သိုဝ်၊ ဂျူလာၚ် ၂၄
အပ္ဍဲပေါဲရုဲမာဲဒေသ ဂိတုဂျောန်တုဲကၠုၚ်တေံဂှ် စပ်ကဵုတၚ်ထမံက်ထ္ၜး လီဠာန်လဝ် လၟိဟ်တၞးမာဲတံတုဲ သ္ကိုပ်ပရေၚ်စၟဳစၟတ် ကဝ်ရဳယျာသၠုၚ်တံ ပ္ဍဲဂျူလာၚ် ၂၃ တေံ လုပ်သလိပ်လဝ် ရုၚ်ကဝ်မယှေန်မာဲဂှ် ညးအခေါၚ်ဟီုဂးနွံမွဲတၠ ဟီုလဝ်ကဵု ဌာန်ပရိုၚ် အေအက်ဖ်ပဳ ရ။
ကြဴနူကဵု သမ္မတလဳဂျေဝ်မျံၚ် တိုန်ကေတ်တာလျိုၚ် သၞာံအာတေံတုဲ ကၠောန်လဝ် ပေါဲရုဲမာဲအလုံမွဲဍုၚ် ပ္ဍဲဂျောန် ၃ အလန်ကိုပ်ကၠာအိုတ်ဂှ် ရုၚ်မာဲဗွဲမဂၠိုၚ်တံ တၞးမာဲဟွံရုံဂပ် က္တဵုဒှ်လဝ် ဗွဲမဒးအမ်သဝ်ရ။
ဟိုတ်နူကိစ္စ ဒှ်အာပရေၚ်ကယျာန်ဓဝါတ်ဏံတုဲ ပေါဲထ္ၜးဆန္ဒတံ က္တဵုဒှ်ကၠုၚ်၊ ညးဇၞော်ကဝ်မယှေန်မာဲကောန်ဂကူ (NEC) ရဝ်တေအက် နုက်တိတ်အာ နူတာလျိုၚ်ရ။
နူကဵုဂကောံတၟေၚ် ဒပ်ဗၠာဲသၟိၚ် ကေုာံ သၟာဥပဒေသၞောဝ်ဓဝ်အလဵုအသဳတံဂှ် ပ္ဍဲဂျူလာၚ် ၂၃ တေံ လုပ်သလိပ်သီကေတ်လဝ် ရုၚ် NEC တံရ ညးအခေါၚ်ဟီုဂးနွံ ဂကောံစၟဳစၟတ်ဂၠိုက်ဂၠာဲမွဲတၠ ဟီုရ။
ပ္ဍဲပေါဲရုဲမာဲဒေသတံဂှ် လၟိဟ်မၞိဟ်ကဵုလဝ်တၞးမာဲတံဂှ် ညးတာလျိုၚ်ကဝ်မယှေန်မာဲကောန်ဂကူ ကေုာံ ကဝ်မယှေန်မာဲတွဵုရးဂျဳယောန်ဂျဳတံ လီဠာန်ထမံက်ထ္ၜးလဝ်ရောၚ်ဂှ် ဆဵုညာတ်လဝ် တၚ်နၚ်တံရ သာ်ဝွံ ညးအခေါၚ်ဟီုဂးနွံဂှ် ဟီုရ။
ဗက်ဂၠာဲရပ်မံၚ် ညးပါလုပ် ပ္ဍဲကဵုကၠောန်လဝ် ပရေၚ်လီဠာန်ဏံရောၚ် ညးသ္ဂးရ။
လတူပရေၚ်တၞးမာဲဟွံရုံဂပ် ပ္ဍဲပေါဲရုဲမာဲဒေသတံဂှ် ညံၚ်ဂွံစၟဳစၟတ်ဂၠိုက်ဂၠာဲအာ ချိုတ်တ်ပၠိုတ်တ်ညိ သမ္မတစၞောန်ပ္ညုၚ်လဝ်တုဲ ကြဴနူဂှ် ပရေၚ်လုပ်သလိပ်သာ်ဏံ မံက်တိုန်ကၠုၚ် မဒှ်ရ။
စပ်ကဵုပရူပရာဏံတုဲ အလဵုအသဳကဝ်ရဳယျာသၠုၚ်ကျာလေဝ် သွက်ဂွံပလေဝ်အာ လၟေၚ်ပရေၚ်ကမၠောန်ပေါဲရုဲမာဲတံဂှ် စဳဇန်လဝ် တုဲတုဲရောၚ် သ္ဂးရ။
ဟိုတ်နူတၞးမာဲတံဟွံရုံဂပ် ဥက္ကဌကဝ်မယှေန်မာဲ နုက်တိတ်အာနူတာလျိုၚ်တုဲ၊ ကြဴနူဂှ် ပ္ဍဲဍုၚ်သိုဝ်ဂှ် မၞိဟ်နွံကဵုလ္ၚီဗွဲမဂၠိုၚ်တံ ထ္ၜးကၠုၚ်ဆန္ဒတုဲ သွက်ဂွံကလေၚ်ကၠောန်ကဵု ပေါဲရုဲမာဲမွဲဝါပၠန်ဂှ် အာတ်မိက်လဝ်ရောၚ်။
သွက်ပရေၚ်ဏံဂှ် နကဵုကောန်ဍုၚ်မွဲကီု၊ နကဵုသမ္မတမွဲ နွံတာလျိုၚ်လတူဂကောံအလဵုအသဳတံကီု စိုတ်ဟွံခိုဟ်ဗွဲမလောန်ရောၚ် သမ္မတ လဳဂျေဝ်မျံၚ်ဟီုရ။
ဆဂး ပရေၚ်ဒဒှ်ဏံဂှ် သွက်ဂွံလီဠာန်ပေါဲရုဲမာဲ ပရေၚ်ပံၚ်တောဲကာပၞုက် ကၠောန်လဝ်ဟွံသေၚ်တုဲ ဒှ်မံၚ်ပြသၞာ ဆေၚ်စပ်ကဵု ဂုဏ်သိက္ခာ ဒဳမဝ်ကရေဇြဳရောၚ် ညးသ္ဂးရ။
ပရေၚ်ဏံဂှ် ဒှ်ပရေၚ်ဖံက်ပကဝ်အခေါၚ်အရာ ညးကဵုလဝ်မာဲတံ ဇၞော်ကဵုဇြဟတ်ရောၚ် သမ္မတ ဟီုလဝ်ရ။
Ref:AFP