ပလဝ်၊ ဂျူလာၚ် ၂၆
အပ္ဍဲရးတနၚ်္သဳ ပွိုၚ်ဍုၚ်ပလဝ် ဒၞာဲကဵုဂၠံၚ်ပန်သွာၚ် ကွာန်တံၚ်ယာကာန်ဂှ် ညးဗြဴမကပှ်ဟမိက်ပလၚ်မွဲတၠ ဟိုတ်နူမါၚ်တပ်တိခတိုဟ်တုဲ ဒးချိုတ်အာလဝ်ဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုဂျူလာၚ် ၂၃ တုဲကၠုၚ်တေံ မိလှလှဝေ အာယုက် ၃၈ သၞာံ မံၚ်အရာပ်စၟတ် (၁) ဍုၚ်ပလဝ်ဂှ် သွက်ပရေၚ်ဗုၚ်ဂၞဴ ကၟိန်သ္ၚိဌာန်ညး အဟိန်ဗက်ကပှ်မံၚ် ဗူဍာ်ပလး၊ ခၞော်ဗူဍာ်ဂံက်က် ကေုာံ ခၞော်ဗူဗဳယာ နူဟမိက်ထောံကၠဟ်လဝ်တံဂှ်တုဲ လိုန်ဒးလဝ်မါၚ်တပ်တိရောၚ်။
ဟိုတ်နူလိုန်ဒးမါၚ် ခတိုဟ်အာတုဲ မိလှလှဝေ ဒးလဝ်ဝပ်ကဝေက်မါၚ် အလုံခန္ဓဇကုမွဲပြးဇးတုဲ အပ္ဍဲဒၞာဲဟိုတ်က္တဵုဒှ်ဂှ်ဟေၚ် လမျီုအိုတ်အာတုဲ ညးဒေသတံပလံၚ်ဗ္စိုပ်လဝ်ကဵု ဇရေၚ်ရုၚ်ဂဥုဲ ညးဍုၚ်ကွာန်ပလဝ် သ္ဂးရ။
ဒၞာဲမါၚ်ခတိုဟ်ဒကးလဝ် ဂၠံၚ်ပန်သွာၚ်ကွာန်တံၚ်ယာကာန် ပွိုၚ်ဍုၚ်ပလဝ်ဏံဂှ် ဒပ်ပၞာန်သီအဝဵုတံကီု ဂကောံဇြဟတ်ဒပ်ပၠန်ဂတးတံ ချဳဒရာၚ်အာကၠုၚ်မံၚ် ပ္ဍဲကဵုဒၞာဲဒေသတံဏံရောၚ်။
ဆဂး စပ်ကဵုပရေၚ်မါၚ်တပ်တိ ခတိုဟ်ထကးလဝ်တုဲ နူဂကောံသီုၜါလပါ်တံပတိတ်လဝ်ပရိုၚ်ဂှ် ဟွံဆဵုကေတ်ဏီပုဟ်။
ဟိုတ်နူမါၚ်တပ်တိခတိုဟ်လဝ် ပ္ဍဲကဵုဂၠံၚ်ပန်သွာၚ်ကွာန်တံၚ်ယာကာန်တုဲ ညးဒေသတံသွက်ဂွံအာကၠုၚ် ပ္ဍဲအကြာ ပွဳဗွိုၚ်တံဂှ်လေဝ် ဒှ်မံၚ်ဒွိၚ်ပရေၚ်နာနာသာ်ရောၚ် သ္ဂးရ။
ပ္ဍဲဍုၚ်ဗၟာ ကြဴနူဒပ်ပၞာန်သီအဝဵုတုဲ အပ္ဍဲပရေၚ်ပဋိပက္ခရပ်လွဟ်တံမ္ဂး ဟိုတ်နူမါၚ်တပ်တိတုဲ ပ္ဍဲဂၠးတိဂှ် ဒှ်ကၠုၚ်လဝ် ရးနိဂီုဍုၚ်ညးဍုၚ်ကွာန် ချိုတ်ဂၠိုၚ်အိုတ်ရ သာ်ဝွံ ဂကောံမၚ်ရံၚ်ပရေၚ်မါၚ်တပ်တိတံ ကဵုလဝ်သမ္တီ ပတိတ်လလောၚ်လဝ်ရ။
ပရိုၚ် – သြၚ်လောန်တိုၚ်မ်
Photo – Social Media