မတ်မလီု၊ ဂျူလာၚ် ၂၈
အပ္ဍဲဘာပရေၚ်ပညာသ္ဇိုၚ်တွဵုရးမန် အလဵုအသဳတွဵုရးမန် စၞောန်ပ္ညုၚ်လဝ် ကုကောန်ကွးဘာတံ ကဵုတဵုမံၚ်တၞံဗြာတ်ရဂှ် မိမကောန်ကွးဘာတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဌာနပရေၚ်ပညာသၟဝ်အလဵုအသဳပၞာန်တံဂှ် ထ္ၜးဟိုတ်ပေါဲတဵုတၞံဆု အခိၚ်ဥတုဗြဲဂးတုဲ ပ္ဍဲတ္ၚဲဘာကၟာတ်မ္ဂး ကော်ကေတ်ကောန်ကွးဘာတံအစာတံတုဲ ဖ္တိုက်ဖ္အောဝ် ကဵုတဵုမံၚ်တၞံဗြာတ်တံရောၚ် ဂွံတီရ။
ပရေၚ်ကဵုကောန်ကွးဘာတံ တဵုမံၚ်တၞံဗြာတ်ဂှ်တှ်ေ သွက်ကာယကဵု ဂမြၚ်ဥာဏ်ဗ္စာရဏာကောန်ကွးဘာတံ ဂွံဖောအ်ဗြဳတိုန်ဂးတုဲ သွက်ဂွံ ဗစဗြာတ်နဒဒှ်စၞအာဟာရ ဂွံထံက်ပၚ်အာမာန်ဂှ် ဂွံကဵုတဵုလဝ်ရောၚ် ပ္ဍဲလိက်ပရိုၚ်တြးဝါဒ အလဵုအသဳပၞာန်တံ သ္ဂးရ။
နကဵုအစဳအဇန်အလဵုအသဳပၞာန်တံ ပ္ဍဲတ္ၚဲဘာကၟာတ်ဂှ် ကော်ကေတ်ကောန်ကွးဘာတံတုဲ ကၠာတေံမ္ဂး ကဵုတဵုမံၚ်တၞံဆုဂွံသၞိၚ် သတ်ဆုတၞံဆုစဂွံတံကီုလေဝ် ပ္ဍဲလၟုဟ်ဏံမ္ဂး ကဵုပြံၚ်လှာဲကဵုတဵုမံၚ်တၞံဗြာတ်တံရ မိမကွးဘာမွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပ္ဍဲတ္ၚဲအဒိုတ်တုဲကၠုၚ်တေံ ကော်ဏာ ကောန်ၚာ်တံရ၊ ပ္ဍဲဘာ ပေါဲတဵုတၞံဆု အခိၚ်ဥတုဗြဲ ဒးတဵုအာရောၚ် ဗီုဏံဗီုတေံ၊ ကၠာတေံမ္ဂး အတိုၚ်သီုညးဖအိုတ်တံဂွံတီမံၚ် လၟေၚ်သၞာံ ကဵုတဵုတၞံဆုဂွံသၞိၚ်တံ၊ တၞံသတ်ဆုစဂွံတံရ၊ လၟုဟ်မ္ဂး ဟီုမံၚ်အတိုၚ်စၞောန်ပ္ညုၚ်သာ်ဏံတုဲ ကဵုကောန်ၚာ်တံ တဵုမံၚ်တၞံဗြာတ်ရ၊ သွက်မုမုရောဂှ်တှ်ေ ဟွံတီပုဟ်၊ ညးတံကဵုတဵုတှ်ေ ကောန်ၚာ်တံလေဝ် ဒးတဵုအာရ” သာ်ဝွံ သ္ဂးရ။
တုဲပၠန် အပ္ဍဲပရေၚ်တဵုတၞံဗြာတ်ဏံဂှ် ကောန်ကွးဘာ၊ အစာတံတုဲ သီုကဵုမိမကွးဘာတံကီု၊ ကော်ကေတ် ဂကောံညးရေၚ်တၠုၚ်ဘာတံတုဲ ကဵုအာတဵုမံၚ်အိုတ်ရောၚ် ညးဆက်ဟီုရ။
မွဲလပါ်ပၠန် တၞံဗြာတ်ကဵုတဵုလဝ် ပ္ဍဲဘာတံဂှ်မ္ဂး ဂကူဗြာတ်တိတ်နူဒေသတံ မပ္တံ ဂကူဗြာတ်ဗဳလာ၊ ဂကူဗြာတ်လှတံ သၟးဟွံက ဂကူဗြာတ်တေတ်ယှူ (တစ်ရှူးငှက်ပြောသီး) တံလေဝ်ပါလုပ်မံၚ်ရောၚ် ပ္ဍဲလိက်ပရိုၚ်တြးဝါဒ အလဵုအသဳပၞာန်တံ ထမံက်ချူပတိတ်လဝ်ရ။
တုဲကၠုၚ်ဂိတုဂျောန် ၂၉ တေံ သမ္မတအလဵုအသဳပၞာန် ဥူမေန်အံၚ်လှိုၚ် ကၠောန်ပေါဲဆဵုဂဗကုသ္ကိုပ်ဝန်ဇၞော်ရး ကေုာံ တွဵုရးတံပ္ဍဲနေပျဳဒဝ်တေံတုဲ ကဵုလဝ်စၞောန်ပ္ညုၚ် ပရေၚ်ဒးတဵုတၞံဗြာတ် ပ္ဍဲဘာပညာသ္ဇိုၚ်တံဒှ်ကၠုၚ်ရောၚ် ဂွံတီရ။
အပ္ဍဲဘာပရေၚ်ပညာသ္ဇိုၚ်တံဂှ်တှ်ေ သွက်ဘဝကောန်ကွးဘာတံဂွံတန်တဴအာမာန် ညံၚ်ဂွံဗတောန်ကဵုလဝ် ပညာပရေၚ်တဵုလွဳတံကီု ပ္ဍဲဇၟာပ်ပ်ဘာတံမ္ဂး ကိုန်အစဳဇန်တဵုဗြာတ်တေတ်ယှူ ကေုာံ လွဳဂၠဴဍာ်တှ်တံ ညံၚ်ဂွံထမံက်အာရုပ်ရဴဂှ် သမ္မတ ဥူမေန်အံၚ်လှိုၚ် ဟီုလဝ် ပ္ဍဲပေါဲဆဵုဂဗတေံတုဲ ဗွဲကြဴဏံ ဒးတဵုမံၚ်တၞံဗြာတ်တံ မဒှ်ရ။
ကြဴနူသီအဝဵုပၞာန်တုဲ ဂိတုဂျောန် ၂၀၂၁ တေံလေဝ် ပ္ဍဲတွဵုရးမန် ဌာနနာနာတံဂှ် သ္ကိုပ်က္ဍိုပ်သ္ကိုပ်ပၞာန် ဥူမေန်အံၚ်လှိုၚ် ဟိုတ်နူ စၞောန်ပ္ညုၚ်လဝ်တုဲ ဒးတဵုလဝ်ဗြာတ်တေတ်ယှူတံနွံကၠုၚ်လဝ်ရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – CJ