ပလဝ်၊ ဂျူလာၚ် ၂၄
အပ္ဍဲရးတနၚ်္သဳ ဍုၚ်ပလ ဒၞာဲသ္ၚိဌာန်ညးဂြိပ်ဒဴပၞာန် ကပေါတ်သုၚ်စောဲနွံမံၚ်ကဵုၚုဟ်မးတံဂှ် ဒပ်ပၞာန်သီအဝဵုလုပ်ဖံက်ကေတ်ဏာလဝ်ရောၚ် ညးဒေသတံဟီုကဵု ဌာန်ပရိုၚ်သြၚ်လောန်တိုင်မ်ရ။
စနူဂျူလာၚ် ၂၀ တေံ ကောန်ပၞာန်ဒပ်ပၞာန်သီအဝဵုတံ စိုပ်ကၠုၚ်ကွာန် သၞေဟ်ဇြပ်၊ ကွာန်မိုၚ်ပျေၚ် ဍုၚ်ပလဂှ် လုပ်ဖံက်လဝ်သ္ၚိဌာန် ညးဂြိပ်ဒဴပၞာန်တံတုဲ ကပေါတ်သုၚ်စောဲသ္ၚိတံဂှ် ဖ္ဍိုက်ဖျဴဏာလဝ် နကဵုကွဳစက်ဖဝ်တံရောၚ် ဂွံတီရ။
ပ္ဍဲကွာန်ၜါကွာန်ဏံ ပေါဲဗတိုက်ဒှ်လဝ်ဟၟဲကီုလေဝ် ဒပ်ပၞာန်သီအဝဵုတံ ပန်ဏာလွဟ်ဍောတ်တ်တံကြာန်န်တုဲ ဒၞာဲသ္ၚိမၞိဟ်မံၚ်ဟၟဲမ္ဂး ကပေါတ်ၚုဟ်မးနွံတံဂှ် ဖ္ဍိုက်ကေတ်ဏာနကဵုကွဳစက်ဖဝ်တံ ဗစိုပ်ဏာဍုၚ်ပလ ရဂှ် ညးဒေသတံ သ္ဂးရ။
အပ္ဍဲဍုၚ်ပလဂှ် အကြာဒပ်ပၞာန်ဗမာကဵုဂကောံဒပ်ပၠန်ဂတးတံ ပေါဲဗတိုက် အကြာၜါလပါ်ဇၞော်ကဵုဇြဟတ်ကေၚ်ဒှ်ကၠုၚ်လဝ်တုဲ စနူဂိတုအံက်တဝ်ဗါ သၞာံအာတေံ အကာဲအရာပရေၚ်ပၞာန် ညိၚ်ဝပ်ကၠုၚ်ဂှ်ရ ညးဍုၚ်ကွာန်လ္ၚဵုတံကလေၚ်စဴမံၚ် ပ္ဍဲဌာန်ဒၞာဲဝါဲ ညးတံ နွံမံၚ်ရ။
ဆဂး စနူသတ္တဟဒုတိယ ဂိတုဂျူလာၚ်ဏံဂှ် ဇြဟတ်ကောန်ပၞာန်ဗွဲမဂၠိုၚ် ထပက်လုပ်ကၠုၚ်ကရောၚ်ပၞာန် ဗ္ဒာဲဍုၚ်ပလတုဲ အဟိန်ညးဍုၚ်ကွာန်တံ ဒးဂြိပ်ပါဲဒဴမံၚ်ပၞာန်ဂှ် ကပေါတ်ၚုဟ်မးနွံနွံ နူကဵုသ္ၚိဌာန်ညးတံ ဒးဒုၚ်ဖံက်ဂၠံက် သီကေတ်ဏာလဝ် မဒှ်ရ။
ကပေါတ်တံဏံဂှ် ကောန်ပၞာန်ဒပ်ပၞာန်သီအဝဵုတံ ဖ္ဍိုက်ယိုက်ကေတ်ဖျဴဏာဍုၚ်ပလတုဲ နူတေံမွဲကဆံၚ်ကပေါတ်လ္ၚဵုတံဂှ် ၚုဟ်မးၜိုတ်ဂွံကဵုဂွံသွံစမံၚ်တုဲ ပါ်ပရအ်သုၚ်စောဲမံၚ်အိုတ်ရောၚ် ဂွံတီကေတ် နူညးမံၚ် အကြာဗွိုၚ်ကြပ်ဒပ်ပၞာန်တံရ။
ပရိုၚ် – သြၚ်လောန်တိုၚ်မ်
Photo – Social Media