မတ်မလီု၊ ဂျူလာၚ် ၂၆
အပ္ဍဲအရာပ်ဇုၚ်ကွတ်စက် ဍုၚ်မတ်မလီု တွဵုရးမန် ဆေၚ်သွံကၠေၚ်စက် “ပျဳသိုဝ်မိုဝ်” ဂှ် ဟိုတ်နူပရေၚ်သွံကၠေၚ်စက် ဟွံလုပ်သၞောဝ်ဂးတုဲ ကၟာတ်ထောံဆေၚ်ကေတ်လဝ်အရေဝ်ရောၚ် ရဲကြပ်ကဵုဒပ်ဗၠာဲသၟိၚ်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပ္ဍဲဂိတုဂျူလာၚ် ၂၃ တေံ ကၟာတ်ထောံဆေၚ် ကေတ်လဝ်အရေဝ် ဆေၚ်သွံကၠေၚ်စက် “ပျဳသိုဝ်မိုဝ်” သီုကဵုတၠဆေၚ်ကီု ပ္ဍဲဗ္ဒိုပ်ဗၠာဲသၟိၚ် ဇုၚ်ကွတ်စက်တံ ရပ်ထိၚ်စၟဳစၟတ်လဝ်ရောၚ် ဂွံတီရ။
ဟိုတ်နူဆေၚ်သွံကၠေၚ်စက် “ပျဳသိုဝ်မိုဝ်” ဒးဒုၚ်ကၟာတ်ထောံတုဲ ညးဒေသဇုၚ်ကွတ်စက်တံ သွက်ဂွံဂွံကၠေၚ်စက်ဂှ် ဒးဆဵုဂဗမံၚ်ကဵုအခက်အခုဲ ပရေၚ်ကၠေၚ်စက်ပိုတ်မံၚ်ရောၚ် သ္ဂးရ။
ပရေၚ်ကၟာတ်ထောံဆေၚ် “ပျဳသိုဝ်မိုဝ်” ဂှ်တှ်ေ ဟိုတ်နူသွံဏာလဝ်ကၠေၚ်စက် ၂၀ လေတ် ၆၈ စေဝ် ပလံၚ်လဝ်ဍုၚ်ဗြဝတဳတုဲ ဒးဒုၚ်ကၟာတ်ထောံရဂှ် ရဲကြပ်ကဵုဒပ်ဗၠာဲသၟိၚ်တံ ဟီုရ။
ပ္ဍဲဂိတုဂျူလာၚ် ၂၂ တေံလေဝ် ပ္ဍဲသကုတ်ဂၠံၚ် မတ်မလီု-ဘာအၚ် အရာပ်ညံၚ်ပေန်သိက် ဍုၚ်မတ်မလီုဂှ် နူကဵုဂကောံပံၚ်တောဲဗၠာဲသၟိၚ်တံ ရပ်စၟဳစၟတ်ကွဳစက်ဖ္ဍိုက်ကေတ်နၚ်လဝ် ကၠေၚ်စက်မွဲမ ကီုရောၚ်။
အခိၚ်ရပ်ဂွံကွဳစက်ဏံဂှ် ဆဵုညာတ်လဝ်ကၠေၚ်စက် ၂၀ လေတ် ၆၈ စေဝ် ရာန်ကေတ်နၚ်လဝ် နူဆေၚ် “ပျဳသိုဝ်မိုဝ်” ဏံတုဲ ကၠေၚ်တံဏံဂှ် နူကွာန်သာမည တွဵုရးကရေၚ်မွဲကဆံၚ် သွက်ဂွံသွံကဵုအာ လပါ်ဍုၚ်ဗြဝတဳတုဲ ရာန်ကေတ်နၚ်လဝ်ရောၚ် စၟဳစၟတ်ဆဵုညာတ်လဝ် သ္ဂးရ။
အပ္ဍဲပရူပရာ ပရေၚ်လၟေၚ်ဒဒှ်ဏံမ္ဂး နကဵုလိက်ပရေၚ်ထံက်ဂလာန်မွဲမွဲသာ် ဟွံပါကၠုၚ်တုဲ ညးဖ္ဍိုက်ကေတ်နၚ်လဝ် ကၠေၚ်စက် ကိုယာန်နိုၚ်ဥူ ဌာန်ဒၟံၚ်ဍုၚ်ဗြဝတဳဂှ် ရပ်စပ်ကေတ်လဝ်အရေဝ် နကဵုၝောံပိုဒ် ၃၇ ဥပဒေဆေၚ်စပ်ကဵု ကၠေၚ်ဍေၚ်ကေုာံ ကပေါတ်ကၠေၚ်ဍေၚ်တံတုဲ ချုက်စွံလဝ် အပ္ဍဲဗ္ဒိုပ်ဗၠာဲသၟိၚ် ဇုၚ်ကွတ်စက်ဂှ် ဂွံတီရ။
ပ္ဍဲဂျူလာၚ် ၁၉ တေံလေဝ် ပ္ဍဲကွာန်မုက်ပလေၚ် ပွိုၚ်ဍုၚ်ကျာ်ထဝ် တွဵုရးမန် ဆေၚ်သွံကၠေၚ်စက် “ထက်” ဂှ်လေဝ် ဟိုတ်နူပရေၚ်သွံကၠေၚ်စက် ဟွံလုပ်သၞောဝ်ဂးတုဲ ဂကောံအလဵုအသဳဒပ်ပၞာန် ကေတ်အရေဝ် ကၟာတ်ထောံလဝ်ကီုရ။
ပရိုၚ် – သြၚ်လောန်တိုၚ်မ်
Photo – CJ