ဗြဝတဳ၊ ဂျူလာၚ် ၂၅
အပ္ဍဲကဵုတိဍာ်ပရေၚ်အုပ်ဓုပ် DKBA ဒေသကျံက်ခက် ပွိုၚ်ဍုၚ်ဗြဝတဳ တွဵုရးကရေၚ်ဂှ် ဟိုတ်နူအကာဲအရာ ပရေၚ်ဂီုကၠီုတိဍာ် ဂးတုဲ သၟာကမၠောန်ကျာဖျ ဗွဲမဂၠိုၚ်တံ ဒးပြံၚ်ပဆုဲအာဒၞာဲ လပါ်ဒၞာဲတၞဟ်ဟ်တံနွံမံၚ်ရဂှ် နူကဵုရိုဟ်ကၞက်ပရိုၚ်အပ္ဍဲဒေသ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲဒေသကျံက်ခက် လပါ်သၠုၚ်ကျာဍုၚ်ဗြဝတဳ ဒၞာဲဒေသညးတာလျိုၚ်အဆံၚ်သၠုၚ် DKBA ဒုသ္ကိုပ်ပၞာန် သာၚ်ကျဝ်လှ ထိၚ်ချုက်လဝ်ဂှ် ကမၠောန်ကျာဖျနွံမံၚ်ဗွဲမဂၠိုၚ်တုဲ ညးတန်တဴနွံမံၚ် အပ္ဍဲဒၞာဲကမၠောန်ကျာဖျတံဏံသီုဖအိုတ် ညံၚ်ဂွံတိတ်အာဂှ် နူကဵု DKBA လလောၚ်ပတိတ်လဝ် အမိၚ်နွံရ။
ဟိုတ်နူ ဒးဒှ်ဂဝိၚ်ကဵုဘဲပၞာန်ကျာ ဒပ်ပၞာန်ဗၟာတံတုဲ နူကဵုဒၞာဲကျာဖျအပ္ဍဲဒေသကျံက်ခက်ဏံ ကောန်ဍုၚ်သအာၚ်တံကဵုကောန်ဍုၚ်ကြုက် နွံမံၚ်တံဂှ် ဒပ် DKBA ဖန်ဇန်ပြံၚ်ပဆုဲကဵုမံၚ် ဇရေၚ်ဒေသ သုၚ်သဳမျာၚ် ဒၞာဲဌာန်ဂအုပ်ဗဟဵု DKBA လပါ်သၠုၚ်ကျာဒေသကျံက်ခက်တေံရောၚ် ဂွံတီကေတ်ရ။
ဟိုတ်နူဖေက်ဘဲပၞာန်ကျာ ဒပ်ပၞာန်ဗမာ ကဵုပြံၚ်ပဆုဲလဝ်ကျာဖျတံဏံတုဲ ပါဲနူဂှ်ဟိုတ်နူပရူပရာတၞဟ်ဟ်တံလေဝ် ဒှ်မာန်ကီုတုဲ၊ ပ္ဍဲကဵုဒေသကျံက်ခက်ဂှ် အကြာပွိုၚ်တ္ၚဲတံဏံ နူကဵုဒပ်ပၞာန်ဗၟာကၠောန်လဝ် ပရေၚ်ပန်ဗတိုက်ဗလးကျာနွံမံၚ်ရောၚ် ရိုဟ်ကၞက်ပရိုၚ်ဒေသ သ္ဂးလဝ်ရ။
စပ်ကဵု ပရေၚ်ကဵုပြံၚ်ပဆုဲထောံဒၞာဲ ကမၠောန်ကျာဖျ အပ္ဍဲဒေသကျံက်ခက်ဂှ်တုဲ စဵုကဵုစိုပ် ဂျူလာၚ် ၂၄ ဂှ် နူဗဟဵု DKBA လလောၚ်တြးလဝ်ပရိုၚ် ဟၟဲဏီပုဟ်။
ဒပ်ပၞာန်ကရေၚ်ပတုဲဖဵုဒဳမဝ်ကရေသဳ DKBA ကေုာံ ကမ္မတဳပ္ညဳပ္ညပ် ထမံက်ရုပ်ရဴ ညဳသၟဟ်ဂကူကဵုပရေၚ်ၜိုဟ်လလမ် နူဒပ်ပၞာန်ဗၟာတံ ပ္ဍဲဂျူလာၚ် ၉ တေံ ဆဵုဂဗလဝ်ညးသ္ကံ ပ္ဍဲကဵုနေပျဳဒဝ်တုဲ၊ ကုဂကောံ DKBA တံဂှ် ညံၚ်ဟွံဂွံဆေၚ်စပ်ကဵုကမၠောန်ကျာဖျဂှ်လေဝ် နူလပါ်ဒပ်ပၞာန်ဗၟာကဵုလဝ်သမ္တီရောၚ် ဂွံတီရ။
ကြဴနူ ညးတံၜါလပါ်ဆဵုဂဗသဳကၠဳလဝ်တုဲ ဟွံပေၚ်ၜါသတ္တဟဏီဂှ် ပ္ဍဲဒေသကျံက်ခက်တိဍာ် DKBA ထိၚ်ချုက်လဝ် ဒၞာဲကမၠောန်ကျာဖျကြုက်တံဂှ် ပရေၚ်ဒပ် DKBA တံ ပြံၚ်ပဆုဲဒၞာဲ ဒှ်ကၠုၚ်လဝ်ရ။
ပြဟ်ဟ်ဏံ လပါ်သၠုၚ်ကျာဍုၚ်ဗြဝတဳ ဒေသဖလူကေုာံ မေန်လက်ပါန် ဟွံသ္ၚောဲကဵုဒေသကျံက်ခက်တံဂှ် ဒပ်ပၞာန်ဗၟာထပက်မံၚ်ကရောၚ်ပၞာန်ကု ဂကောံဇြဟတ်ပၠန်ဂတး KNLA မဟာဒပ် ၆ တံ စဵုကဵုစိုပ် ဂျူလာၚ် ၂၄ ဂှ် ပေါဲဗတိုက်ဇၞော်ကဵုဇြဟတ်ဆက်ဒှ်မံၚ်တုဲ နူဒပ်ပၞာန်ဗၟာလေဝ်ကြဳဖျေံမံၚ်ဗုမ် နကဵုၜၚ်ကျာဇၞော်ကဵုဇြဟတ် နွံမံၚ်ရောၚ်။
ပရိုၚ် – သြၚ်လောန်တိုၚ်မ်
Photo – Reporter