မတ်မလီု၊ ဂျူလာၚ် ၂၄
သမ္မတ ဥူမေန်အံၚ်လှိုၚ် ဟီုလဝ် သွက်ဂွံယှအ်ဖျေံ ပရေၚ်သုၚ်စောဲကၠေၚ်စတံတုဲ ကြဴနူဂှ် ပ္ဍဲဍုၚ်မတ်မလီု ကၠေၚ်စ ဂကောံသၟာဗၞိက်ကၠေၚ်သွံကဵုမံၚ်တံဂှ် နကဵုလိက်အုပ်အခေါၚ်ရာန်ကၠေၚ်နွံမှ သွံကဵုမံၚ်ရောၚ် ညးဒေသတံ ဟီုကဵု ဌာန်ပရိုၚ် သြၚ်လောန်တိုၚ်မ်ရ။
သမ္မတဟီုလဝ် ဍုၚ်ပိုဲဏံ သွက်ဇၟာပ်ပ်သၞာံ ဒးရာန်ပၠုပ်နၚ်မံၚ်ကၠေၚ်စ နူကဵုဍုၚ်သအာၚ်တုဲ ဒးသုၚ်စောဲလဝ် သြန်ဍုၚ်သအာၚ်ဗွဲမဂၠိုၚ် ဒှ်မံၚ်ဂှ်ကီု၊ အပ္ဍဲဍုၚ်ပိုဲဏံ ကပေါတ်သၞေဝ်ကဝ်ပတိတ်ကၠေၚ်စတံ တဵုလွဳလဝ်နွံမံၚ်ကီုလေဝ်၊ ပရေၚ်သုၚ်စောဲကၠေၚ်စ မွဲမွဲတၠတံဂှ်မ္ဂး ဂၠိုၚ်မံၚ်ရောၚ် ပ္ဍဲဂိတုဂျူလာၚ် ၂၁ တေံ အဃောဆဵုဂဗကဵု ညးတာလျိုၚ် ရးလ္ဂုၚ်ကေုာံရးဗဂေါတံဂှ် ညးဟီုလဝ်ရ။
ဟိုတ်ဂှ်တုဲ ပရေၚ်သုၚ်စောဲကၠေၚ်ဂှ် ဒးယှအ်ဖျေံအာထေက်တုဲ၊ ယဝ်ရ သုၚ်စောဲကၠေၚ် လောန်ၜက်အာနူသၞောတ်ထ္ၜတ်မ္ဂး ပရေၚ်ထတ်ယုက်လဝ် ယုတ်ဒေက်စှ်ေအာမာန်တုဲ သုၚ်စောဲကၠေၚ် လောန်ၜက်အာနူသၞောတ် ဒဵုကဵုဒှ်အာတၚ်ယုက်ဒေက်ပရေၚ်ထတ်ယုက်တံမာန်ဂှ် ညးညးအဲအဲဝေၚ်ပါဲအာအိုတ်ညိ သာ်ဝွံ ညးစၞောန်ပ္ညုၚ်လဝ်မဒှ်ရ။
ကြဴနူကဵုညးစၞောန်ပ္ညုၚ်သာ်ဏံတုဲ အပ္ဍဲဒေသ ကိုပ်ကၠာတေံ သွက်ညးကွပ်အဆံၚ်သ္ဇိုၚ်တံဂှ် သွံကဵုမံၚ်ကၠေၚ်စ နကဵု ပြေၚ်မၞိဟ် ၜေတ်ကေတ်ကီုလေဝ်၊ ပြဟ်ဟ်ဏံမ္ဂး ပ္ဍဲရုၚ်သ္ကိုပ်ပရေၚ်အုပ်ဓုပ်အရာပ်တံဂှ် ဒးကၠောန်လိက်အုပ် အခေါၚ်ရာန်ကၠေၚ်စတုဲဒှ်မှသွံကဵုမံၚ်ရောၚ် ညးဒေသတံ ဟီုရ။
ကၠာတေံ အခိၚ်ဂကောံသၟာဗၞိက်တံ ကၠုၚ်သွံမံၚ်ကဵုကၠေၚ်စတံမ္ဂး မၞိဟ်တံအာၜေတ် ရာန်ဂွံကီုလေဝ်၊ လၟုဟ်ဏံမ္ဂး ဒးကၠောန်လိက်အုပ်အခေါၚ်ရာန်ကၠေၚ်စ ပ္ဍဲကဵုရုၚ်သ္ကိုပ်ပရေၚ်အုပ်ဓုပ်အရာပ်တံတုဲမှလေဝ် သွံကဵုရောၚ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ကိုပ်ကၠာတေံမ္ဂး မၞိဟ်တံဒးအာၜေတ်ကေတ်ရ၊ ပြေၚ်ရေၚ်လဝ်မၞိဟ်တံတုဲ မွဲပသာမ္ဂး မူစိဒကေဝ်သာ်ဏံ ဂဗဆဵုတှ်ေ ၜေတ်ရာန်ရ၊ လၟုဟ် နကဵုလိက်အုပ်မှ၊ ကၠာတေံ လိက်အုပ်ဟၟဲပုဟ်လေဝ်၊ လၟုဟ် ဒးကေတ်လိက်အုပ်ကၠေၚ်၊ ဒးကၠောန်လိက်အုပ်၊ ကၠောန်လိက်အုပ်မ္ဂး ဒးကဵုမွဲလ္ၚီဒကေဝ်၊ ဒးကၠောန်လိက်အုပ်ရ၊ တၞးဆာဲစရၚ်ကၟိန်အိန်ထံၚ် ၂ တၞးရ၊ စရၚ်သ္ၚိတမ်မူလလေဝ် ကေတ်ဏာညိ၊ ညးတံရံၚ်ကဵုစရၚ်တမ်မူလတုဲ တၞးဆာဲမွဲတၞးဂှ် ညးတံကရေပ်စုတ်ကဵုလဝ်ရ၊ မွဲတၞးဂှ်မ္ဂး ကွက်စုတ်ကဵု ပ္ဍဲလိက်အုပ်ကဵုစရၚ်ကၟိန်အိန်ထံၚ် တမ်မူလဂှ်ရ၊ မွဲဂိတုမ္ဂး ပတိတ်ဂွံမွဲဝါဓဝ်၊ မွဲဝါမ္ဂး ၃ ပသာ ပတိတ်တှ်ေ တုဲမံၚ်ရ”သာ်ဝွံ သ္ဂးရ။
တုဲပၠန် ဟိုတ်နူကၠောန်လိက်အုပ် သွက်အခေါၚ်ရာန်ကၠေၚ်စ သာ်ဏံတုဲ သွက်ညးသ္ဇိုၚ်နွံမံၚ်ပၟိက်ကဵုကၠေၚ်စတံ ယဝ်ရလိက်အုပ်ဟၟဲမ္ဂး ဗီုကၠာကၠာတေံရာန်ဟွံဂွံတုဲ အခက်အခုဲဒှ်ကၠုၚ်မာန်ရောၚ် ညးဆက်ဟီုရ။
ၜိုန်ရဟီုမံၚ် သွံကဵုကၠေၚ်စ နကဵုၚုဟ်မးသက်သာကီုလေဝ် နတဲမ္ဂး စၟတ်ပိုၚ်ခြာသွံကဵုမံၚ် ဆၜိုတ်ထ္ၜးစဗီုပြၚ်ရတုဲ ညးတံကဵုညးတံ ပါ်တြးပရအ်ကေတ်မံၚ်အိုတ်ရောၚ် ညးဒေသတၞဟ်မွဲတၠပၠန် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ကဵုညးဍုၚ်ကွာန်တံဟီုဂှ် ဒှ်ဆၜိုတ်ထ္ၜးစဗီုပြၚ်ညိညဟေၚ်ရ၊ ဆဂး ညးတံဂှ် ဗီုလဵုဂွံဟီုရော ညးတံကဵုညးတံသၟး ပရအ်ကေတ်မံၚ်အိုတ်ရ တီမံၚ်ဟာ၊ ဗီုဏံရ၊ ဆညိညဟေၚ် ညးတံပ္တိတ်ကဵု ၜိုတ် ၃-၄ စေဝ်တုဲ ကၠေၚ်သှ်ေတံဂှ် ညးတံပါ်ပရအ်ကေတ်ဏာအိုတ်ရ၊ တၞဟ်ခြာမံၚ်လေဝ်၊ ညးတံအခိၚ် ကဵုကၠေၚ်မွဲမွဲဝါမ္ဂး ကဵုမၞိဟ်တံၜေတ်တုဲမှ ကဵုဏာရ၊ အခိၚ်မၞိဟ်တံအာၜေတ်မ္ဂး ညးတံစွံလဝ်တၚ်စၟတ်ပိုၚ်ခြာပၠန်၊ မၞိဟ် ၃၀ တှ်ေ ၃၀၊ ၂၀ တှ်ေ ၂၀၊ ၜိုတ်ဏံရ ညးတံစၟတ်ပိုၚ်ခြာတုဲမ္ဂး မၞိဟ်လက်ကရဴတံ ရာန်ဟွံဂွံရပုဟ် သာ်ဏံ ညးတံကၠောန်မံၚ်ရောၚ်”သာ်ဝွံ သ္ဂးရ။
မွဲလပါ်ပၠန်မ္ဂး နူကဵုသ္ကိုပ်ဌာနပရေၚ်ကေၚ်ကာညးသုၚ်စောဲ သၟဝ်အလဵုအသဳဒပ်ပၞာန်ဂှ် စၟတ်ပိုၚ်ခြာလဝ်ၚုဟ်မးသ္ဇိုၚ် ကၠေၚ်စ မွဲပသာမ္ဂး ၇၂၃၀ ဒကေဝ်နွံရ။
အပ္ဍဲဒေသဂှ်မ္ဂး ကၠေၚ်စ ဒှ်စၞစသ္ဇိုၚ်တံဂှ် ၚုဟ်မးပ္ဍဲဖျာမ္ၚးမ္ဂး မွဲပသာအောန်အိုတ် ဒှ်မံၚ် နူ ၁၃၀၀၀ ဒကေဝ် စဵုကဵု ၁၅၀၀၀ ဒကေဝ် ဒးရာန်ကေတ်မံၚ်ရောၚ် ညးဒေသတံ သ္ဂးရ။
အပ္ဍဲဍုၚ်မတ်မလီုဂှ် ကၠေၚ်စအဓိကလုပ်ကၠုၚ်မံၚ်နူဍုၚ်သေံကီုလေဝ် ညးသ္ဇိုၚ်သၟဝ်တံဂှ်မ္ဂး ဒးဗ္ဒးဗ္ဒာဲဒၟံၚ်ကၠေၚ်စ နူကဵုဂကောံသၟာဗၞိက်ကၠေၚ်တံတုဲ လၟုဟ်မ္ဂး အခေါၚ်ရာန်ကၠေၚ်စတံဂှ် စၟတ်ပိုၚ်ခြာလဝ် နကဵုလိက်အုပ်တုဲ ဒးဆဵုဂဗမံၚ်ကဵုအခက်အခုဲရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – CJ