နေပျဳဒဝ်၊ ဂျူလာၚ် ၂၉
ပ္ဍဲကမၠောန်ကျာဖျတံ ပွမရပ်ချုက်ထိၚ်ဒဝ်လဝ်မၞိဟ်တံကီု ပွမရပ်ဓရတ်ထိၚ်လဝ်မၞိဟ်တံကီု သ္ပပကီုပရာတ်တုဲ ကဵုကၠောန် ကမၠောန်မ္ဂး နူကဵုစၠတ်ထဝ် ဒပ်ပၞာန်ဗၟာတံ ထံက်လဝ်ဂလာန်ဂှ် ပ္ဍဲဂျူလာၚ် ၂၈ တေံ သ္ပလဝ်ဒတန်ဥပဒေ သွက်ဂွံဖျေံဒုဟ်အမိၚ်ဂစိုတ် မဒှ်ရ။
တုဲကၠုၚ်ဂျူလာၚ် ၂၈ ဏံ ဒၞာဲနေပျဳဒဝ် အပ္ဍဲကောံဓရီု ပံၚ်တောဲစၠတ်ထဝ်ညးဍုၚ်ကွာန်ကဵု စၠတ်ထဝ်ကောန်ဂကူတံဂှ် အမာတ်စၠတ်ထဝ်ဂမၠိုၚ်တံ သ္ပလဝ်ဒတန် ပရေၚ်ပြံၚ်လှာဲ သွက်ဥပဒေအပြောံဏံတုဲ ကြဴနူဂှ် ဥပဒေဗတိုက်သရိုဟ် ကမၠောန်ကျာဖျ ဒှ်ကၠုၚ်ဒတန်ဂှ် ဥက္ကဌစၠတ်ထဝ်ကၟိန်ဍုၚ် ဥူအံၚ်လေၚ်ဒွေ ဟီုလဴပတိတ်လဝ်ရောၚ်။
အတိုၚ်တၚ်စၟတ်ပိုၚ်ခြာ ဥပဒေကဵုလဝ်အခေါၚ် ပရေၚ်ဖျေံဒုဟ်အမိၚ်ဂစိုတ်တံဂှ် ဆက်နွံအာမံၚ် အတိုၚ်ဗီုကၠာတေံဖိုဟ်ရောၚ် ညးစၞးစၠတ်ထဝ်ညးဍုၚ်ကွာန် ဥူဧဆာန် သ္ပလဝ်ဒတန် ကုဌာန်ပရိုၚ် AFP ရ ။
ကြဴနူပရေၚ်သဳကၠဳ အကြာစၠတ်ထဝ်ညးဍုၚ်ကွာန် ကဵု စၠတ်ထဝ်ကောန်ဂကူတံတုဲ လတူဥပဒေအပြောံ ပတိုန်ထ္ၜးလဝ်ဂှ် ပရေၚ်အပြံၚ်လှာဲဂၠိုၚ်ၚ် ကၠောန်လဝ်ဟၟဲပုဟ်။
သ္ကုတ်ကိစ္စဇၞော်ဇၞော် နူမံၚ်ပ္ဍဲဥပဒေအပြောံဂှ် ဆက်နွံအာမံၚ် အတိုၚ်တြေံရောၚ် ညးစၞးစၠတ်ထဝ် ဥူဧဆာန် ဟီုရ။
သွက်ဂွံကၠောန်ကမၠောန် ကျာဖျတံတုဲ စကာအာမၞိဟ်မွဲမွဲတၠ နကဵုအတေၚ်အဓ္ဓမ၊ ပွမဖန်ဖက်လဝ် ကြီုကြီုဓဇန်ဓဇန်၊ ပွမရပ်လဝ်ဟၟဲကဵုပရေၚ်ဓဝ်ဍာံ၊ ပွမကၠောန်ပကီုပရာတ် ကေုာံ ပျဲပျာံတံမ္ဂး သွက်ညးတၠတဲကၠောန်လဝ်ပွတံဏံဂှ် ဒုဟ်ဂစိုတ်ဟွံက သီုဖျေံဒုဟ်ထံၚ် စနူ ၁၀ သၞာံ စဵုကဵုဒုဟ်ထံၚ် မွဲအာယုက်ရောၚ် ပ္ဍဲဥပဒေအပြောံတေံ ချူခၞံလဝ်ရ။
ယဝ်ရဖံက်ပကဝ် ဥပဒေဏံကီုဒှ် ကၠောန်လဝ်ညံၚ်ဂွံမၞိဟ်ချိုတ်လဝ်ကီုဒှ် လတူညးတၠတဲတံဂှ် ဒးဖျေံဒုဟ်အမိၚ်ဂစိုတ်ရောၚ် ပ္ဍဲတၚ်ခုတ်ခၞံစုတ်လဝ်ဥပဒေဂှ် ထမံက်ကဵုလဝ်ရောၚ်။
ညးကၠောန်ကမၠောန်ကျာဖျတံဂှ်မ္ဂး ဒုဟ်ထံၚ်သၠုၚ်အိုတ် ဒးဖျေံမွဲအာယုက်ရောၚ် သာ်ဝွံလေဝ် ပ္ဍဲတၚ်စၟတ်ပိုၚ်ခြာတံ ချူလဝ်ရ။
ပ္ဍဲဒေသအာယှအဂၞဲ ကမၠောန်ကျာဖျတံ ဇၞော်မောဝ်ဂၠိုၚ်တိုန်ကၠုၚ်မံၚ်တုဲ နဒဒှ်သ္ကုတ်မွဲ ပ္ဍဲကဵုဍုၚ်ဗၟာ အကြာပေါဲပၞာန်အပ္ဍဲဍုၚ်ဏံ ဒှ်မံၚ်ဂှ် ကမၠောန်ကျာဖျတံ ဗွဲမလှဲလး က္တဵုဒှ်ကၠုၚ်မံၚ်ရောၚ်။
ကမၠောန်ကျာဖျတံဂှ် နူအန်လာၚ်မွဲအဆံၚ် ဟီုဂးပရေၚ်ကဝေၚ်ဆာန်ညးသ္ကံတုဲ လီဠာန်ကေတ်လဝ်မွဲကဆံၚ် ဖတိုက်ဖ္အောဝ် ပၠုပ်ဏာစိုတ် ကဵုဓလိုက်တမ်ရိုဟ်တံတုဲ နူမၞိဟ်ပြကောဋိကိုတ်ပြၚ်အလုံဂၠးကဝ်တံဂှ် လီကေတ်မံၚ်သြန်ဒဝ်လာ ဗဳလဳယာန် ဗွဲမဂၠိုၚ် လၟေၚ်သၞာံရောၚ်။
ပ္ဍဲကမၠောန်ညးတံမ္ဂး သွက်ဂွံစကာကမၠောန်တံဂှ်လေဝ် လီကော်ကောန်ကမၠောန် နူအလုံဂၠးကဝ်တံ ဟွံသေၚ်မ္ဂး နူကဵုပရေၚ်ကူသာန်ပလံၚ်မၞိဟ်တံဂှ် ကော်နၚ်တုဲ ကရေပ်ဓရတ်တုဲ ကဵုကၠောန်အာကမၠောန်တံ နွံမံၚ်ရောၚ်။
Ref:AFP/Dailymail