တံၚ်ဥူ၊ ဂျူလာၚ် ၂၄
အပ္ဍဲရးဗဂေါ ပွိုၚ်ဍုၚ်တံၚ်ဥူ ကောန်ထံၚ်နူကဵုထံၚ်တံၚ်ဥူ ၜိုတ် ၅၀၀ တၠ သီုကဵုကောန်ထံၚ် သၟာပရေၚ်ဍုၚ်ကွာန်တံဂှ် ပဆုဲပြံၚ်ပလံၚ်ဏာလဝ်ထံၚ်သာယာဝတဳရဂှ် နူကဵုဇာဖိုၚ်ကောန်ထံၚ် ပရေၚ်ဍုၚ်ကွာန်အလုံမွဲဍုၚ်ဗၟာ (PPNM) ပတိတ်လလောၚ်တြး လဝ်ရ။
နူကဵုဂိတုဂျူလာၚ် ၂၃ အခိၚ်ဂယးပြဟ်ဂှ် မွဲအလန်ဓဝ် ညးတာလျိုၚ်ထံၚ်တံပဆုဲပြံၚ်ဏာ နူကဵုထံၚ်တံၚ်ဥူ ကောန်ထံၚ်ၜိုတ် ၅၀၀ သီုကဵုကောန်ထံၚ်ပရေၚ်ဍုၚ်ကွာန်ညးတြုံ ၁၀၀ တၠပါလုပ်မံၚ်တံဂှ် ဗစိုပ်ပလံၚ်ဏာလဝ် ထံၚ်သာယာဝတဳရောၚ်။
ကၠာဟွံဂွံပဆုဲပြံၚ်ကောန်ထံၚ်တံဏံဂှ် ညးတာလျိုၚ်ထံၚ်တံ ကော်ယၟု ညးသွက်ဂွံဆုဲပြံၚ်တံ ကၠာမွဲတ္ၚဲ ကွက်ကံက်ဇိုၚ်တုဲ၊ ပ္ဍဲဂျူလာၚ် ၂၃ အခိၚ်နူဂယးပြဟ်ၜိုတ် ၃ နာဍဳကဝက်ဂှ် နကဵုကွဳစက်ကော်ပြံၚ်ဏာ ထံၚ်သာယာဝတဳ မဒှ်ရ။
အခိၚ်ပဆုဲပြံၚ်ကောန်ထံၚ်တံဂှ်တှ်ေ ကောန်ထံၚ်မွဲတၠမ္ဂး ကဵုကေတ်ဏာလဝ်ယာတ်ပိခတှ်ေကဵု ပလောအ်ပိစောမ်ဓဝ်တုဲ၊ ကပေါတ်ပူဂိုလ်သှ်ေမံၚ်တံကဵု ကပေါတ်ပၠုပ်လဝ်ထံၚ်တံဂှ် ညးတာလျိုၚ်ထံၚ်တံ သီကေတ်ထောံဖအိုတ်ရောၚ် PPNM သ္ဂးရ။
ပရေၚ်ကွက်ကံက်ဇိုၚ်ကောန်ထံၚ်တံကီု ပရေၚ်သီကေတ်ဏာကပေါတ်ပူဂိုလ်တံဂှ်ကီု ပွမဆုဲပြံၚ်ထံၚ် ဟွံကဵုလဝ်သမ္တီ အခိၚ်နူဂယးပြဟ်ဗီုတံဏံဂှ် ဒှ်ပရေၚ်ဍဵုဍိုက်ကောန်ထံၚ်တံသီုကာယ သီုကဵုစိုတ်စရိုတ်ဂွံလီုလာ် ဖျေံလဝ်သၞောတ် ချိုတ်တ်ပၠိုတ်တ်ရောၚ် သာ်ဝွံ PPNM ပတိတ်လဝ် လိက်လလောၚ်တြးရ။
ပရိုၚ် – သြၚ်လောန်တိုၚ်မ်
Photo – Social Media