ကွာလာလမ်ပူ၊ ဂျူလာၚ် ၂၆
အလဵုအသဳမလေယှာ စၞောန်ပ္ညုၚ်လဝ် ရုၚ်သၟိၚ်မဟာ ကုလသမဂ္ဂ စပ်ကဵုညးဒဒိုက် (UNHCR) ဗွဲမပြဟ် သွက်ဂွံဒေါအ်ထောံ ပရေၚ်ပတိုန်သ္ပစၟတ်သမ္တီ ညးတၠဒဒိုက်တၟိသီုဖအိုတ်တၟိ သ္ဂးရ။
ပရေၚ်ဏံဂှ် အလဵုအသဳမလေယှာ သွက်ဂွံပြံၚ်လှာဲအာ သၞောတ်ပရေၚ်စဳရေၚ်ပြုပြေၚ် ညးတၠဒဒိုက်လၟိဟ်လ္ၚီဗွဲမဂၠိုၚ် အလုံမွဲဍုၚ်ဂှ် ဒှ်နဲဗျူဟာလှဲလး မွဲသ္ကုတ်မွဲသ္ကူရောၚ် ဂွံတီကေတ်ရ။
ဟိုတ်နူတင်သ္ဂုတ်သွာတ်ဏံတုဲ နူကဵုအလဵုအသဳမလေယှာ ပရေၚ်ပကောံသ္ဇိုၚ်မူတၚ်နၚ် သ္ပစၟတ်သမ္တီ အလဵုဇကုပူဂိုလ် ညးတၠဒဒိုက် (DPP) တံတုဲ နူဂှ်မွဲကဆံၚ် စပ်ကဵုပရေၚ်ပကောံတၚ်နၚ် ညးဒဒိုက်တံမ္ဂး ကလိဂွံအခေါၚ်ထိၚ်ချုက်မာန်အာ တိုက်ရိုက်ရောၚ်။
အတိုၚ်သ္ဇိုၚ်မူ DPP တၟိမ္ဂး နူကဵုညးတာလျိုၚ် မလေယှာတံ စပ်ကဵုတၚ်နၚ်စၟတ်သမ္တီ ဂကောံဒုၚ်အကြာမွဲမွဲ ကဵုကၠုၚ်လဝ်ဂှ် ဒးဗ္ဒဗ္ဒာဲမံၚ်ဟွံသေၚ်ရပုဟ် ဒုဝန်ဇၞော်ပရေၚ်ဍုၚ်သအာၚ် လူကာနေတ်မာန် အဝန် သဝ်နဳ ဟီုကဵု စၠတ်ထဝ်လ္တူရ။
အတိုၚ်ဌာန်ပရိုၚ် Free Malaysia Today ထမံက်လဝ်မ္ဂး အလဵုအသဳမလေယှာဂှ် လၟေၚ်ကမၠောန်စၟဳစၟတ် သ္ပဒတန်တံဂှ် ကောပ်ကာဲအာတိုက်ရိုက်တုဲ၊ ပရေၚ်ကေၚ်ကာအိုတ်သီု ဆေၚ်စပ်ကဵုညးတၠဒဒိုက်တံဂှ်လေဝ် ရပ်စပ်အာ တိုက်ရိုက်ရောၚ် ဂွံတီကေတ်ရ။
တၚ်သ္ပစၟတ်သမ္တီ အခေါၚ်ဂွံဒှ်ညးတၠဒဒိုက် ပရေၚ်ကိတ်ညဳကဵု ဟွံကိတ်ညဳတံဂှ်လေဝ် စၟဳစၟတ်အာ တေၚ်ၚ်ဂြတ်တ်ရောၚ် သာ်ဝွံ ဒုဝန်ဇၞော်ပရေၚ်ဍုၚ်သအာၚ် ဟီုရ။
သွက်ဂွံတာဒၞာ ပရေၚ်ဆုဲပြံၚ်မံၚ်စံၚ်တန်တဴ ဗီုပြၚ်ဓမ္မတာဟွံသေၚ်တံဂှ် ကဵုဂကောံအေဂျေန်သဳ မၚ်မွဲဥပဒေတံဂှ် ပံၚ်တောဲရေၚ်တၠုၚ်အာ ကြပ်ပ်ရောၚ် သာ်ဝွံလေဝ် ညးဟီုရ။
ပြဟ်ဟ်ဏံ အလဵုအသဳမလေယှာ စဳဇန်လဝ် သွက်ဂွံကလေၚ်ပလံၚ်ဖျဴ ကောန်ဍုၚ်ဗၟာ ၅၀၀၀ တၠ ဒးဒုၚ်ရပ်ထိၚ်လဝ် ပ္ဍဲသေန်တာ လဝကတံဂှ်ရ။
သွက်ဂွံပလံၚ်ဖျဴဂှ် စဳဇန်လဝ် သုၚ်စောဲစကာအာ ၜၚ်ပၞာန်ဍာ် မလေယှာတံကီုလေဝ် ကုညးတာလျိုၚ်ဗၟာတံ သွက်ဂွံဒုၚ်တဲဂှ် ဆက်သဳကၠဳမံၚ်ဖိုဟ်ရောၚ် ဂွံတီရ။
ပ္ဍဲမလေယှာ ပရေၚ်ဗတိုက်ပလီု ညးဆုဲပြံၚ်မံၚ်စံၚ် လိက်သက်သဳဟၟဲတံကဵု အစဳဇန် သွက်ဂွံကလေၚ်ပလံၚ်ဖျဴ ညးတၠဒဒိုက်ဗၟာတံ ဗီုဏံဂှ် အခိၚ်ကိတ်ညဳမံၚ် ညးသ္ကံရ။
ပ္ဍဲဂျူလာၚ် ၁၃ ဂှ် နူကဵုဇြဟတ်ဂကောံဂီုကၠီု ၈၇၀ တၠတံ ပ္ဍဲ ၁၈ ဒၞာဲ ပံၚ်တောဲလုပ်သလိပ်လဝ် အလုံမွဲဍုၚ်ရ။
အပ္ဍဲပရေၚ်လုပ်သလိပ် ကော်ခဴစ အဝ်ပရာသဳဂှ်တှ်ေ ရဲလိက်စံၚ်သက်သဳဟၟဲ ကောန်ဍုၚ်ဗၟာ ၁၀၁ တၠဂှ် ဂကူချေၚ် ၃၀ တၠပါလုပ်တုဲ အပံၚ်ဖအိုတ် ကောန်ဍုၚ်သအာၚ် ၅၀၃ တၠ ဒးဒုၚ်ရပ်လဝ်ရောၚ်။
Ref:DVB