ဇင်မာဲ၊ ဂျူလာၚ် ၂၅
အပ္ဍဲဍုၚ်သေံ ဇၚ်မာဲ ကျာ်ဝါတ်သဳရိသာမ် ကော်ခဴစကျာ်သြန်ဂှ် ညးတြုံတံဟေၚ် ဂွံအခေါၚ်လုပ်ရောၚ် ဗီုရုပ်တာဒၞာထမံက်စွံလဝ် ပ္ဍဲလပါ်မ္ၚးကျာ်ဂှ် ရဲအာတရဴဂၠးကဝ်မွဲတၠ ဆာဲတြးပရအ်ဏာလဝ် ပ္ဍဲဇာဖိုၚ်မှာဇန်တံတုဲ လ္တူအန်လာၚ်ဂှ် ရမျှာၚ်ဟီုဂး ပရေၚ်ညဳသၟဟ် အကြာတြုံ-ဗြဴတံ မံက်တိုန်ကၠုၚ် ဇၞော်ကဵုဇြဟတ်ရ။
အပ္ဍဲတၚ်ကဵုသမ္တီ သွက်ဂွံလုပ်အပ္ဍဲကျာ်အူဗိုသအ်ဂှ် သီုညးတြုံ သီုညးဗြဴတံ ဒးရာန်စၟတ်တဲအခေါၚ်လုပ်ဗွိုၚ်ဝၚ်ကျာ်ဂှ်ရောၚ် ၜိုန်ရထမံက်လဝ်ကီုလေဝ် ညးတြုံတံဟေၚ် ဂွံလဝ်အခေါၚ်လုပ် စၟတ်ပိုၚ်ခြာလဝ် မဒှ်ရ။
တာဒၞာလဝ် သွက်ညးဗြဴတံ ဂေတ်ဂေၚ်အာကၠုၚ် အပ္ဍဲဒၞာဲဗွိုၚ်ဝင်မ္ၚးကျာ်ဂှ်တုဲ လပါ်အပ္ဍဲဂှ်လေဝ် ရံၚ်အာနူကဵုဖုၚ်ဟေၚ် ဂွံအခေါၚ်လ္ၚောဝ် မဒှ်ရ။
ပရေၚ်ပါ်တြးဆာဲပရအ်လဝ် လတူဇာဖိုၚ်မှာဇန် X ဂှ် လၟိဟ်မၞိဟ်ဗဵုလဝ် နွံ ၄ ဒသမ ၅ ပြကောဋိကိုတ်တုဲ ဒးဇီုကပိုက်မံၚ်ကဵု ပရေၚ်ပါ်ပါဲ ဟီုဂးပျုတ်ဗဒက် ညးသုၚ်စောဲဇာဖိုၚ်မှာဇန် အလုံဂၠးကဝ်တံရ။
လ္တူညးမိက်ဂွံလုပ်လ္ၚောဝ်ကျာ်တံဂှ် ၜိုန်ရ ကံက်ကေတ်လဝ်ၚုဟ်မး ညးတြုံ-ညးဗြဴတံတုပ်တုပ်ကီုလေဝ်၊ သွက်ညးဗြဴတံဂှ် ဟွံကဵုလဝ်အခေါၚ်လုပ်ပုဟ် ဟိုတ်နူတာဒၞာလဝ်နွံတုဲ စပ်ကဵုပရေၚ်တုပ်သၟဟ် တြုံ-ဗြဴတံတုဲ အလုံဂၠးကဝ် ဒှ်ပရေၚ်ကယျာန်ဓဝါတ် ဟီုဂးညးသ္ကံ မဒှ်ရ။
လိက်လလောၚ်တြး ကျာ်ဏံ ချူလဝ်ဘာသာအၚ်ဂလိက်ဂှ်လေဝ် ပရေၚ်ပါ်ပါဲတံ သၠုၚ်တိုန်မံၚ်ကီုရ။
ပရေၚ်တာဒၞာဏံဂှ် တာဒၞာလဝ် ပရေၚ်သွက်ဂွံဒဂေတ်ဗက်ဒလေံဗတောန်ဍောၚ်ဓရ်ကျာ်တံ ဟွံသေၚ်တုဲ၊ ဒှ်ဟိုတ်နူဝါဒကွေတ်အပ္ဍဲဒေသ ဆက်စပ်မံၚ်ကဵု အခိၚ်သၟိၚ်လာန်နာတေံရောၚ် ကောန်ဍုၚ်သေံ ဗွဲမဂၠိုၚ်တံ ဟီုရ။
ကွေတ်ဝါဒတံဏံဂှ် ဆက်စပ်မံၚ်ကဵု ကွေတ်ဟိန္ဒူတံကီုရောၚ် ညးလ္ၚတ်ပရေၚ်သာသနာတံ သ္ဂးရ။
အခိၚ်ညးဗြဴတံ ဓမ္မတာကၠုၚ်မံၚ် ဟိုတ်နူဟွံသ္အးဇ္ၚးတုဲ အခေါၚ်လုပ်အပ္ဍဲဝင်ကျာ်ဟၟဲရောၚ် ရဲရှ်ေသှ်ေဘာသာဟိန္ဒူလ္ၚဵုတံ တာဒၞာလဝ်အိုတ်ရ။
စပ်ကဵုပရေၚ်တာဒၞာသာ်ဏံတုဲ အရာဏံဂှ် ဟွံဆေၚ်စပ်ကဵု ဂလာန်ပရေၚ်ဒလေံဗတောန်ဍောၚ်ဓရ်ဗုဒ္ဓဘာသာတုဲ ဆေၚ်စပ်ကဵု တၚ်စၟတ်ပိုၚ်ခြာအပ္ဍဲဒေသဂှ်ဟေၚ် ညးသုၚ်စောဲဇာဖိုၚ်မှာဇန်သေံတံ ချူလဝ်တၚ်စၟတ်သမ္တီအိုတ်ရ။
Ref: Khaosodenglish