ဖာပန်၊ ဂျူလာၚ် ၂၅
အပ္ဍဲတွဵုရးကရေၚ် ခရိုၚ်ဖာပန် ကရောၚ်ပၞာန်ဗၟာဇြဟတ်မၞိဟ်ကဵုလ္ၚီ ထပက်မံၚ်ကရောၚ်ပၞာန်ဂှ် ဒးလဝ်ဂိလောန်အာတုဲ ဆက်တိုန်ဂတ ဟွံမာန်တုဲ၊ အကြာကွာန်တံဂှ်လေဝ်ဆက်ကြဳထောံဖျေံမံၚ်ဗုမ် နူကဵုၜၚ်ကျာအဆက်က်ရောၚ် ဂွံတီကေတ် နူကဵုရိုဟ်ကၞက်ပရိုၚ် ဒေသကဵုဂကောံမှာဇန်ကရေၚ်တံရ။
သွက်ဂွံကလေၚ်ထိၚ်ဒဝ်အာ အတိုၚ်မွဲဒမြိပ်ဂၠံၚ်ကွဳစက် ဖာပန်-ကမမံၚ် ကေုာံ သွက်ဂွံအာကဵုအရီုဗၚ်ပရေၚ်ပၞာန် ကုဗျူဟာဖာပန်ဂှ် စနူဂိတုမေတုဲကၠုၚ်တေံ ဒပ်ပၞာန်ဇြဟတ် ၂၀၀၀ ပြၚ်ၚ်တံ စထပက်ကၠုၚ်ကရောၚ်ပၞာန် နူကဵုဍုၚ်ကမမံၚ်တုဲ၊ အခိၚ်ဂှ်တှ်ေ စိုပ်မံၚ်ဗ္ဒာဲကရပ်ကွာန်ဖာလုၚ်လေဝ် လပါ်လတူကတိုင်တိ တေံရ။
ကရောၚ်ပၞာန်ဗၟာထပက်လုပ်ကၠုၚ်တံဂှ် နူကဵု KNLA မဟာဒပ် ၅ ကေုာံ ဂကောံဇြဟတ်ပၠန်ဂတးတံ ဗက်ဗတိုက်မာတ်ဆိုအ် အကြာဂၠံၚ်တံဂှ်ရ ကရောၚ်ပၞာန်ဗၟာဟိုတ်နူဒးလဝ်ဘဲဂိလောန်အာကီု ဆက်တိုန်ဂတတေံလေဝ်ဟွံမာန်တုဲ ဆက်နွံမံၚ်အကြာပွဳဗွိုၚ် ကွာန်ဖာလုၚ်လေဝ်ဂှ်ရောၚ် ရိုဟ်ကၞက်ပရိုၚ်ဒေသ သ္ဂးရ။
အကြာပွဳပွိုၚ်တ္ၚဲတံဏံ သွက်ဂွံဗပေၚ်ထပ်ဇြဟတ်ပၞာန်ပၠန်ဂှ် နူကဵုဗျူဟာကမမံၚ် ကွဳစက် ၂ မ ထပ်ပလံၚ်နၚ်လဝ် ကောန်ပၞာန်တၟိတံနွံတုဲ၊ သွက်ဂွံပလံၚ်ဗ္စိုပ်ဏာကပေါတ်စၞစဇွောံမတံမာန်ဂှ် ပလေဝ်စမံၚ်ရောၚ် ဂွံတီကေတ် နူရိုဟ်ကၞက်ပရိုၚ်ဒေသရ။
ကရောၚ်ပၞာန်ဗၟာထပက်လုပ်ကၠုၚ်မံၚ် သွက်ဂွံအာကဵုအရီုဗၚ်ဗျူဟာဖာပန်တံဂှ် ဟိုတ်နူ KNLA မဟာဒပ် ၅ ကေုာံ ဂကောံဇြဟတ်ပၠန်ဂတးတံဗက်အာဗတိုက်မံၚ်တုဲ ညးတာလျိုၚ်တံကီု သီုကဵုကောန်ပၞာန် ၁၀၀ ပြၚ်ၚ် ချိုတ်ဒးလဝ်ဘဲဂိလောန်အာဂှ်ရ အကြာကွာန်မွဲဒမြိပ်ဂၠံၚ်ကွဳစက်တံဂှ် နူကဵုၜၚ်ကျာ ဆက်ကြဳဖျေံမံၚ်ဗုမ်ဇၞော်ကဵုဇြဟတ်ရောၚ် ညးရိုဟ်ကၞက်ပရိုၚ်ဂှ် ဟီုရ။
အတိုၚ်လိက်လလောၚ်တြး ဂကောံပရေၚ်မှာဇန်ကရေၚ် KPSN လလောၚ်ပတိတ်လဝ်မ္ဂး အပ္ဍဲခရိုၚ်ဖာပန် ကွာန် ၂ ကွာန်ဂှ် နူကဵုဒပ်ပၞာန် သုၚ်စောဲလဝ်ၜၚ်ကျာဂျက် ကြဳဖျေံလဝ်ဗုမ်ဆက်က်တုဲ ညးဍုၚ်ကွာန် ၄ တၠ ဒးလဝ်ဝပ်တုဲ၊ သ္ၚိဌာန်ကြပ် ၃၀ မ ဘာဗတောန်လိက် ၁ မ ဒးဒုၚ်လီုလာ်အာလဝ်ရောၚ် ဂွံတီရ။
ဂကောံဇြဟတ်ပၠန်ဂတး KNLA မဟာဒပ် ၅ တံ ဂေတ်ဗိုၚ်မာတ်ဆိုအ်လဝ် ဗွိုၚ်ပွဳပွူဗျူဟာဖာပန်ဂှ်ရ ပေါဲဗတိုက်ၜါလပါ်ဆက်ဒှ်မံၚ်တုဲ၊ ညံၚ်ဗျူဟာဟွံစှ်ေအာဂှ် နူကဵုဒပ်ပၞာန်သုၚ်စောဲပရေၚ်အရီုဗၚ်ပၞာန်ကျာလၟိုန်တုဲ ကပေါတ်စၞစဇွောံမတံဂှ်လေဝ် နူကဵုၜၚ်ကျာဟေၚ် ဖျေံပလံၚ်ဗစိုပ်ကဵုမံၚ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media