မတ်မလီု၊ အံက်တဝ်ဗာ (၃၀)
ပ္ဍဲပွိုၚ်ဍုၚ်လှာဒကှ် တွဵုရးကရေၚ် ဒၞါဲပရေၚ်ပၞာန်ကြံၚ်မ္ၚိုဟ်တံ နွံဒၟံၚ်ဂှ် ကောန်ဒပ်ကံၚ်ဇြဳပၞာန် (၅) တၠဝွံ လုပ်စိုပ်ကၠုၚ် ဇရေၚ်ဒပ်ပံၚ်ကောံ ဒပ်မဟာ (၆) KNLA တံတုဲ သ္ပကၠုၚ် CDM ဂှ် ကရောၚ်ပၞာန် (နဂါးနီ) လလောင်ပ္တိတ်လဝ်ပရိုၚ်ရ။
ကောန်ဒပ်ကံၚ်ဇြဳပၞာန် နူခမရ (၃၅၈) (၃) တၠ၊ ခမရ (၄၃၂) (၁) တၠ ကေုာံ ခလရ (၂၈၄) (၁) တၠ မလုပ်စိုပ်ထ္ပက်ဒၟံၚ်ပရေၚ်ပၞာန် ပ္ဍဲပွိုၚ်ဍုၚ်လှာဒကှ် မဒှ်တိဍာ်ဒပ်မဟာ (၆) ဗော်သွးကောန်ဂကူကရေၚ် KNU တံဂှ်ဝွံ ပ္ဍဲဂိတုအံက်တဝ်ဗာ (၂၉) ပယျာံဂယးပြဟ်ဟ်ဂှ် လုပ်စိုပ်သ္ပကၠုၚ် CDM ပ္ဍဲတမ်ဒပ် (၁၇) KNLA ကဵု ကရောၚ်ပၞာန် (နဂါးနီ) တံရဂှ် လလောၚ်ပ္တိတ်လဝ်ရ။
ကုကောန်ဒပ်ကံၚ်ဇြဳပၞာန် (၅) တၠ မကၠုၚ်စိုပ်သ္ပလဝ် CDM သာ်ဏံတံဂှ် နူကဵုဒပ်ပါ် (၂) ကရောၚ်ပၞာန် (နဂါးနီ) ဂှ် မွဲတၠမ္ဂး ထံက်ပၚ်ရီုဗၚ်ကဵုလဝ် သြန်ထံက်ပၚ် (၅၀၀၀၀) ဒ္ကေဝ်ဂှ်ကီု၊ နူကဵုဂကောံပရေၚ်အုပ်ဓုပ်ညးဍုၚ်ကွာန် ပွိုၚ်ဍုၚ်လှာဒကှ် ကေုာံ ညးတာလျိုၚ် ကရောၚ်ပၞာန်(နဂါးနီ) တံဂှ် ရီုဗၚ်ထံက်ပၚ်ကဵုလဝ် ကပေါတ်အရပ်စပ်တံ၊ ဂၠိက်ယာတ်တံရောၚ် သာ်ဝွံ ပါလုပ် ပ္ဍဲတၚ်လလောၚ်တြးဂှ်ရ။
ကောန်ဒပ်ကံၚ်ဇြဳပၞာန် (၅)တၠ သ္ပ CDM တုဲ မလုပ်စိုပ်ကၠုၚ် အပ္ဍဲဒပ်ပံၚ်ကောံ KNLA တံဂှ်ဝွံ လွဟ်လက်နက်ဂှ် ဟွံပါကၠုၚ်တုဲ ဒှ်ကောန်ဒပ်ကံၚ်ဇြဳပၞာန် မဂြိပ်တိတ်ဗၠးၜးကၠုၚ် နူအပ္ဍဲပေါဲဗ္တိုက် မက္တဵုဒှ်လဝ် ပ္ဍဲကွာန်တဂေ၊ ပွိုၚ်ဍုၚ်လှာဒကှ် တုဲကၠုၚ်ဂိတုအံက်တဝ်ဗာ (၁၅) တေံဂှ် ဂွံတီကေတ်ရ။
ဂၠုဲပၞာန် နူဒပ်ကံၚ်ဇြဳပၞာန်တံ မဖျေံလဝ်လွဟ် ပ္ဍဲဇရေၚ်ဗော်သွးကောန်ဂကူကရေၚ် KNU တံဂှ်ကီု၊ သ္ပ CDM တုဲ လုပ်စိုပ်ကၠုၚ်ကီု ကေုာံ ဂၠုဲပၞာန် မရပ်ဂွံလဝ် အပ္ဍဲပေါဲဗ္တိုက်တံဂှ် မၚ်မွဲရံၚ်စံၚ် ထိၚ်ဒဝ်လဝ် အတိုၚ်သၞောဝ်ဥပဒေစေဝ်ပၞောန်ဂၠုဲပၞာန်တံ ခိုဟ်ဟ်ဂေါဝ်ဝ်ရဂှ် ညးတာလျိုၚ် KNU တံ ဟီုဂးလဝ်ရ။
အလုံကၟိန်ဍုၚ်မွဲ ကြဴနူဒပ်ပၞာန်သီအဝဵုတုဲ ကောန်ဒပ်ကံၚ်ဇြဳပၞာန် ကဵု ဗၠာဲသၟိၚ်တံ ဗ္ဒါဲ (၈၀၀၀) သ္ပလဝ် CDM ဂှ် အလဵုအသဳညဳသၟဟ်ဂကူ NUG လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)