နယူဒေလဳ၊ ဂျူလာၚ် ၂၈
နူကဵု ဂကောံရေၚ်တၠုၚ်ကမၠောန် တၠကမၠောန်ပညာနဲကဲ နန်ဒန် နိုၚ်လ်ကာနဳ သ္ကိုပ်သ္ကတုဲ သွက်ဂွံပြံၚ်သၠာဲပလေဝ်အာ သၞောတ်ပေါဲသွဟ်လိက် ဍုၚ်အိန္ဒိယဂှ် သ္ကိုပ်ဝန်ဇၞော် နာရန် ဒရာမိုဒဳ လလောၚ်တြးလဝ် ပ္ဍဲဂျူလာၚ် ၂၆ ရ။
ပ္ဍဲဍုၚ်အိန္ဒိယ တင်သၟာန် ပေါဲသွဟ်လိက်လုပ်ဘာဂဥုဲ မံက်အာလဝ် ဟိုတ်နူစောဲစပ်တုဲ ကွးဘာတံ ဒးထပ်ကလေၚ်သှ်လဝ် လိက်တုဲ ရဲဟွံပေၚ်စိုတ်တံ ဒစဵုဒစးထ္ၜးကၠုၚ်လဝ် ဆန္ဒရောၚ်။
သၟတ်ဗွဲမဂၠိုၚ်တံ အာက္ဍိုပ်ထ္ၜးဆန္ဒဂှ် ဒပ်ဗၠာဲသၟိၚ်တံ ဂြးသ္အးလဝ်တုဲ က္ဍိုပ်သ္ကိုပ်ဗော်စၟဟဒိ အာမံၚ်က္ဍိုပ် ပေါဲထ္ၜးဆန္ဒတံ ကြဴနူပ္ညဳပ္ညပ်သဳကၠဳလဝ် ကုညးတာလျိုၚ်တံအလဵုအသဳတံတုဲ ဒေါအ်ထောံ ပေါဲထ္ၜးဆန္ဒတံရောၚ် လလောၚ်တြးလဝ်ရ။
ဝန်ဇၞော်ပရေၚ်ပညာ ဒါမာမာန်ဒရာ ပရက်ဟန် နုက်တိတ်အာ နူတာလျိုၚ်တုဲ ပ္ဍဲဂကောံအလဵုအသဳ မိုဒဳ မၞိဟ်တံစိုတ်လုပ်စ အောန်ကၠုၚ်မံၚ်ဏံဂှ် ညးတေံ ဒှ်မၞိဟ်ဒးဒုၚ်ဂိလဝ် လက္ကရဴအိုတ်ရောၚ် သာ်ဝွံလေဝ် ပရေၚ်ဟီုဂးတံ မံက်ဂတဝ်မံၚ်ရ။
ကြဴနူဒးဒုၚ်ရုဲစှ် သွက်အာယုက်တာလျိုၚ် အလန်တတိယတုဲ သွက်သ္ကိုပ်ဝန်ဇၞော် မိုဒဳ ဒှ်ကၠုၚ်တင်ကော်ဆော ဇၞော်အိုတ်တုဲ ဟိုတ်နူပေါဲထ္ၜးဆန္ဒ မံက်ဂတဝ်ကၠုၚ်ဗီုတံဏံတုဲ ပ္ဍဲဍုၚ်အိန္ဒိယ ပရေၚ်အပြံၚ်လှာဲလ္ၚဵုတံ က္တဵုဒှ်ကၠုၚ်လဝ်ရောၚ်။
ကိုပ်ကၠာ ကၠောန်လဝ် ပေါဲသွဟ်လိက်လုပ်ဘာဂဥုဲဂှ် တင်သၟာန်တံ မံက်အာလဝ် ပရေၚ်စောဲစပ်တံ မံက်တိုန်ကၠုၚ်တုဲ ပ္ဍဲအခိၚ်ကၠောန် အလန်ဒုတိယဂှ် နူကဵုဒပ်ပၞာန်ကျာတံ ဖ္ဍိုက်ပလံၚ်လဝ်ကဵု တင်သၟာန်တံ၊ ကၠောန်လဝ်ကဵု ပရေၚ်စၟဳစၟတ်ဗွဲမဂၠိုၚ်ကီုလေဝ် ညးဍုၚ်ကွာန်ဂမၠိုၚ်တံ ဟွံပေၚ်စိုတ်ကွေံပုဟ်။
စပ်ကဵုသၞောတ်ပရေၚ် ပေါဲသွဟ်လိက်တံတုဲ ပရေၚ်ဟွံပေၚ်စိုတ်ညးဍုၚ်ကွာန်တံ ပဵုဂၠိုၚ်တိုန်မံၚ်တုဲ၊ အကြာသၟတ်တံလေဝ် ဟိုတ်နူကမၠောန်ကၟိတ်ဟၟဲမံၚ်အိုတ်တုဲ ပရေၚ်ဟွံပေၚ်စိုတ်တံ ပဵုဂၠိုၚ်တိုန်မံၚ်အခိၚ်ဏံဂှ်ရ ပေါဲထ္ၜးဆန္ဒ ဗော်စၟဟဒိတံ မံက်တိုန်ကၠုၚ်ရ။
ပ္ဍဲဍုၚ်အိန္ဒိယ ဝါဒကောန်ဂကူဟိန္ဒူ သြဇာဗျာပ်လုပ်ကၠုၚ်တုဲ အခေါၚ်အရာဒဳမဝ်ကရေဇြဳတံ ဍိုန်လျစှ်ေကၠုၚ်မံၚ်အခိၚ်ဏံ ဗော်စၟဟဒိ ဂွံဇြဟတ် ပရေၚ်ထံက်ဂလာန်ဗွဲမဂၠိုၚ်တုဲ သွက်သ္ကိုပ်ဝန်ဇၞော် မိုဒဳဂှ် ဒှ်ကၠုၚ်တင်က္ဍဟ်ဒးကှ် မွဲရ။
ပြဟ်ဟ်ဏံမ္ဂး က္ဍိုပ်သ္ကိုပ်ဗော်စၟဟဒိတံ ပ္ညဳပ္ညပ်လဝ် ကုညးတာလျိုၚ်နွံအဝဵုတံတုဲ၊ ပေါဲထ္ၜးဆန္ဒညးတံဂှ် ဒေါအ်အာရောၚ် သာ်ဝွံ ဟီုလဝ်ရ။
Ref:Reuters