မတ်မလီု၊ ဇူလာၚ် ၂၈
နူကဵုကံၚ်သဳပၠတရဴ ထမံက်ပတိုန်ကၟိန်ဍုၚ်ပံၚ်ကောံဖိတ်ဒရေဝ် ဒဳမဝ်ကရေသဳ SCEF ဆဵုဂဗလဝ် ကဵု ဂကောံ AA၊ မန်၊ ပအိုဝ်၊ ဗမာကေုာံ ဂကောံဇြဟတ်ဒုၚ်သ္ဇိုၚ်ပၠန်ဂတးတမ်ကညၚ်တံတုဲ ဖျေံလဝ်ပရေၚ်ကမၠောန် အဓါန်ဂတတံဂှ် ပတိတ်လဝ်ပရိုၚ် ပ္ဍဲကဵုဂိတုဂျူလာၚ် ၂၆ ဏံရ။
အပ္ဍဲသတ္တဟတတိယ ဂိတုဂျူလာၚ်တုဲကၠုၚ်ဏံဂှ် နူကဵု SCEF ဆဵုဂဗ ကောံဓရီုလဝ်ကု ဂကောံရပ်လွဟ်ကောန်ဍုၚ်အရၚ်တံကီု၊ ယူနေတ်ဖိတ်ဒရေဝ်တံကီု၊ ကံၚ်သဳ၊ ကမ္မတဳစၠတ်ထဝ် ကေုာံ ဂကောံဇြဟတ်ဒုၚ်သ္ဇိုၚ်ပၠန်ဂတးတမ်ကညၚ်တံ နကဵုတၞဟ်ခြာ မွဲမွဲဂကောံကီု နကဵုဂကောံဂအုံတံကီု နွံမံၚ်ရောၚ်။
အလဵုအသဳဒပ်ပၞာန် အဟိန်ကော်ဘိက်မံၚ် ပရေၚ်ၜိုဟ်လလမ်ဏံ အဃောကၠောန်မံၚ် ဗျူဟာပရေၚ်ပါ်ဒကးဆီ အကြာဂကောံရပ်လွဟ် ကောန်ဍုၚ်အရၚ်တံကဵု ဂကောံ PDF ဇြဟတ်ဒုၚ်သ္ဇိုၚ်ပၠန်ဂတးတမ်ကညၚ်တံ ဂွံလုပ်ဖျေံအာလွဟ်ဂှ် အကြာဏံ ပရေၚ်ဆဵုဂဗညးသ္ကံဗီုတံဏံ ဒှ်ကၠုၚ်ဂှ် ညံၚ်ရဴ ပရေၚ်ဗပေၚ်ကဵုဇြဟတ်စိုတ်မွဲရောၚ် ညးလ္ၚတ်တံထံက်ထ္ၜးအိုတ်ရ။
မွဲလပါ်ပၠန် ဂကောံ SCEF ဆဵုဂဗလဝ်ကဵု ညးစၞးတၟေၚ်အာသဳယာန် ဝန်ဇၞော်ပရေၚ်ဍုၚ်သအာၚ် ဖိလေတ်ပိုၚ် ကေုာံ ဝန်ဇၞော် ပရေၚ်ဍုၚ် သအာၚ်သေံတံ ပ္ဍဲသတ္တဟဒုတိယ ဂိတုဂျူလာၚ်တေံတုဲ ရးနိဂီုဍုၚ်ဗၟာဂှ် အဆံၚ်သွက်ဂွံစကၠောန်ပေါဲသဳကၠဳပ္ညဳပ္ညပ် ပရေၚ်ဍုၚ်ကွာန်လုပ်သၞောဝ်ဂှ် အကာဲအရာဟွံစိုပ်ဏီပုဟ် ကဵုလဝ်သမ္တီနွံတုဲ ဗွဲကြဴဏံ ကလေၚ်ဆဵုဂဗလဝ်ကဵု ဂကောံပၠန်ဂတးတံရောၚ်။
စပ်ကဵုတၠုၚ်လအာ ပရေၚ်ဍုၚ်ကွာန်ပြဟ်ဟ်ဏံကေုာံ တင်နွံပၟိက် လၟေၚ်ကမၠောန်ပရေၚ်ဍုၚ်ကွာန် အဓါန်ဂတတေံဂှ် ကောံဓရီုဆဵုဂဗသဳကၠဳကေတ်လဝ် ကသပ်ဥာဏ်ညးသ္ကံတုဲ ဖျေံလဝ်ပရေၚ်ကမၠောန် အဓါန်ဂတတံရောၚ် ပ္ဍဲလိက်လလောၚ်တြး SCEF ကဵုလဝ်သမ္တီနွံတုဲ တင်နၚ်ဇိပ်ပ်ဂၠိပ်ပ်တံဂှ်တှ်ေ ဟွံထမံက်ထ္ၜးလဝ်ပုဟ်။
ယဝ်ရဂကောံဇြဟတ်ပၠန်ဂတး နူကဵုတွဵုရးမန်တံပါလုပ်အာ အပ္ဍဲဂကောံ SCEF မ္ဂး သွက်ဂွံပံၚ်တောဲကၠောန်အာပရေၚ်ပၞာန်ကဵု ပရေၚ်ဍုၚ်ကွာန်တံဂှ်သဳကၠဳလဝ်ရောၚ် ညးတိုန်စိုပ်လဝ်ကောံဓရီု ဥက္ကဌကမ္မတဳအုပ်ဓုပ် ကံၚ်သဳဖိတ်ဒရေဝ်တွဵုရးမန် MSFC နာဲမန်သာၚ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“လၟေၚ်ကမၠောန် သွက်ဂွံဆက်ပံၚ်တောဲအာ ဂတတံဂှ်တှ်ေ နကဵုတွဵုရးပိုဲမွဲ ယဝ်ရဒှ်ကၠုၚ်ကောန်ဂကောံမ္ဂး လၟေၚ်ကမၠောန်ဖျေံစွံလဝ် ပ္ဍဲ SCEF တံဂှ် ဘိုၚ်ပံၚ်တောဲရေၚ်တၠုၚ်အာဏောၚ်။ အဓိက ပရေၚ်ပၞာန်ပါဏောၚ်၊ ပရေၚ်ဍုၚ်ကွာန်ပါဏောၚ်၊ ပရေၚ်ဘဏ္ဍာပါဏောၚ် ကိစ္စပရေၚ်ဍုၚ်ကွာန် ပရေၚ်ဖိတ်ဒရေဝ်တံ ပါလုပ်ဏောၚ်။ အဓိကဂှ် သွက်ဂွံပံၚ်တောဲရေၚ်တၠုၚ်အာ ပရေၚ်ပၞာန်၊ ပရေၚ်ဍုၚ်ကွာန် ပံၚ်တောဲကၠောန်အာကဵု ကရောံကောန်ဂကောံ Member နွံပ္ဍဲ SCEF တံ မွဲစွံဏောၚ်။ ကိစ္စတံဏံဂှ် ပိုဲတံသဳကၠဳလဝ် ပ္ဍဲအတေံနွံရ” သာ်ဝွံ သ္ဂးရ။
ပြဟ်ဟ်ဏံမ္ဂး ဂကောံဇြဟတ်ပၠန်ဂတး နွံမံၚ်ပ္ဍဲတွဵုရးမန်တံသီုဖအိုတ် သွက်ဂွံသ္ပစၞးတွဵုရး ဂစာန်မံၚ် ညံၚ်ဂွံပါလုပ်အာ ပ္ဍဲ SCEF မွဲကရောံမွဲစွံ မာန်ဂှ် အကြာညးတံကဵုညးတံလေဝ် ဆက်စၠောံရေၚ်တၠုၚ်မံၚ်ရောၚ် ညးဆက်ဟီုရ။
တုဲပၠန် အကြာ SCEF ကဵု ဂကောံပၠတရဴပၠန်ဂတး နူတွဵုရးမန်တံဆဵုဂဗလဝ်ဂှ်တှ်ေ နူကဵုလပါ် SCEF လေဝ် စပ်ကဵုတင်ရန်တၟအ် ပရေၚ်ဍုၚ်ကွာန်ညးတံ ဖန်ဖက်ရေၚ်တၠုၚ်မံၚ်ပြဟ်ဟ်ဏံကဵု ကိစ္စအာသဳယာန်တံဂှ်လေဝ် သဳကၠဳလဝ်ရောၚ် နာဲမန်သာၚ် ကဵုလဝ်သမ္တီရ။
ပ္ဍဲဂိတုဂျူလာၚ် ၂၁ တေံ SCEF ဆဵုဂဗလဝ် ညးတာလျိုၚ် နူကဵုကံၚ်သဳဖိတ်ဒရေဝ်တွဵုရးမန် MSFC၊ ဗော်ဍုၚ်မန်တၟိ (ဒစဵုဒစးတၠအဝဵုပၞာန်) NMSP-AD၊ ကံၚ်သဳပရေၚ်ကဵုကသပ်တွဵုရးမန် MSCC ကေုာံ ကမ္မတဳသ္ပစၞးစၠတ်ထဝ်တွဵုရးမန် CRMH တံရ။
နူကဵု SCEF တံ ပ္ဍဲဂိတုဂျူလာၚ် ၁၇ ဂှ် စဆဵုဂဗကၠုၚ်ကုညးတာလျိုၚ် နူယူနေတ်ဖိတ်ဒရေဝ်သကိုၚ်၊ ယူနေတ်ဖိတ်ဒရေဝ်မကွေ၊ အလဵုအသဳကေုာံ ညးတာလျိုၚ်စၠတ်ထဝ် နူဒေသမာန္တလေဝ်တံတုဲ၊ ဗွဲကြဴ ပ္ဍဲဂိတုဂျူလာၚ် ၂၀ ဂှ် ဆက်ဆဵုဂဗလဝ်ကဵုညးတာလျိုၚ် နူဂကောံမဟာမိတ်ဒပ်ပံၚ်တောဲ ပၠန်ဂတးတမ်ကညၚ် SRA ရ။
တုပ်သာ်ဂှ်ကီု ကုဂကောံဗၠးၜးကောန်ဂကူပအိုဝ် PNLO/PNLA၊ ကံၚ်သဳဖိတ်ဒရေဝ်ကောန်ဂကူပအိုဝ် PNFC ကေုာံ ဂကောံအာရက္ခ ULA/AA တံဂှ်လေဝ် ပ္ဍဲကဵုဂိတုဂျူလာၚ် ၂၂ -၂၃ ဏံဂှ် ဆဵုဂဗလဝ် ဗွဲတၞဟ်ခြာကီုရ။
နူကဵုပရေၚ်ဆဵုဂဗသာ်ဏံဂှ် ယဝ်ရဒှ်ကၠုၚ်ပရေၚ်ပံၚ်တောဲပါလုပ် ပ္ဍဲ SCEF မ္ဂး သွက်ပၠန်ဂတးတမ်ကညၚ် ဂွံအံၚ်ဇၞးဂှ် ကဆံၚ်တိုန်အာမာန်တုဲ သွက်ဂကောံဒပ်ပၠန်ဂတးဗလးတိတံဂှ်လေဝ် ဒှ်အာဇြဟတ်မွဲရောၚ် ဗိုလ်ဇၞော် CDM ဇြေန်ယဝ် သ္ၚဳဂၠိပ်လဝ်ရ ။
“ယဝ်ရ ပံၚ်တောဲပါလုပ်ကၠုၚ်မ္ဂး သွက်ပၠန်ဂတးတမ်ကညၚ် ဂွံအံၚ်ဇၞးဂှ် စိုပ်အာအကြာ ၇၀ / ၈၀ က္ဍိုပ်ကၠံမာန် တိုန်အာရ။ ဆဂး စပ်ကဵုပရေၚ်လလောၚ်တြး ဒပ်အာရက္ခတံမ္ဂး ပရေၚ်ပၞာန်၊ ပရေၚ်ဍုၚ်ကွာန်ချိုတ်တ်ပၠိုတ်တ်တံဂှ် ဂွံဆဵုအာ ဟွံသေၚ်ဏီပုဟ်။ သာ်ဂှ်တုဲ ပိုဲတံဒးမၚ်လ္ၚတ်အာမံၚ် သွဟ်ပေါဲဗတိုက်ဗလးတိတံရ၊ ဒှ်အကာဲအရာ ဒးပတေၚ်ဇြဟတ်တုဲ ဒးကၠောန်အာရောၚ်။ အခိၚ်လပါ်ဂကောံပၞာန်တံ ညံၚ်ရဴဂွံသာမံၚ် ပရေၚ်ပၞာန် ကေုာံ အဃော ဂစာန်ဖံက်လုပ်အာမံၚ် အကြာဍုၚ်ဗွိုၚ် ဒေသ ကေုာံ အာသဳယာန် နကဵုပရေၚ်ကလုတ်တံဏံဂှ် ပရေၚ်ဆဵုဂဗအကြာဂကောံဇြဟတ် ပၠန်ဂတးညးသ္ကံဏံဂှ် ဒှ်မံၚ်ဇြဟတ်မွဲ ကၠောန်ဗဒှ်လဝ်ကဵု ညံၚ်ဂကောံဒပ်ပၠန်ဂတးဗလးတိတံ ဂွံမိပ်အာစိုတ်ရောၚ် ဒးဟီုရ” သ္ဂးရ။
ဥက္ကဌ ULA/AA သ္ကိုပ်ပၞာန်ထောန်မျာတ်နိုၚ် ကေုာံ SCEF တံ ဆဵုဂဗလဝ် နူကဵုအန်လာၚ်တုဲ၊ သွက်ဂွံကဵုအရီုဗၚ် ပရေၚ်ဓရ်ဗ္စာရဏာမၞိဟ် ကုညးဒးဘဲဒဒိုက်ဍာ် ပ္ဍဲတွဵုရးရခေၚ်တံအရာကိစ္စ သွက်ကလေၚ်ပတန်လွဳအာတံဂှ် သဳကၠဳလဝ်အိုတ်ရ။
တုဲပၠန် စပ်ကဵုတၠုၚ်လအာပရေၚ်ဍုၚ်ကွာန် ပြဟ်ဟ်ဏံတုဲ သဳကၠဳပ္ညဳပ္ညပ်လဝ်ဂှ်ကီု နူကဵုက္ဍိုပ်သ္ကိုပ် SCEF တံလေဝ် ရန်တၟအ် ပရေၚ်ဒက်ပ္တန်ကေုာံ မူဝါဒ SCEF ရေၚ်တၠုၚ်မံၚ်ပြဟ်ဟ်ဏံကေုာံ လၟေၚ်ကမၠောန်ပရေၚ်အဓါန်ဂတ တံဂှ် ကဵုလဝ်သမ္တီရောၚ် ပ္ဍဲကဵုလိက်ပတိတ်လလောၚ်တြး ထမံက်ထ္ၜးချူလဝ်ရ။
အလဵုအသဳညဳသၟဟ်ကောန်ဂကူ NUG၊ ကမ္မတဳသ္ပစၞးစၠတ်ထဝ်ကၟိန်ဍုၚ် CRPH၊ မဟာမိတ်ကောန်ဍုၚ်အရၚ် KIO, KNU, CNF ကေုာံ KNPP တံ နူကဵုဂိတုမာတ်တေံ ဒက်ပ္တန်လဝ်ကံၚ်သဳပၠတရဴဖေက်ဒရေဝ် SCEF မဒှ်ရ။
ရန်တၟအ် SCEF ဂှ် ဒေါအ်ကၠေံထောံ ပရေၚ်ဒပ်ပၞာန်အုပ်ဓလီုလဝ်တံ သောၚ်ကလးဟိုတ်ပရူပရာ တမ်မူလပဋိပက္ခတံတုဲ ဒက်ပ္တန်ကၟိန်ဍုၚ်ပံၚ်ကောံဖေက်ဒရေဝ်ဒဳမဝ်ကရေသဳ သွက်ဂွံဒှ်အာ ပရေၚ်အပြံၚ်လှာဲဗီုပြၚ်ပရေၚ်ဍုၚ်ကွာန်ရောၚ် ပ္ဍဲဂိတုဂျူလာၚ် ၁၅ ဂှ် ကဵုလဝ်သမ္တီ ပတိတ်လဝ်လလောၚ်တြးရောၚ်။
ပရိုၚ် – သြၚ်လောန်တိုၚ်မ်
Photo – Social Media