပရေၚ်ၜိုဟ်လလမ်မာန်ဂှ် နူကဵုဂကောံထပက်စၟတ်တဲဒေါအ်ပန်ပှော် ၇ ဂကောံတံ ဗီုပြၚ်တၠုၚ်လအာထမံက်မံၚ်ရုပ်ရဴတံဂှ်ကီု ဗီုပြၚ်ဂကောံ EAO တၞဟ်ဟ်တံ မွဲမွဲဂကောံဗီုတၞဟ်ခြာထမံက်အာမံၚ်ရုပ်ရဴတံကီု အကြာတံဏံဂှ် ညံၚ်ဂွံဒှ် သဟဇာတမာန်ဂှ်လေဝ် ဂစာန်ပ္ညဳပ္ညပ်ထိၚ်အာမံၚ်ရောၚ် ကဵုလဝ်သမ္တီရ။
နူကဵု သွဟ်ပေါဲသဳကၠဳ ပွိုၚ်ၜါတ္ၚဲဏံဂှ် သွက်ဂွံဆက်ထမံက်အာရုပ်ရဴ လၟေၚ်ကမၠောန်ပရေၚ်ၜိုဟ်လလမ် ဒုၚ်သ္ဇိုၚ်ကဵုကြက်ရှ်သာ NCA နွံနွံ၊ ပရေၚ်ဒက်ပ္တန် ဂလာန်ပတှ်ေတံ၊ ပရေၚ်ဆဵုဂဗသဳကၠဳ အဆက်ညံၚ်ဟွံပိုတ်အာကီု လၟေၚ်ကမၠောန်အဓါန်ဂတသွက်ဂွံဆက်ဖန်ဖက်ရေၚ်တၠုၚ်ကၠောန်အာတံဂှ် ညးအုပ်ကာ NSPNC ဒုသ္ကိုပ်ပၞာန်ဇၞော် မေန်နိုၚ် သောင်ကလးကဵုလဝ်ရ။
တုဲပၠန် ဂကောံရပ်လွဟ်ကောန်ဍုၚ်အရၚ် ဟွံထ္ပက် NCA ဏီတံကီု ကေုာံ ဂကောံထ္ပက် NCA တုဲတုဲတံ ဟိုတ်နူပရေၚ်နာနာသာ်ဂှ်ရ သ္ၚောဲဒၟံၚ်ကဵုဂၠံၚ်တရဴ NCA တံဂှ် ညံၚ်ဂွံပါလုပ်ကၠုၚ်မာန်ဂှ်လေဝ် ညးတံ သဳကၠဳလဝ်ကီုရ။
အပ္ဍဲဂကောံရပ်လွဟ်ကောန်ဍုၚ်အရၚ် ထ္ပက်လဝ် NCA တံမ္ဂး KNU, CNF, ABSDF တံဂှ် ကရဴလဝ်စးကဵု NCA တုဲ ပါလုပ်မံၚ် ပ္ဍဲကဵုပၠန်ဂတးတမ်ကညၚ် ထပိုတ်ရိုဟ်ကၞက်သၞောတ်တၠအဝဵုပၞာန် ညံၚ်ဂွံအိုတ်အးတံ စဵုကဵုတ္ၚဲဏံဏီရောၚ်။
တုဲပၠန် KNU, CNF တံဂှ် ပါလုပ်မံၚ် ပ္ဍဲကဵုကံၚ်သဳပၠတရဴဖိတ်ဒရေဝ် SCEF မွဲကရောံကဵု အလဵုအသဳညဳသၟဟ်ကောန်ဂကူ NUG၊ ကမ္မတဳသ္ပစၞးစၠတ်ထဝ်ကၟိန်ဍုၚ် CRPH ကေုာံ မဟာမိတ် ကောန်ဍုၚ်အရၚ်တၞဟ်တံရောၚ်။
ပ္ဍဲအကာဲအရာဏံ အပ္ဍဲအစဳဇန်ပရေၚ်ၜိုဟ်လလမ်ပွိုၚ် ၁၀၀ တ္ၚဲ အလဵုအသဳပၞာန်တံ ၜိုန်ရဂစာန်မံၚ် သွက်ဂွံထမံက်အာရုပ်ရဴ လၟေၚ်ကမၠောန်ပရေၚ်ၜိုဟ်လလမ် ဒုၚ်သ္ဇိုၚ်ကဵု NCA ကီုလေဝ်၊ စဵုကဵုအခိၚ်လၟုဟ်ဏံမ္ဂး ဆၜိုတ်ကဵု ဂကောံရပ်လွဟ်ကောန်ဍုၚ်အရၚ် ဟွံကေၚ်ဒှ်လဝ်ပေါဲဗတိုက်ကဵုဒပ်ပၞာန်တံဂှ်ဟေၚ် ဆဵုဂဗသဳကၠဳမာန် လဝ်ဏီ မဒှ်ရ။
ပရိုၚ် – သြၚ်လောန်တိုၚ်မ်
Photo – MOI