မတ်မလီု၊ ဂျူလာၚ် ၂၆
အပ္ဍဲတွဵုရးမန် ကြဴနူကဵု ဂကောံအလဵုအသဳဒပ်ပၞာန် ကေတ်လဝ်အရေဝ်ကု ဆေၚ်သွံကၠေၚ်စက်လ္ၚဵုတံတုဲ ပ္ဍဲဗွဝ်ဖျာဒမၠုမ္ဂး ၚုဟ်ကၠေၚ်စက် ဍၚ်ဗက်သၠုၚ်တိုန်ကၠုၚ်မံၚ်ဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုဂျူလာၚ် ၁၉ တေံ ဟိုတ်နူသွံလဝ်ကၠေၚ်စက် ကုကွဳစက်လိုင်သေၚ် ဟွံမွဲဂးတုဲ ဂကောံအလဵုအသဳဒပ်ပၞာန် ကေတ်အရေဝ် ကၟာတ်ထောံ ဆေၚ်ကၠေၚ်စက် “ထက်” ပ္ဍဲကွာန်မုက်ပလေၚ် ပွိုၚ်ဍုၚ်ကျာ်ထဝ်ရ။
တုဲပၠန် ပ္ဍဲဂိတုဂျူလာၚ် ၂၃ တေံလေဝ် ဆေၚ်သွံကၠေၚ်စက် “ပျဳသိုဝ်မိုဝ်” ပ္ဍဲအရာပ်ဇုၚ်ကွတ်စက် ဍုၚ်မတ်မလီုဂှ်လေဝ် နကဵုတၚ်စောဲစပ် သွံကၠေၚ်ဟွံလုပ်သၞောဝ်ဂးတုဲ ကေတ်အရေဝ်ကၟာတ်ထောံပၠန် မဒှ်ရ။
ဟိုတ်နူဗက်ရပ်မံၚ် ဆေၚ်သွံကၠေၚ်ဇၞော်ဇၞော်တံကီု ဆေၚ်ဍောတ်တ် ဇိုၚ်ဂၠံၚ်တံကီုတုဲ ၚုဟ်ကၠေၚ်စက်သၠုၚ်တိုန်မံၚ်ရောၚ် ညးဒေသတွဵုရးမန်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“စပ်ကဵုကၠေၚ်ဂှ်တှ်ေ ပ္ဍဲဇိုၚ်ဂၠံၚ်တံ ဆေၚ်သွံမံၚ်ဗီုပြၚ်ဗွဝ်ဖျာဒမၠုဍောတ်တ်တံဂှ်လေဝ် ဗက်ရပ်မံၚ်အိုတ်ရ။ ညးလ္ၚဵုတံဂှ် ဟိုတ်နူဟွံမိက်ဒုၚ်ဒှ်ဒဒိုက်စိုတ် သွက်ဂွံအာကၠုၚ်လောဲသွာတုဲ ၚုဟ်မးဒးကဵုပဵုလေဝ်ပဵုဟဍေံ ဒၞာဲရာန်ဂွံလောဲတံဂှ် လၟုဟ်ဗက်ရပ်မံၚ်တုဲ ကၠေၚ်စက် ပိုတ်မံၚ်အိုတ်ယျ။ ယဝ်ရဒးဟီုသောင်သောင်မ္ဂး ၚုဟ်ကၠေၚ်လေဝ် တိုန်အာမွဲအလန်ဓဝ်ကီု” သာ်ဝွံ သ္ဂးရ။
ဟိုတ်နူ အလဵုအသဳတွဵုရးမန် ဗက်ရပ်ကၠေၚ်စက်ဟွံလုပ်သၞောဝ်တံတုဲ ပ္ဍဲဗွဝ်ဖျာဒမၠုမ္ဂး ကၠေၚ်မွဲလေတ် အောန်အိုတ် ၇၀၀၀ ဒကေဝ် စဵုကဵု ၈၀၀၀ ဒကေဝ်ပြၚ် ၚုဟ်သၠုၚ်တိုန်မံၚ်ရောၚ်။
မွဲလပါ်ပၠန် ဂကောံအလဵုအသဳပၞာန်တံ ယှအ်ဖျေံလဝ်ကၠေၚ်ကဝက်ကီု အခိၚ်ပၟိက်နွံတိုန်မိက်ဂွံဂွံကၠေၚ်စက်တံဂှ် ကၠောန်မံၚ်ပရေၚ်ကေတ်အရေဝ် သာ်ဏံမ္ဂး ပရေၚ်အခက်အခုဲကၠေၚ်စက်ဂၠိုၚ်တိုန်မာန်ရောၚ် တၠကမၠောန်ကၠေၚ်စက်တံ ထံက်ထ္ၜးလဝ်ရ။
ပ္ဍဲအကြာပွိုၚ်ဍုၚ်ဗွဲမဂၠိုၚ်တံဂှ် စနူသတ္တဟဒုတိယ ဂိတုဂျူလာၚ်ဏံတုဲ ဟိုတ်နူအလဵုအသဳတွဵုရးမန် ပတေၚ်ဓရတ် ပရေၚ်ပတိတ်ရာန်ကၠေၚ်စက်တုဲ ကၠေၚ်စက်ပိုတ်အာမံၚ် မွဲဝါပၠန်ဂှ် ဒးကလေၚ်ဆဵုဂဗမံၚ်ရ။
ဟိုတ်နူပတေၚ်ဓရတ်လဝ် ပရေၚ်သွံတြးပတိတ်မံၚ်ကၠေၚ်စက်တံတုဲ ပ္ဍဲဆေၚ်ဗွဲမဂၠိုၚ်တံမ္ဂး ဂကူကၠေၚ်စက်နွံမံၚ်ပၟိက်ဂှ် ရာန်ဟွံဂွံတုဲ၊ ပ္ဍဲဆေၚ်လ္ၚဵုတံပၠန် မၞိဟ်ဂမၠိုၚ်ဒးအာၜေတ်ရာန်ကေတ်မံၚ် ဒှ်ကၠုၚ်ရဂှ် ညးဒေသတံ ဟီုရ။
ပ္ဍဲအကြာပွိုၚ်တ္ၚဲတံဏံမ္ဂး ၜိုန်ရအလဵုအသဳပၞာန် ကဵုစကာသုၚ်စောဲအာ QR Code သၞောတ်စောံ-မတံကီုလေဝ် ပ္ဍဲဆေၚ်လ္ၚဵုမ္ဂး အတိုၚ်စၟတ်ပိုၚ်ခြာ ဖျေံလဝ်ဗီုဂှ်ဟွံသွံကဵုတုဲ ယှအ်ဖျေံသွံကဵုမံၚ်ရောၚ် ဂွံတီရ။
ကၠေၚ်စက်တံဂှ် နူကဵုကာန်ပနဳ Myanmar Energy King ကေုာံ ကာန်ပနဳ Ya Zar Min Industry တံ နူကဵုသၞေဟ်ၜၚ် Puma International Port Terminal ကွာန်ဂဒုၚ်ပဝ် ပွိုၚ်ဍုၚ်မုဟ်ဍုၚ်ဂှ် သွက်ဆေၚ်ကၠေၚ်စက် အလုံတွဵုရးမွဲ သွံတြးကဵုမံၚ်ရောၚ်။
အပ္ဍဲတွဵုရးမန်မ္ဂး စနူသတ္တဟပထမ ဂိတုမာတ်တေံရ အတိုၚ်နွံပၟိက်ဂှ် ရာန်ကၠေၚ်စက်ဟွံဂွံဒှ်မံၚ်တုဲ ဒးရာန်မံၚ်နကဵုသၞောတ်ဗ္ၜတ်ပိုၚ်ခြာ ကဵုလဝ်ကီု ကၠေၚ်စက်ပိုတ်မံၚ်မွဲဏှမွဲဏှကီုတုဲ ၚုဟ်မးကၠေၚ်စက်တံလေဝ် သၠုၚ်နူရး၊ တွဵုရးတၞဟ်တံဏံရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – CJ