နေပျဳဒဝ်၊ ဂျူလာၚ် ၂၄
စပ်ကဵုပရေၚ်ဒေသပယျဵု အကြာၜါဍုၚ် သ္ဂောံညိၚ်ဝပ်ဂွံၜိုဟ်လလမ်အာဂှ်တုဲ အမာတ်ကလုတ်ကြုက်ဆေၚ်စပ်ကဵုဍုၚ်ဗၟာကေုာံ အမာတ်ကလုတ်ပၞာန်တံ ပ္ဍဲဂျူလာၚ် ၂၂ တေံ ကၠုၚ်ဆဵုဂဗလဝ် ဂဥုပ်ဒပ် ဒပ်ပၞာန်သီအဝဵုသ္ကိုပ်ပၞာန်ဇၞော် ယေဝ်ဝေန်ဥူ ပ္ဍဲကဵုနေပျဳဒဝ် ရဂှ် အလဵုအသဳပၞာန် ပတိတ်လဝ်ပရိုၚ်ရ။
အပ္ဍဲကဵုကၠုၚ်ဆဵုဂဗလဝ်ကုဂဥုပ်ဒပ်ဂှ် ညးတာလျိုၚ်ဇၞော်ဇၞော် နူကဵုရုၚ် ဂဥုပ်သ္ကိုပ်က္ဍိုက်ပ်ပၞာန်ပရေၚ်စဵုဒၞာတံ တိုန်စိုပ်လဝ်အိုတ်တုဲ သီုကဵုအမာတ်ကလုတ်ကြုက် ဆေၚ်စပ်ကဵုဍုၚ်ဗၟာ၊ အမာတ်ကလုတ်ပၞာန် ကေုာံ ညးတာလျိုၚ်နူရုၚ်ကလုတ်တံကီု တိုန်စိုပ်လဝ်ကီုရ။
ပရေၚ်မိတ်သဟာဲအကြာၜါဍုၚ် ပဵုတုဲဂွံဇြိုဟ်နက်တိုန် ကေုာံ နကဵုမဟာဗျူဟာစှ်ေစှ်ေ သွက်ဂွံသၠုၚ်ပတိုန်အာပရေၚ်ပံၚ်တောဲရေၚ်တၠုၚ် သွက်ဒေသပယျဵုဂွံညိၚ်ဝပ်အာကေုာံ စပ်ကဵုပရေၚ်ဒေသ ဖောအ်ဗြဳတောတက်တံတုဲ ဆဵုဂဗသဳကၠဳလဝ် ညးသ္ကံရ။
တုဲပၠန် နူကဵုအလဵုအသဳပၞာန် ကော်ဘိက်လဝ် ဂကောံရပ်လွဟ်သွက်ဂွံသဳကၠဳပရေၚ်ၜိုဟ်လလမ်တုဲ ကိစ္စရေၚ်တၠုၚ်ဖန်ဖက်မံၚ် စပ်ကဵုပေါဲသဳကၠဳ ပရေၚ်ၜိုဟ်လလမ်အပ္ဍဲဍုၚ်တံဂှ်လေဝ် သဳကၠဳလဝ်ကီုရောၚ် ပ္ဍဲလိက်ပရိုၚ်တြးဝါဒဍုၚ်တံ ထမံက်ထ္ၜးချူလဝ်ရ။
မွဲလပါ်ပၠန် စပ်ကဵုပရေၚ်ဒၞာတာဂဥုဲၜူမာဲ၊ ပရေၚ်လီသြန်အန်လာၚ်ကေုာံ ပရေၚ်ဝေင်ဇျှၚ်အန်လာၚ်တံဂှ် ညံၚ်ဂွံပံၚ်တောဲ ဗတိုက်သရိုဟ်အာမွဲကရောံ သီုကဵုဇိုၚ်ဝုတ်ဒိုဟ်သ္ၚိဗ္ဒာဲ ဍုၚ်အပ္ဍဲဒေသတံကီု၊ အကြာဒပ်ပၞာန်ၜါဍုၚ် ကိစ္စပံၚ်တောဲရေၚ်တၠုၚ်ပရေၚ်နဲကဲပညာ၊ တၚ်နၚ်ပရိုၚ်ကေုာံ ကဏ္ဍဆေၚ်စပ်နာနာတံဂှ် သဳကၠဳလဝ်နွံရ။
ပရေၚ်ဆဵုဂဗဏံဂှ် ဆေၚ်စပ်မံၚ်ကဵု ပရေၚ်ကိစ္စဂကောံဒေသသၟဝ်ကျာတံ သဳကၠဳမံၚ်ပရေၚ်ၜိုဟ်လလမ် ပ္ဍဲနေပျဳဒဝ်တုဲ စပ်ကဵုကပေါတ်လွဟ်ပၞာန်တံမ္ဂး သွက်ဂွံပံၚ်တောဲဖျေံအာဗီုလေဝ် ဒှ်မာန်ရောၚ်အကြာပ်ဇၞော် CDM ဒပ်ပၞာန်ကျာ ဇေယျ သ္ၚဳဂၠိပ်လဝ်ရ။
“တၠုၚ်လအာဏံဂှ် ဗီုပြၚ်တၟေၚ်တၟဟ်မံၚ်ဗွဲမလောန် ဟွံသေၚ်ပုဟ်။ ပရေၚ်ဏံ ဒှ်မံၚ်ကေၚ်ကာကိစ္စ ဂကောံဒေသသၟဝ်ကျာတံ စိုပ်မံၚ်နေပျဳဒဝ်ရ။ စပ်ကဵုကိစ္စ စိုပ်မံၚ်နေပျဳဒဝ်တုဲ သဳကၠဳပရေၚ်ၜိုဟ်လလမ်တေံဂှ်လေဝ် ဆေၚ်စပ်မံၚ်ဏောၚ်။ တုဲမ္ဂး ဟိုတ်နူအမာတ်ကလုတ်ပၞာန်ကြုက် ဒှ်မၞိဟ်နူသွာၚ်ပၞာန်တုဲ ကိစ္စပရေၚ်ဒပ်ပၞာန်ကဵုဒပ်ပၞာန် ပံၚ်တောဲရေၚ်တၠုၚ်တံ ဥပမာ ကိစ္စရာန်လွဟ်မကမ်တံ၊ တုဲမ္ဂး ကိစ္စရာန်ၜၚ်ကျာတံ။ ပရေၚ်တံဏံလေဝ် နွံကၠုၚ်မံၚ်အဆက်ဟွံပိုတ်တုဲ သွက်အရာတံဏံလေဝ် ဒှ်မာန်မံၚ်ဏောၚ်” သာ်ဝွံ သ္ဂးရ။
ပြဟ်ဟ်ဏံ ပ္ဍဲဍုၚ်ဗၟာ စပ်ကဵုနဲကဲပညာထံၚ်ပရိုၚ် ဆေၚ်စပ်ကဵုတၚ်နၚ်ပူဂိုလ်ညးဍုၚ်ကွာန်တံ အလဵုအသဳပၞာန် သုၚ်စောဲစကာမံၚ်လၟုဟ်ဏံဂှ် ဟိုတ်နူဂွံလဝ်အရီုဗၚ်နူကဵုဍုၚ်ကြုက်တုဲ နူပရေၚ်ဆဵုလဝ်ညးသ္ကံဏံဂှ် ကိစ္စတံဏံလေဝ်ပါလုပ်မာန်ရောၚ် ညးဆက်ဟီုရ။
စပ်ကဵုပရေၚ်ၜိုဟ်လလမ်တုဲ နူဂကောံဒေသသၟဝ်ကျာ ဂကောံ “ဝ” UWSA၊ ဂကောံမာၚ်ဠာ NDAA၊ SSPP၊ ဒပ်တအာၚ် TNLA တံ မွဲဂကောံတုဲမွဲဂကောံ ဆဵုဂဗသဳကၠဳလဝ်ဗွဲပလး ကုကမ္မတဳပ္ညဳပ္ညပ် ထမံက်ရုပ်ရဴ ညဳသၟဟ်ဂကူကဵု ပရေၚ်ၜိုဟ်လလမ် NSPNC အလဵုအသဳပၞာန်တံ တုဲယျ။
အပ္ဍဲဏံ ဂကောံမဟာမိတ်ကောဒေံပိဂကောံ ထမံက်ရုပ်ရဴပရေၚ်လဝေၚ်ပၞာန် ၁၀၂၇ ပ္ဍဲသေံသၟဝ်ကျာတေံ ဒပ်တအာၚ် TNLA ဂှ် နကဵုအလန်ကၠာအိုတ်ပါလုပ်ကၠုၚ် ပ္ဍဲကဵုအစဳအဇန် ပရေၚ်ၜိုဟ်လလမ် အလဵုအသဳပၞာန် ပွိုၚ် ၁၀၀ တ္ၚဲတုဲ ကၠုၚ်သဳကၠဳလဝ် ပ္ဍဲနေပျဳဒဝ် မဒှ်ရ။
မွဲလပါ်ပၠန် ဒပ်ကဝ်က MNDAA ဂှ်လေဝ် ညံၚ်ဂွံပါလုပ်သဳကၠဳ ပ္ဍဲကဵုအလဵုအသဳဒပ်ပၞာန် ကော်ဘိက်လဝ်ပရေၚ်ၜိုဟ်လလမ်ဂှ်တုဲ နူကဵုအလဵုအသဳကြုက် ဗတိုက်ဖအောဝ်ဟီုဂးမံၚ်နွံရောၚ် သာ်ဝွံ မဳဒဳယာပရိုၚ်တံ ထမံက်ထ္ၜးချူလဝ်ရ။
နူကဵုပရေၚ်ပ္ညဳပ္ညပ်သဳကၠဳပရေၚ်ဍုၚ်ကွာန်ဂှ်မွဲအဆံၚ် နကဵုဍုၚ်ဗၟာထမံၚ်အာမံၚ်ရုပ်ရဴ ပရေၚ်ၜိုဟ်လလမ်အပ္ဍဲဍုၚ်ကေုာံ ပရေၚ်ညဳသၟဟ်ကောန်ဂကူတံဂှ် ဍုၚ်ကြုက်ကဵုလဝ်ပရေၚ်အရီုဗၚ်တံဂှ်လေဝ် အခိၚ် ဥူမေန်အံၚ်လှိုၚ် အာလဝ်ဍုၚ်ကြုက်တေံ ပ္ဍဲကဵုလိက်လလောၚ်တြး ပရေၚ်ပံၚ်တောဲၜါဍုၚ်ဂှ် ကဵုလဝ်သမ္တီရောၚ်။
ဒပ်တအာၚ် TNLA ကေုာံ ဒပ်ကဝ်က MNDAA တံဂှ် ဟိုတ်နူပရေၚ်ပ္ညဳပ္ညပ်အလဵုအသဳကြုက်ကဵု ဒပ်ပၞာန်ဗၟာဂှ် မွဲဂကောံတုဲမွဲဂကောံ တၞဟ်ခြာဒေါအ်ကၠုၚ်လဝ် ပရေၚ်ပန်ပှော်တံတုဲ ပရေၚ်လဝေၚ်ပၞာန် ၁၀၂၇ ဂှ်လေဝ် ဒေါအ်အာလဝ်မွဲသ္ကုတ်ကီု အပ္ဍဲကဵုပရေၚ်ဗတိုက်ပလီုသရိုဟ်ကၠေံ သၞောတ်တၠအဝဵုပၞာန်တံဂှ်လေဝ် ဆက်ပါလုပ်အာဟွံမာန် ဒှ်အာအကာဲအရာဗီုဏံရောၚ်။
ဍုၚ်ဇြဟတ်ဇၞော်အပ္ဍဲဒေသ ညံၚ်ရဴကြုက်ကဵုမံၚ်ဇြဟတ်ဟရိုဟ် ပရေၚ်ပ္ညဳပ္ညပ်အကြာဂကောံရပ်လွဟ်ပယျဵုတံကဵု ဒပ်ပၞာန်ဗၟာတံဂှ် ဒုၚ်လဝ်သ္ဇိုၚ်လ္တူဒဳမဝ်ကရေဇြဳဟွံသေၚ်၊ သွက်ပရေၚ်ဒေသပယျဵုညးတံ ဂွံညိၚ်ဝပ်အာကီု သွက်ပရေၚ်ဂီုကၠီုဂုဏ်ဖဵုပိုန်ဒြပ် ညးတံဟေၚ်ရောၚ် နူကဵု ISP-Myanmar ထံက်ထ္ၜးလဝ်ရ။
ပရိုၚ် – သြၚ်လောန်တိုၚ်မ်
Photo – MOI