မတ်မလီု၊ ဂျူလာၚ် ၂၈
လတူကွဳပၟတ်မြက်ဖ္ဍိုက်မၞိဟ် စက်ဟဂံက်ကျာ မတ်မလီု-လ္ဂုၚ် ညံၚ်ရဲအာတရဴတံဂွံဒှ်ဒဒိုက်စိုတ် လှ်ေကွာဲသၠိုက် မိပ်ဂြိုၚ်မံၚ် ဟၟဲကဵုစေဝ်ပၞောန်ကု ဂကောံဒဝ်မျတာန် ၅၄ တၠတံဂှ် ပံက်အမှုတုဲကေတ်လဝ်အရေဝ်ရောၚ် နကဵုစၟတ်တ္ၚဲ ဂျူလာၚ် ၂၆ ဂှ် အလဵုအသဳဒပ်ပၞာန် လလောၚ်တြးပတိတ်လဝ်ပရိုၚ်ရ။
ဂိတုဂျူလာၚ် ၂၃ တုဲကၠုၚ်တေံ ပ္ဍဲကဵုတရဴကွဳပၟတ်မြက် DEMU မတ်မလီု-လ္ဂုၚ်ဂှ် ဂကောံဝေၚ်ဒြဟတ် ဇိုၚ်ပြၚ်ၜဳ မတ်မလီု ဂအုပ်ဘာအစာၝောံ ဒဝ်မျတာန် က္ဍိုက်က္ဍိုပ်ဂှ် ညံၚ်ရဲအာတရဴတံဂွံဒှ်ဒဒိုက်စိုတ် လ္တူကွဳပၟတ် အဟိန်အာမံၚ်ဂှ် လှ်ေကွာဲသၠိုက်ဝေၚ်ဂြိုၚ်ကရေဲကညာၚ်ဟီုညာန်လဝ် အိုတ်အစောန်ရောၚ်။
ဟိုတ်နူပရူပရာဏံတုဲ ပ္ဍဲမုက်လိက်ဇာဖိုၚ်မှာဇန်တံ ပရေၚ်အာတ်မိက် သွက်ဂွံကေတ်ကဵုအရေဝ်ဂှ် ဂၠိုၚ်တိုန်ကၠုၚ်တုဲ နူကဵုဂကောံအလဵုအသဳဒပ်ပၞာန် အတိုၚ်ၝောံပိုဒ် ၈၈ (က) ဥပဒေကမၠောန်ပလံၚ်ဗ္စိုပ်ကွဳပၟတ်ဂးတုဲ ပံက်အမှုကေတ်အာအရေဝ်ရောၚ် ပတိတ်ပရိုၚ်လလောၚ်တြးလဝ်ရ။
အတိုၚ်အလဵုအသဳဒပ်ပၞာန် လလောၚ်တြးလဝ်မ္ဂး ဒဝ်မျတာန် မပါလုပ် ၅၄ တၠတံဝွံ ပ္ဍဲလတူကွဳပၟတ် ကညာၚ်ကရေဲဒယှ်ေညာန်ကီု ဂဇအ်ဒၞာဲစွံတဲခုၚ်ကွဳပၟတ်၊ ကၟာတ်လဝ်ဂၠံၚ်မၞိဟ်အာကၠုၚ် တောဲကွဳပၟတ် တုဲ တက်ဝိုၚ်စပုၚ် ကေုာံ တက်ဗဳဒီယဝ် Tik Tok တံဂှ် ဖန်ဗ္ဒျ် ကၠောန်လဝ်ရောၚ်။
စပ်ကဵုပရေၚ် ညးတံကၠောန်မံၚ်ဗီုဏံဂှ် နူကဵုသပဳကာ ပရေၚ်လလောၚ်တြးကွဳပၟတ် ကဵုကၠုၚ်သတိ ၂ ဝါကီုလေဝ် ဟွံဒ္ဂေတ်ဗက်တုဲ ပံက်အမှုကေတ်အာအရေဝ်ရောၚ် ကဵုသမ္တီ လလောၚ်တြးလဝ်ရ။
အတိုၚ်လိက်ဇဟ နူဒပ်ဗၠာဲသၟိၚ် ဌာန်ပရိုၚ်သြၚ်လောန်တိုၚ်မ် ဂွံလဝ်မ္ဂး ဒဝ်မျတာန်မပါလုပ် ၅၄ တၠတံ ဒးဒုၚ်ပံက်လဝ်အမှု နကဵုၝောံပိုဒ်ဗၠာဲသၟိၚ် အခေါၚ်ကေတ်အရေဝ်နွံဒှ်မံၚ်ကီုလေဝ် ဟိုတ်နူညးဒုၚ်လျိုၚ် ၂ တၠနွံတုဲ ကဵုဒုၚ်လဝ်လျိုၚ်ရောၚ် ဂွံတီကေတ်ရ။
ဂအုပ်ဘာဒေါအ်ဇူ ဒဝ်မျတာန်တံ ဒးဒုၚ်ပံက်လဝ်အမှုဏံဂှ် ရဲဂကောံညးတံဗွဲမဂၠိုၚ်ဂှ်တှ်ေ ဒှ်မံၚ်သမ္ဘာ တၠကမၠောန် ပရေၚ်ပိုန်ဒြပ်အဆံၚ်သၠုၚ် ဍုၚ်မတ်မလီုတံကီု၊ သမ္ဘာညးတာလျိုၚ်ပၞာန်တံကီု သီုကဵုရဲပံၚ်နှဴမံၚ်ကဵု ဂကောံပၞာန်တံသၟးရောၚ် ရဲလ္တူဍုၚ်တံ သ္ဂးရ။
အတိုၚ်ၝောံပိုဒ် ၈၈ (က) ဥပဒေပရေၚ်ကမၠောန်ပလံၚ်ဗ္စိုပ်ကွဳပၟတ် ဒဝ်မျတာန် မပါလုပ် ၅၄ တၠ ဒးဒုၚ်ပံက်လဝ်အမှုတံဂှ် ယဝ်ရဒုဟ်နွံမ္ဂးဒးဒုၚ်ထံၚ်ဟွံၜက်နူကဵု ၃ ဂိတုဒှ်ဒှ်၊ ဒးတပ်ဒဏ်သြန် အောန်အိုတ် ၁ ဠက် စဵုကဵု ၁ ကိုတ်ဒကေဝ်ဒှ်ဒှ်၊ ဒုဟ်ဒဏ်သီုၜါသာ်ဒှ်ဒှ် ဖျေံအာဒုဟ်မာန်ရောၚ်။
အပ္ဍဲဂိတုဂျူလာၚ် ၂၁ တုဲကၠုၚ်တေံလေဝ် လ္တူကွဳပၟတ်မြက်ပြဟ် လ္ဂုၚ် – မာန္တလေဝ် ညးဗြဴပန်တၠ ဟိုတ်နူဟီုအရေဝ်ရမျှာၚ် ထတ်ညာန်မံၚ်၊ ဆဟ်ဖျေံဍာ်ပါၚ်ဇဗၠု ကၠိပတ်၊ ဖန်ဖက်လဝ်သွက်ပွဳပွူ ကၠိခန် ပပ်ပဳအာတုဲ ပံက်အမှုတုဲ ဂွံပွိုၚ် ၂ တ္ၚဲဂှ် ဖျေံဏာဒုဟ်ထံၚ် ၂ ဂိတု မဒှ်ရ။
ပရိုၚ် – သြၚ်လောန်တိုၚ်မ်
Photo – Social Media