မတ်မလီု၊ အံက်တဝ်ဗာ (၃၁)
ကောံဓရီုဇၞော် ဗော်သွးကောန်ဂကူကရေၚ် KNU မရနုက်ကဵု (၁၇) ဝါတံဂှ် စဳဇန်လဝ် သွက်ဂွံကၠောန်ဗဒှ် အပ္ဍဲသၞာံဏံ နွံကီုလေဝ် မ္ၚးနူပေါဲဗ္တိုက် မသ္ကာတ်မြဟ်ကၠုၚ်တံဂှ် သီုကဵုအကာဲအရာကံၚ်ဇြဳပၞာန် ဗ္တိုက်ဒၟံၚ် ကဵုက္ၜၚ်ကျာတံဂှ်ရ ဒးပဆုဲပြံၚ်လဝ်ရောၚ် ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳ ဟီုရ။
သွက်ဂွံကၠောန်သ္ပ ကောံဓရီုဇၞော် KNU နူမွဲၜါသၞာံတုဲကၠုၚ်တေံဂှ် စဳဇန်လဝ်ကီုလေဝ် ဟိုတ်ဒၟါနူယဲကပ်ကိုဝ်ဝေဒ် ကဵု အကာဲအရာဒပ်ပၞာန်သီအဝဵုတံဂှ်ရ ဒးပဆုဲပြံၚ်လဝ် အစဳဇန်သ္ဂောံကၠောန်ဗဒှ် ကောံဓရီုတံဂှ်ရ။
အတိုၚ်တၚ်စၞောန်ပျးသၞောဝ်ဥပဒေ KNU ဂှ်မ္ဂး အခေါၚ်ဆုဲပြံၚ် ကောံဓရီုဂှ် (၂) သၞာံနွံတုဲ ပဆုဲပြံၚ်လဝ်သာ်ဏံ ပေၚ်အာ (၂) သၞာံဂှ်ရ သၞာံ (၂၀၂၂) သၞာံဏံ ဂိတုအံက်တဝ်ဗာ (၂၄) ဂှ် KNU စဳဇန်လဝ် သွက်ဂွံကၠောန်ဗဒှ် ကောံဓရီုဂှ်ရ။
ဆ္ဂး ဟိုတ်နူအကာဲအရာ ဒပ်ကံၚ်ဇြဳပၞာန် ဗ္တိုက်ကၠုၚ်ကဵုက္ၜၚ်ကျာ ဂၠိုၚ်ကၠုၚ်တံဂှ်ကီု၊ ပေါဲဗ္တိုက်သ္ကာတ်မြဟ် မဒးဆေၚ်ဒၟံၚ်မုက်တံဂှ်ကီု သီုကဵုအကာဲအရာ ဂၠံၚ်ဍာန်ဆက်စၠောံတံကီုဂှ်တုဲ အတိုၚ်တၚ်ပ္တိုန်ထ္ၜး က္ဍိုပ်သ္ကိုပ် KNU တံဂှ်ရ ထပ်ပဆုဲပြံၚ်လဝ် ကောံဓရီုဂှ်ပၠန်ရောၚ် ပဒိုဝ်သဝ်တဝ်နဳ သ္ဂးရ။
နကဵု KNU အခိၚ်ကာလပဆုဲပြံၚ် ကောံဓရီုဂှ် လောန်ၜက်အာ (၂) သၞာံကီုလေဝ် အတိုၚ်စၞောန်ပျး သၞောဝ်သ္ဇိုၚ်ဒက်ပ္တန် KNU တံဂှ်မ္ဂး ဒၟါနူကမ္မတဳဗဟဵုလၟိုန်တံ လီုလာ်ဂှ် ဟွံပါလုပ်တုဲ ကမ္မတဳဗဟဵုလၟိုန်ဝွံ ဆက်တန်တဴအာ ဗွဲမလုပ်သၞောဝ်ရ။
ၜိုန်ရထပ်ပဆုဲပြံၚ်လဝ် ကောံဓရီုဇၞော်ဂှ်ကီုလေဝ် အတိုၚ်သၞောဝ်သ္ဇိုၚ်ဒက်ပ္တန် KNU ဂှ်မ္ဂး လက္ကရဴဏံ လၟေၚ်ကမၠောန် မ္ဒးရေၚ်တၠုၚ်အဓာန်ဂတတံဂှ် ကလေၚ်ကော်ကောံဓရီုတုဲ သ္ဂုတ်သွာတ်အာရောၚ် ပဒိုဝ်သဝ်တဝ်နဳ သ္ဂးရ။
ပ္ဍဲကဵုကောံဓရီုဇၞော် KNU မရနုက်ကဵု (၁၇) ဝါဏံဂှ် သွက်ဂွံကလေၚ်ရုဲစှ် က္ဍိုပ်သ္ကိုပ်ကဆံၚ်လ္တူတံကဵု သွက်ဂွံသဳကၠဳသ္ဂုတ်သွာတ်အာ သွက်ကမၠောန် သ္ဂောံထမံက်ရုပ်ရဴရေၚ်တၠုၚ်အာ အဓာန်ဂတတံဂှ် စဳဇန်လဝ်ရ။
ပ္ဍဲတိဍာ်ထိၚ်ဒဝ် ဗော်သွးကောန်ဂကူကရေၚ် KNU မဒှ်ဂကောံရပ်လွဟ်ကောန်ဍုၚ်အရၚ် ဇြဟတ်ဇၞော်မွဲဂကောံဂှ် ကြဴနူဒပ်ပၞာန်သီအဝဵုတုဲ လၟိဟ်အပံၚ်ပေါဲဗ္တိုက် မက္တဵုဒှ်လဝ် ကဵုဒပ်ကံၚ်ဇြဳပၞာန်ဂှ် ဗၞတ် (၇၀၀၀) ဝါ မၞုံရ။
ပရိုၚ်−သြၚ်လောန်တိုၚ်(မ်)