မနဳလာ၊ ဂျူလာၚ် ၂၃
သ္ကိုပ်ဝန်ဇၞော်ချုပ်သေံ အနုတေၚ် ချာန်ဗဳရာကူလ် ကေုာံ က္ဍိုပ်သ္ကိုပ်ဗၟာ မေန်အံၚ်လှိုၚ်တံ ပ္ဍဲအဝ်ဂတ် ၆-၇ ဏံ ဆဵုဂဗအာ အပ္ဍဲဍုၚ်ၜၚ်ကံက်ရောၚ်ဂှ် ဝန်ဇၞော်ပရေၚ်ဍုၚ်သအာၚ်သေံ ဟီုလဴကဵုလဝ် ဌာန်ပရိုၚ် AFP ပ္ဍဲဂျူလာၚ် ၂၁ ရ။
သွက်ဍုၚ်ဗၟာ ဂွံကလေၚ်လုပ်စိုပ်အာ အကြာပွဳဗွိုၚ်ကလုတ်တမာန် ပရေၚ်ဍုၚ်ကွာန်တံမာန် ဗီုလဵု ဂွံဖန်ဖက်ရေၚ်တၠုၚ်အာ ခိုဟ်အိုတ်ရောဂှ် ပ္ဍဲဍုၚ်မနဳလာ သဳကၠဳပံက်သြိုဟ် သောင်ကလးလဝ်ကဵု ဝန်ဇၞော်ပရေၚ်ဍုၚ်သအာၚ်အာသဳယာန်တံတုဲ ကြဴနူဂှ် ပရူပရာ ပရေၚ်ဆဵုဂဗသာ်ဏံဂှ် ဝန်ဇၞော် သဳဟာသက် ဖူအတ်ကက်ကွေ သ္ပလဝ်ဒတန်ရောၚ်။
ၜိုန်ရဆက်ဒှ်အာမံၚ် ကောန်ဂကောံအာသဳယာန်ဏီလေဝ် ပ္ဍဲဍုၚ်ဗၟာ ကြဴနူဒပ်ပၞာန်သီအဝဵု ၂၀၂၁ တုဲဂှ် နူကဵုကောံဓရီုအဓိကအာသဳယာန်တံ ပါဲပတိတ်လဝ် နူဝိုၚ်ကောံဓရီု ဗွဲမလုပ်သၞောဝ်တံဂှ် ရောၚ်။
အပ္ဍဲကဵုဍုၚ်ဗၟာ ပေါဲပၞာန်အပ္ဍဲဍုၚ်က္တဵုဒှ်ကၠုၚ်ဂၠိၚ်သ္ၚောဲတံကီု ပယျဵုဆက်စပ်နွံမံၚ်ဇမၠိၚ်ကီု၊ သီုကဵုဒဒုၚ်လဝ်တဲ ညးဂြိပ်ဒဴဘဲပၞာန်ပြကောဋိကိုတ်ပြၚ်ၚ်နွံကီုတုဲ၊ နူလပါ်သေံတံ က္ဍိုက်ပ်ဂစာန်ကၠောန်အာမံၚ် ညံၚ်ဍုၚ်ဗၟာ ဂွံကလေၚ်ပါလုပ်ကၠုၚ် အပ္ဍဲအာသဳယာန်ပၠန်ရောၚ်။
ဆဂး ပ္ဍဲအကြာဍုၚ်နိဂီု ကောန်ဂကောံအာသဳယာန်တံဂှ်လေဝ် စပ်ကဵုပရေၚ်ဍုၚ်ဗၟာတုဲ ပရေၚ်လစွံစိုတ်ဒကးဒၟံၚ် ဇြိုဟ်ဟ်နက်က် ဆက်နွံမံၚ်ဖိုဟ်ရ။
နူကဵုက္ဍိုပ်သ္ကိုပ်သီအဝဵုမွဲ ဒှ်ကၠုၚ်သမ္မတ မေန်အံၚ်လှိုၚ် ရန်လဝ်သွက်ဂွံအာဍုၚ်သေံဏံဂှ် ဒှ်နဲကဲလုက်စုက်အာ ဂၠံၚ်ၜါလပါ်ရောၚ် ဝန်ဇၞော် သဳဟာသက် ဟီုလဴကဵု ဌာန်ပရိုၚ် AFP ပ္ဍဲဂျူလာၚ် ၂၁ ရ။
ပရေၚ်ဒုဟ်စရိုတ်တတ်ကၠောံၜက်ပယျဵု၊ ဂကောံကျာဖျ (ဂကောံလီသြန်အန်လာၚ်) ကေုာံ ပြသၞာဂဥုဲၜူမာဲတံ ညံၚ်ရဴကိစ္စ ဒးဇီုကပိုက်မံၚ်ကဵုဇြဟတ်ဟရိုဟ် အကြာသီုၜါဍုၚ်တံဂှ် နွံမံၚ်ရောၚ် ညးသ္ဂးရ။
ပရေၚ်သေံတံ ရေၚ်တၠုၚ်ဖန်ဇန်မံၚ်သာ်ဏံဂှ် ဒှ်အဓိပ္ပါယ် ညံၚ်ကဵုတးပါဲထောံ တၚ်တုပ်စိုတ်ဘုံအာသဳယာန် ၅ တၚ် ဟွံသေၚ်ဂှ်လေဝ် ညးဟီုဗပေၚ်လဝ်ရ။
ပ္ဍဲအခိၚ်ဆဵုဂဗလဝ် ကုဝန်ဇၞော်ပရေၚ်ဍုၚ်သအာၚ်ဗၟာ ဥူတေန်မံၚ်သွိုယ် ဟွံလံတုဲကၠုၚ်ဏံ ပ္ဍဲဍုၚ်ၜၚ်ကံက်ဂှ် အကာဲအရာပရေၚ်တောတက်တိုန်ဂှ် ဗီုလဵုဂွံၜတ်အာပၞောန်ထေက်ရော ညံၚ်ဂွံချပ်ဗ္စာအာဂှ် နူကဵုဝန်ဇၞော်ပရေၚ်ဍုၚ်သအာၚ်အာသဳယာန်တံ အာတ်မိက်လဝ်ရောၚ် သဳဟာသက် သ္ဂးရ။
ယဝ်ရအလဵုအသဳဗၟာ ကဵုအခေါၚ် ညးစၞးတၟေၚ်အာသဳယာန် ဆဵုဂဗကဵု ဒဝ်အံၚ်သာန်သုကျဳမ္ဂး ပရေၚ်ဏံဂှ် အကာဲအရာပရေၚ်တောတက်ရောၚ် ဟီုဂးမာန်ဟာ ၊ ပရေၚ်ပကီုပရာတ်တံ ယအ်စှ်ေအာမ္ဂး ပေါဲဗတိုက်မွဲဒမြိပ်ပယျဵု သေံ-ဗၟာတံ ယအ်စှ်ေအာမ္ဂး ကော်စအာ အကာဲအရာတောတက်မာန်ရောၚ် သဳဟာသက် သောင်ကလးလဝ်ရ။
နူကဵုပိုဲတံဂှ် နကဵုနတဲစှ်ေစှ်ေ ဒးရေၚ်တၠုၚ်အာတုဲ ပရေၚ်အရာအိုတ်ဿီုတံဂှ် ဆၜိုတ်မွဲဗ္တံဓဝ် က္တဵုဒှ်ကၠုၚ်မာန်ဟွံသေၚ်ပုဟ် ညးဟီုရ။
ဟိုတ်နူ ကၠောန်ဗဒှ်လဝ် ပေါဲရုဲမာဲ ပ္ဍဲဍုၚ်ဗၟာတုဲ အကြာဂကောံရပ်လွဟ်ကောန်ဍုၚ်အရၚ်တံကီု ဂကောံဇြဟတ်ဒဳမဝ်ကရေဇြဳ ရဲဒစဵုဒစးတံကီု သွက်ဂွံကၠောန်ပေါဲသဳကၠဳတံဂှ် ဂၠံၚ်ဍာန်ပံက်အာရောၚ် စၟဳလဝ်ရောၚ် ညးဟီုဗပေၚ်လဝ်ရ။
ပရေၚ်သဳကၠဳ ကဵုဂကောံရပ်လွဟ်ကောန်ဍုၚ်အရၚ် နွံမံၚ်ပယျဵုသေံတံ ညံၚ်ဂွံအံၚ်ဇၞးစိုပ်အာဒတုဲမာန်ဂှ် ပိုဲတံရီုဗၚ်ကဵုမာန်ရောၚ် သာ်ဝွံလေဝ် ညးသ္ဂးရ။
နူကဵုအာသဳယာန် သွက်ဂွံခါန်ကၞက်အာ ညးစၞးတၟေၚ်ဍာ်ဇမၠိၚ် ဆေၚ်စပ်ကဵုပရေၚ်ဍုၚ်ဗၟာမွဲတၠဂှ် အဃောချပ်ဗ္စာမံၚ်နွံတုဲ၊ နကဵုသၞောတ်လၟေၚ်အလန်ဂှ် ဟွံစိုပ်တရဴကွေံကွေံပုဟ် ဝန်ဇၞော်ပရေၚ်ဍုၚ်သအာၚ်ဖိလေတ်ပိုၚ် ဟီုလဝ်ရ။
Ref:AFP