ပလဝ်၊ ဂျူလာၚ် ၂၉
အပ္ဍဲကွာန်ဗိုၚ်ပျေၚ် ပွိုၚ်ဍုၚ်ပလဝ် ရးတနၚ်္သဳ ညးတြုံဒဴပၞာန်မွဲတၠ အခိၚ်ကလေၚ်စဴကၠုၚ်ကွာန် ကေတ်စၞစဇွောံမတံဂှ် ဒးဒုၚ်ပန်ကဵုသေနာတ်တုဲ ချိုတ်အာလဝ်ရောၚ် ဂွံတီကေတ် နူဂကောံဒပ်စဵုဒၞာညးဍုၚ်ကွာန် ဖျေံသ္ဇိုၚ်ပ္ဍဲဒေသတံရ။
အပ္ဍဲဂိတုဂျူလာၚ် ၂၆ အခိၚ် ၜိုတ်တ္ၚဲစေၚ် ၂ နာဍဳ ညးဒေသမၞိဟ်တြုံ ၃ တၠ ဂြိပ်ပါဲဒဴမံၚ်ပၞာန်တံ အဟိန်ကလေၚ်စဴကၠုၚ်ကွာန်ဂှ် ဂဗဆဵုဒးကဵုကောန်ပၞာန်ဒပ်ပၞာန်သီအဝဵု ဂေတ်ကၚ်မံၚ်တံတုဲဒးဒုၚ်ပန်လဝ်ရောၚ် သ္ဂးရ။
အခိၚ်စဴကၠုၚ်ကေတ်စၞစဇွောံမဂှ် ဆဵုဒးကဵုကရောၚ်ပၞာန်တုဲ ဗက်ထဍေၚ်ပန်ဂှ်တှ်ေ ပ္ဍဲမၞိဟ် ၃ တၠဂြိပ်တိတ်အာ ဂှ် ၂ တၠ ဗၠးအာကီုလေဝ်တုဲ ၁ တၠ ဒးမကမ်ဂှ်ရ ဂလုဲသှ်ေၜက်ဒၟံၚ်ရောၚ် ကောန်ဒပ် PDF ဖျေံသ္ဇိုၚ်ပ္ဍဲဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဟိုတ်နူဒးလဝ်ဝပ်မကမ်လွဟ်တုဲ ဇွကောန်ကွာန်သၞေဟ်ဇြပ် အာယုက် ၃၀ သၞာံ ချိုတ်အာဏံဂှ်တှ်ေ နူလပါ်ဒပ်ပၞာန်တံကၠဟ်ထောံစွံလဝ် အပ္ဍဲဒၞာဲချိုတ်အာဂှ်ရောၚ် သ္ဂးရ။
ရဲကွာန်သၞေဟ်ဇြပ်ကေုာံ ကွာန်ဗိုင်ပျေၚ်တံဂှ် စနူဂိတုတုဲကၠုၚ်တေံဂှ်ရ ဒးဂြိပ်ပါဲဒဴမံၚ်ဘဲပၞာန်ကီု ဟိုတ်နူဒးဂြိပ်ပါဲမံၚ်ဘဲပၞာန် အခိၚ်လံကၠုၚ်ဂှ်ရ စၞစဇွောံမအိုတ်အာတုဲ ဒးဇီုကပိုက်မံၚ်ကဵု ပရေၚ်အခက်အခုဲ နာနာသာ်တံရောၚ် ဂွံတီရ။
အပ္ဍဲဂိတုဂျူလာၚ် ၂၃ တုဲကၠုၚ်တေံလေဝ် ပွိုၚ်ဍုၚ်ပလဝ် ဒၞာဲဂၠံၚ်ပန်သွာၚ် ကွာန်တံၚ်ယာကာန်ဂှ် ညးဗြဴကပှ်ဟမိက်ပလၚ် ၁ တၠ ဒးမါၚ်တုဲ ချိုတ်အာလဝ်နွံမံၚ်ရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – Social Media