ဂၠံၚ်ဍာန်ဆဵုဂဗသဳကၠဳ ဂကောံပၞာန်လးလဝ်ဂှ် ပတဝ်မံၚ်က္ဍိုပ် လပါ်လဵုရော

နေပျဳဒဝ်၊ ဇူလာၚ် ၂၆

အပ္ဍဲကဵုအစဳအဇန် အလဵုအသဳဒပ်ပၞာန်ဂစာန်ကၠောန်မံၚ် ပရေၚ်ၜိုဟ်လလမ်ဏံ ဂကောံရပ်လွဟ်ကောန်ဍုၚ်အရၚ် ဒှ်လဝ်ပေါဲဗတိုက်ကဵုဒပ်ပၞာန်တံလေဝ် ညံၚ်ဂွံပါလုပ်ကၠုၚ်မာန် လတူဂၠံၚ်ဍာန်ပရေၚ်ဆဵုဂဗသဳကၠဳဏံဂှ် ဓရိုဟ်ပတိုန်ကၠုၚ်မံၚ်ရ။

နူကဵုပရေၚ်လဝေၚ်ပၞာန် ၁၀၂၇ စာဲလဝ်ဂၞဴဂြိုဟ် ဒပ်ပၞာန်သီအဝဵုဍုၚ်တံတုဲ ဂကောံမဟာမိတ်ကောဒေံပိဂကောံလ္ၚဵုတံ နူကဵုပေါဲဗတိုက်ဗလးတိဂှ် သွက်ဂွံဆဵုဂဗလ္တူဝိုၚ်ခုၚ်ဂးတုဲ စိုပ်ကၠုၚ် ဒဵုကဵုနေပျဳဒဝ်ရ။

အပ္ဍဲဂိတုဂျူလာၚ် ၁၉ ဂှ် ဂကောံညးစၞး ဒုဥက္ကဌ ဒပ်တအာၚ် TNLA အာဆဵုဂဗသဳကၠဳလဝ် ကုကမ္မတဳပ္ညဳပ္ညပ်ထမံက်ရုပ်ရဴ ညဳသၟဟ်ဂကူကဵု ပရေၚ်ၜိုဟ်လလမ် NSPNC အလဵုအသဳပၞာန်တုဲ အာတ်မိက်လဝ် သွက်ဂွံသ္ပစၟတ်သမ္တီကဵု တွဵုရးတအာၚ် မဒှ်ရ။

တုဲပၠန် အလဵုအသဳကြုက်ဗတိုက်ဖအောဝ်တုဲ ဒပ်ကိုဝ်က MNDAA လေဝ် စိုပ်ဂိတုအဝ်ဂတ်ဏံမ္ဂး သွက်ဂွံတိုန်စိုပ် ပေါဲသဳကၠဳ ပရေၚ်ၜိုဟ်လလမ် ပ္ဍဲနေပျဳဒဝ်ဂှ် ပရိုၚ်တံဏံမံက်မံၚ်ရောၚ်။

ဟိုတ်နူ သ္ပဗဓါန်ကဵုပရေၚ်လဝေၚ်ပၞာန် ၁၀၂၇ တုဲ TNLA ကေုာံ MNDAA တံ ပါလုပ်ကၠုၚ်လဝ် ပ္ဍဲပရေၚ်ဗတိုက်သရိုဟ် သၞောတ်တၠအဝဵုပၞာန် ဗွဲၜိုတ်ထေက်ကြိုက်တုဲ ဟိုတ်နူပရေၚ်ပ္ညဳပ္ညပ် အလဵုအသဳကြုက်ဂှ် မွဲဂကောံတုဲမွဲဂကောံ ဗွဲတၞဟ်ခြာ ဒေါအ်ပန်ပှော်လဝ်ကဵု ဒပ်ပၞာန်ဗၟာရောၚ်။

ကြဴနူပရေၚ်သီအဝဵုပၞာန် ၂၀၂၁ တေံတုဲ တၠုၚ်လအာပရေၚ်ဒေါအ်ပန်ပှော် ဍုၚ်ဗၟာဂှ်တှ်ေ နူကဵုလၟေၚ်ကမၠောန် ပရေၚ်ၜိုဟ်လလမ် ညးဆေၚ်စပ်ဂမၠိုၚ်တံ ပါလုပ်ကၠုၚ်လဝ်ဂှ် ပြံၚ်လှာဲအာဗီုပြၚ်သၞောတ်တၠအဝဵု စဳရေၚ်အာပဋိပက္ခရောၚ် နူကဵုဂကောံသုတေသနဗၠးၜး ISP-Myanmar သ္ဂးရ။

အပ္ဍဲအကာဲအရာဏံ နူကဵုက္ဍိုပ်သ္ကိုပ်သီအဝဵု ဒှ်ကၠုၚ်သမ္မတ ခါန်ကၞက်ကေတ်အလဵုဇကု ဥူမေန်အံၚ်လှိုၚ်ဂှ် အပ္ဍဲအာယုက်လက်ထက် အလဵုအသဳညးပၠတရဴဏံမ္ဂး သွက်ဂွံဂွံပရေၚ်ၜိုဟ်လလမ်ထာဝရဂှ် ဂစာန်ကၠောန်အာရောၚ် ကညာၚ်ကမြေဲလဝ်တုဲ လၟုဟ်မ္ဂး ဂၠံၚ်ဍာန်ဆဵုဂဗသဳကၠဳ သာ်ဏံဂှ် လးထ္ၜးဖျေံကၠုၚ်လဝ် မဒှ်ရ။

ပရေၚ်ဆဵုဂဗသဳကၠဳ သၟဝ်တၠုၚ်လအာပရေၚ်ဍုၚ်ကွာန် အဝဵုမပိုၚ်ပြဳဒပ်ပၞာန်ထိၚ်လဝ်ဂှ်မ္ဂး တၠုၚ်လအာလပါ်ခိုဟ် ဒှ်ဟွံမာန်ပုဟ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဒံက်တာ သာၚ်ကျဳဇြေၚ်သိုဝ် သ္ၚဳဂၠိပ်လဝ်ရ။

“ပရေၚ်ဆဵုဂဗသဳကၠဳဗီုတံဏံပၠန်လေဝ် ကဵုမံၚ်ဇြဟတ်ဟရိုဟ် နကဵုပရေၚ်ပၞာန်ရ။ ဒုၚ်သ္ဇိုၚ်ကဵု ဇြဟတ်ဟရိုဟ်ပရေၚ်ဍုၚ်ကွာန် နူဂၠးကဝ် ဗွဲတၟေၚ် ဍုၚ်သ္ၚိဗ္ဒာဲဇိုၚ်ဝုတ်ဒိုဟ်တံတုဲ အပ္ဍဲတၠုၚ်လအာပရေၚ်ဍုၚ်ကွာန် အဝဵုမပိုၚ်ပြဳ ဒပ်ပၞာန်ညးတံထိၚ်ဒဝ်လဝ်ဂှ် သွက်ဂွံကလေၚ်ပံၚ်တောဲပါလုပ်ကၠုၚ် ဒှ်မံၚ်ဗီုပြၚ်ကော်ဘိက်စန်ထပၠုပ်နၚ်လဝ်ရောၚ်ဂှ် ပိုဲတံကၠိုဟ်လဝ်ရ။ ဟိုတ်နူဒှ်သာ်ဂှ်တုဲ ပရေၚ်ဏံဂှ် ဒှ်အာဗီုပြၚ် Negative Peace ရ။ ဟိုတ်ဂှ်ရ ဂကောံ ပါလုပ်ကၠုၚ်တံဂှ်လေဝ် ဒုၚ်သ္ဇိုၚ်ကဵု ဖဵုဂုဏ်ပရေၚ်ပိုန်ဒြပ် ဒေသဆေၚ်စပ်ညးတံတုဲ၊ သွက်ဂကောံညးတံ ဂွံဆက်တန်တဴဂျိုၚ်အာမာန်ဂှ် တော်ဆတုဲ ညးတံပါလုပ်ကၠုၚ် မဒှ်ရ” သာ်ဝွံ သ္ဂးရ။

အပ္ဍဲမူဝါဒ ဒပ်ပၞာန်သီအဝဵု ပရေၚ်ၜိုဟ်လလမ် ၆ တၚ်ဂှ်မ္ဂး တင်နၚ် “တာလျိုၚ်ပိုဲ ပိတၚ်” ကေုာံ ဒုၚ်တဲကြက်ရှ်သာ ဒဳမဝ်ကရေဇြဳတုဲ အတိုၚ်သ္ဇိုၚ်သၞောဝ်ဥပဒေ ၂၀၀၈ ဂါံကွာ်ဒ္ဂေတ်ဗက်ရေၚ်တၠုၚ်အာ ပရေၚ်ဒဳမဝ်ကရေဇြဳရောၚ်တံဂှ် စုတ်လဝ်မဒှ်ရ။

ပြဟ်ဟ်ဏံ ၜိုန်ရဒုၚ်လဝ်ယၟု ဗီုပြၚ်အလဵုအသဳဒုၚ်ရုဲစှ်ကီုလေဝ် အခေါၚ်ဟီုဂးဗၠးၜးဒုၚ်သ္ဇိုၚ်ကဵုသၞောတ်ဗ္ၜတ် ပရေၚ်ဒဳမဝ်ကရေဇြဳကီု၊ အခေါၚ်သၠးၜးပူဂိုလ် ကောန်ဍုၚ်မွဲမွဲတၠတံကီု ပရေၚ်အခေါၚ်အရာမၞိဟ်တံဂှ်တှ်ေ ဆက်တုဲထိၚ်ချုက်လဝ်ဖိုဟ်ရ။

မွဲလပါ်ပၠန် ပ္ဍဲကဵုရုန်ဂစာန်ကၠောန်အာမံၚ် သွက်ဂွံဂွံပရေၚ်စၟတ်သမ္တီလုပ်သၞောဝ် ပရေၚ်ဍုၚ်ကွာန်နူအာသဳယာန်တုဲ သွက်ဂွံကလေၚ်လုပ်အကြာ ဗွိုၚ်ဂၠးကဝ်မာန်ဂှ် စကာသုၚ်စောဲအာဗျူဟာ ပၟတ်မွဲလပါ်-ဍာ်မွဲလပါ်တုဲ ဖန်ဖက်ကၠောန်ဗဒှ်ထမံက်မံၚ် ဂၠံၚ်ဍာန်ပရေၚ်ၜိုဟ်လလမ်ရောၚ်။

သွက်ပရေၚ်တံဏံ ညံၚ်ဂွံသဳကၠဳအာပရေၚ်ၜိုဟ်လလမ်ဂှ် နကဵုတၚ်စၟတ်ဒစးဒုၚ်ကိုပ်ကၠာဟွံမွဲ မွဲသာ် သမ္မတသီအဝဵု ဥူမေန်အံၚ်လှိုၚ် ပ္ဍဲဂိတုဂျူလာၚ် ၂၀ ဏံ ကော်ဘိက်လဝ် ကုဂကောံရပ်လွဟ်ကောန်ဍုၚ်အရၚ် ထ္ပက် NCA တံကီု၊ ဟွံထ္ပက်လဝ် NCA တံဂှ်ရောၚ်။

ဣဏံဝွံ အခိၚ်လးဖျေံကဵုလဝ် ဂၠံၚ်ဍာန်ဆဵုဂဗသဳကၠဳပရေၚ်ၜိုဟ်လလမ်မ္ဂး ဒုၚ်သ္ဇိုၚ်လတူအခေါၚ်အရာ ကောန်ဍုၚ်အရၚ်တံတုဲ ဒှ်မံၚ်ဗီုပြၚ်ဂအုံဂကောံ နွံပၟိက်ကဵုသွက်အရာဒက်ပ္တန် တၚ်တုပ်စိုတ်ပ္ညဳပ္ညပ်တံရောၚ် အလဵုအသဳပၞာန် စွံလဝ်စိုတ်ရဂှ် ညးလ္ၚတ်တံသ္ၚဳဂၠိပ်လဝ်အိုတ်ရ။

ဆဂး ဂအုံဂကောံဒုၚ်သ္ဇိုၚ်ဂကူဗမာ PDF တံကဵု အလဵုအသဳညဳသၟဟ်ဂကူ NUG မံက်ကၠုၚ်လဝ် နူပရေၚ်သီအဝဵုပၞာန် ၂၀၂၁ တံဂှ်တှ်ေ ဟိုတ်နူဒှ်မံၚ်အလဵုအသဳပြိုၚ်ပကာန်တုဲ နူကဵုအလဵုအသဳပၞာန်ပါဲထောံလဝ် သွက်အရာဆဵုဂဗ ပရေၚ်သဳကၠဳတံဂှ်ရောၚ် သ္ဂးရ။

ပြဟ်ဟ်ဏံမ္ဂး ဂကောံ NSPNC အလဵုအသဳပၞာန် ကဵု  SNA, SSPP, UWSA, NDAA, TNLA တံ မွဲဂကောံတုဲမွဲဂကောံ တၞဟ်ခြာဆဵုဂဗသဳကၠဳလဝ်ကီုတုဲ ကုဂကောံမဟာမိတ်ထပက် NCA ၇ ဂကောံတံလေဝ် နကဵုဂကောံကီု တၞဟ်ခြာမွဲမွဲဂကောံကီု ဆဵုဂဗသဳကၠဳလဝ်ရောၚ်။

ဗီုဗီုတံဏံ ပ္ဍဲအကြာဂကောံဂအုံ ဟွံတုပ်သၟဟ်ညးသ္ကံတံဏံဂှ် ဟိုတ်နူသ္ဇိုၚ်မူတုပ်လဝ်စိုတ် ကၠာတဲဟွံမွဲတုဲ ဂၠံၚ်ဍာန်ပရေၚ်ၜိုဟ်လလမ် သွက်ဂွံဒှ်အပြံၚ်လှာဲပရေၚ်ဍုၚ်ကွာန် ဒုၚ်သ္ဇိုၚ်ကဵုဖိတ်ဒရေဝ်ဂှ် ဆဵုကေတ်မာန်ဟွံသေၚ်ပုဟ် ဒံက်တာ သာၚ်ကျဳဇြေၚ်သိုဝ် ထံက်ထ္ၜးလဝ်ရ။

“အကြာဂကောံပါလုပ်မံၚ်တံဏံဂှ် သ္ဇိုၚ်မူပရေၚ်တုပ်လဝ်စိုတ်ကၠာတဲ ဗျူဟာတံနွံမံၚ်ရောၚ်ဂှ် အဲဟွံဆဵုလဝ်ပုဟ်။ ဟိုတ်နူဟွံဆဵုတုဲ ဗီုဏံပါ်ခြာပြးဇးမံၚ်ဏံဂှ် အတိုၚ်မေန်အံၚ်လှိုၚ် ဖန်ဏာ ညးတံဒးၜေတ်ပါလုပ်အာ ဒှ်မံၚ်အကာဲအရာဗီုဏံတုဲ ဟိုတ်နူဟိုတ်တံဏံတုဲ သွက်ဍုၚ်ဗၟာ အဓိက သၞာံ ၂၀၂၁ ဟွံသေၚ်မ္ဂး သွက်ကောန်ဍုၚ်အရၚ်တံ မိက်ဂွံထမံက်ရုပ်ရဴ ပရေၚ်အပြံၚ်လှာဲ ပရေၚ်ဍုၚ်ကွာန်ဒုၚ်သ္ဇိုၚ်ကဵုဖိတ်ဒရေဝ် ဍိုက်ပေၚ်မံၚ်ကဵု သၞောတ်ဗ္ၜတ်ဒဳမဝ်ကရေဇြဳ ကေုာံ စဵုဒၞာကဵုအခေါၚ်အရာမၞိဟ်တံမာန်ဂှ် ဆဵုကေတ်မာန်ဟွံသေၚ်ပုဟ်။ ဆဂး ဟိုတ်နူမံၚ်ကြပ်အာကဵု အလဵုအသဳဒပ်ပၞာန်တုဲ အခေါၚ်အရာပရေၚ်ကမၠောန်တံ ဂွံဂၠိုၚ်တိုန်ကၠုၚ်ရောၚ်”သာ်ဝွံ သ္ဂးရ။

ဂကောံရပ်လွဟ်ကောန်ဍုၚ်အရၚ်တံဂှ် ဂၠံၚ် NCA ဟွံက ဂၠံၚ်ဍာန်လဵုမွဲဟွံဟီု ဂါံကွာ်အာ ဂၠံၚ်တရဴပရေၚ်ၜိုဟ်လလမ်မာန်ရောၚ်ဂှ် ပ္ဍဲပေါဲဆဵုဂဗသဳကၠဳ ကုဂကောံဒဳမဝ်ကရက်တေတ်ဠာဟူ LDU ပ္ဍဲဂိတုဂျူလာၚ် ၂၄ ဂှ် ဥက္ကဌ NSPNC အလဵုအသဳပၞာန် ဒုသ္ကိုပ်ပၞာန်ဇၞော် ယာပျေအ် ဟီုပတိတ်လဝ်ရ။

ပၟိက်ဆန္ဒတံကီု တၚ်နွံပၟိက်တံကီု အတိုၚ်ဥပဒေတန်ကြန်မံၚ်ပြဟ်ဟ်ဏံ ၜိုတ်ရေၚ်တၠုၚ်ကၠောန်သ္ပကဵုမာန် ကုဂကောံဆေၚ်စပ်တံဂှ် ပ္ညဳပ္ညပ်အာတုဲ၊ စပ်ကဵုလပါ်ပရေၚ်ဥပဒေတံဂှ်လေဝ် နူကဵု NSPNC ဒးပ္ညဳပ္ညပ် ဖန်ဖက်ကဵုလဝ်တံလေဝ်နွံမံၚ်ရောၚ် ညးသ္ဂးရ။

မွဲလပါ်ပၠန် သွက်ပရေၚ်ဒေသဂွံညိၚ်ဝပ်ဟွံက ပရေၚ်ဇၞော်မောဝ် ဖောအ်ဗြဳတောတက်တံကီု  သွက်ဂွံထမံက်အာရုပ်ရဴပရေၚ်ၜိုဟ်လလမ် ခိုၚ်ၚ်ကၠိုက်က်ဍာ်ဇမၠိၚ်မာန်တုဲ ကုဂကောံရပ်လွဟ်ကောန်ဍုၚ်အရၚ် သီုဖအိုတ်တံဂှ် ပံက်ကဵုလဝ်ဂၠံၚ်ဍာန်ရောၚ် ဒုသ္ကိုပ်ပၞာန်ဇၞော် ယာပျေအ် ဟီုလဝ်ရ။

ပ္ဍဲအရာပရေၚ်ထမံက်မံၚ်ရုပ်ရဴ ပရေၚ်ၜိုဟ်လလမ်ထာဝရ ကုဂကောံရပ်လွဟ်ကောန်ဍုၚ်အရၚ်တံမ္ဂး နူကဵုဂၠံၚ်တရဴရပ်လွဟ်ဂှ် ညံၚ်ဂွံပြံၚ်လှာဲအာဗီုပြၚ် အခေါၚ်ဒက်ပ္တန်ဗော်ပရေၚ်ဍုၚ်ကွာန်ကေုာံ အခေါၚ်ပံက် ကမၠောန်ကာန်ပနဳတံဂှ် ဒပ်ပၞာန်ဗၟာကဵုလဝ်အခေါၚ်ရောၚ် ဂွံဆဵုကေတ်ရ။

တုဲပၠန် သွက်ဂကောံရပ်လွဟ်ကောန်ဍုၚ်အရၚ်တံပၠန် နကဵုညးမွဲမွဲတၠ မိက်ဂွံရပ်လွဟ်တုဲ ယိုက်ဂၠေၚ်ကေတ်တာလျိုၚ်ပရေၚ်ဂီုကၠီု ကၟိန်ဍုၚ်မ္ဂး ပြံၚ်လှာဲထောံဗီုပြၚ် ဒပ်မၚ်ပယျဵု BGF ကေုာံ ဒပ်မၚ်ကွာန် (ပြည်သူ့စစ်) တံမာန်ရောၚ် သ္ဂးရ။

လၟေၚ်ပရေၚ်ကမၠောန်ဗီုဏံဂှ် အကြာဂကောံဇြဟတ်ပၠန်ဂတးတံမ္ဂး ဒှ်ပရေၚ်ဗျူဟာ လုက်စုက်ပါ်ခြာရောၚ် နူဂကောံလ္ၚတ်ပရေၚ်ပၞာန် ဆေၚ်စပ်ကဵုပရေၚ်ဂီုကၠီု MSDI ညးတာလျိုၚ်သုတေသနပရေၚ်ပၞာန် ကိုနံၚ်ယော သ္ဂးရ။

“လပါ်ဏံ ဂကောံရပ်လွဟ်ကောန်ဍုၚ်အရၚ်တံ၊ ဇြဟတ်ပၠန်ဂတးတံ အာတ်မိက်မံၚ် ပရေၚ်ပြံၚ်လှာဲပလေဝ်အာ ပရေၚ်ဍုၚ်ကွာန် ကေုာံ ပၟိက်ဆန္ဒပရေၚ်ဍုၚ်ကွာန်တံ သွက်ဂွံထမံက်ရုပ်ရဴကဵုမာန်ဂှ် သ္ဇိုၚ်မူတံကီု အကာဲအရာတံကီု မုလေဝ် ဟွံဆဵုညာတ်လဝ်ပုဟ်။ ဟိုတ်ဂှ်တုဲ ပရေၚ်ဏံတှ်ေ ရန်တၟအ်ညးတံဇေတ်တ်ဂှ် ဒှ်အရာ သွက်ဂွံထမံက်ရုပ်ရဴဗီုပြၚ် ပရေၚ်ၜိုဟ်လလံဒေါအ်ပန်ပှော်အခိၚ်ဂၠိဂၠိရောၚ်ဂှ် ဆဵုကေတ်ရ။ တၚ်မွဲပၠန်ဂှ် အပ္ဍဲအကြာဂကောံဇြဟတ်ပၠန်ဂတးတံဂှ်လေဝ် ဒှ်မံၚ်ပရေၚ်လုပ်အကြာ နကဵုဗျူဟာ ပရေၚ်ပါ်ခြာတံရ။ တုဲမ္ဂး ရန်တၟအ်ညးတံဇေတ်တ်ဂှ်တှ်ေ သွက်ဂွံဂွံမုက်လိက်ဂၠးကဝ် ကေုာံ ဂုဏ်ဖဵုပရေၚ်ဍုၚ်ကွာန်၊ ပ္ဍဲမုက်လိက်ပရေၚ်ကလုတ်တမာန်တံဂှ် ညံၚ်ဂွံဂွံမုက်မတ်ခိုဟ်ဟ်တုဲ ဒှ်ဗျူဟာ ဍာပ်လုပ်လုက်စုက်အာရောၚ် ပိုဲတံဆဵုကေတ်ရ” သာ်ဝွံ သ္ဂးရ။

ပြဟ်ဟ်ဏံမ္ဂး လတူဂၠံၚ်ဍာန်ပရေၚ်ၜိုဟ်လလမ် အလဵုအသဳပၞာန်လးလဝ်ဂှ် ကောန်ဂကောံမဟာမိတ်ကောဒေံပိ AA ၊ ကောန်ဂကောံပၠတရဴဖေက်ဒရေဝ် SCEF – KIO, KNU, KNPPP ကေုာံ CNF တံ ဟွံဂါံလုပ်အာတုဲ ဆက်ပါလုပ်မံၚ် ပ္ဍဲပရေၚ်ပၠန်ဂတး ဖိုဟ်ရောၚ်။

ပါဲစွံထောံလဝ် အခက်အခုဲပရေၚ်ဍုၚ်ကွာန် တမ်မူလတံဂှ်တုဲ သွက်ဒပ်ပၞာန်ဂွံအုပ်ဓလီုအာ သၞောတ်တၠအဝဵုပၞာန် နကဵုဇြဟတ် ဗဟဵုရပ်ဇုက်ဂၠိုၚ်ၚ်တုဲ ရန်တၟအ်သွက်ဂွံယှအ်ဖျေံအာ ပရေၚ်ပကီုပရာတ်သက်သက် ကၠောန်မံၚ်ပရေၚ်ဆဵုဂဗသဳကၠဳဂှ် ဖန်ဗဒှ်အာကဵု ပရေၚ်ၜိုဟ်လလမ်တန်ကြန်ခိုၚ်ဗိုန်ဍာ်ဇမၠိၚ်မာန် ဟွံသေၚ်ပုဟ် ဂကောံ SCEF သ္ဂးရ။ 

တုဲပၠန် ပရေၚ်ဒပ်ပၞာန်အုပ်ဓလီုကေတ်လဝ်အဝဵုဏံ ညံၚ်ဂွံအိုတ်ကၠေံကၠက်တုဲ သွက်ဂွံသောၚ်ကလးအာ ဟိုတ်ပရူပရာတမ်မူလ ပဋိပက္ခက္တဵုဒှ်လဝ်တံ သွက်ဂွံဒက်ပ္တန်အာ ပရေၚ်အပြံၚ်လှာဲပရေၚ်ဍုၚ်ကွာန် ကၟိန်ဍုၚ်ပံၚ်ကောံဖိတ်ဒရေဝ်ဒီမိုကရေသဳမွဲဂှ် ဒှ်တင်ရန်တၟအ် SCEF ရောၚ် ပ္ဍဲဂိတုဂျူလာၚ် ၁၅ တေံဂှ် ကဵုသမ္တီ လလောၚ်တြးလဝ်ရ။

ပရိုၚ် – သြၚ်လောန်တိုၚ်မ်

Photo – MOI