မတ်မလီု၊ ဂျူလာၚ် ၂၉
လတူကွဳပၟတ်မြက် စက်ဟဂံက်ကျာပါ မတ်မလီု-လ္ဂုၚ် ညံၚ်ရဲအာတရဴတံဂွံဒှ်ဒဒိုက်စိုတ် ဒဝ်မျတာန်မပါလုပ် ၅၄ တၠ ကညာၚ်မိပ်ညာန်လဝ်တံဂှ် ဒးဒုၚ်ဖျေံအမိၚ်တပ်ဒါဏ်သြန် ညးမွဲမွဲကိုတ်ဒကေဝ်ရဂှ် ညးကြပ်ကဵုရုၚ်သၞောဝ်ဓရ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲကဵုဂိတုဂျူလာၚ် ၂၇ တုဲကၠုၚ်ဏံ အတိုၚ်ၝောံပိုဒ် ၈၈(က) ဥပဒေ ကမၠောန်ပလံၚ်ဗ္စိုပ်ကွဳပၟတ်ဂှ် နူရုၚ်သၞောဝ်ဓရ် ပွိုၚ်ဍုၚ်မတ်မလီု ဖျေံအမိၚ်တပ်ဒါဏ်သြန် ကုအစာဗြဴမတ်မလီု ဂကောံဒဝ်မျတာန် ၅၄ တၠ တံ ညးမွဲမွဲကိုတ်ဒကေဝ် ရ။
လတူပရေၚ် ဂကောံဒဝ်မျတာန် ၅၄ တၠတံ ကညာၚ်မိပ်ညာန်လဝ်လတူကွဳပၟတ်ဂှ် ဖျေံအမိၚ်တပ်ဏာဒါဏ်သြန် ၜိုတ်ညးမွဲမွဲကိုတ်ဒကေဝ်ဓဝ်ဂှ်ရ ပ္ဍဲဇာဖိုၚ်မှာဇန် ပရေၚ်ပါ်ပါဲတံနွံမံၚ်တုဲ ပရေၚ်ပျုတ်ဗဒေက်လဝ် လတူစဳရင်လဝ်သၞောဝ်ဓရ်တံဂှ်လေဝ် နွံမံၚ် မဒှ်ရ။
အပ္ဍဲဂဗုတ်ဏံမ္ဂး ကဆံၚ်နာဲဗစာ တွဵုရး-ခရိုၚ်-ပွိုၚ်ဍုၚ်၊ ညးတာလျိုၚ်ဥပဒေ၊ စနူကဵုညးတာလျိုၚ်နူဒပ်ဗၠာဲသၟိၚ်တံဂှ် ပရေၚ်စလဝ်လာပ်ဗဇဴ သြန်ကဵုကိုတ်လ္ၚီတံနွံမံၚ်ရောၚ် ညးကြပ်ကဵုရုၚ်သၞောဝ်ဓရ်တံ သ္ဂးရ။
အပ္ဍဲဂကောံဒဝ်မျတာန် ရဲဒးဒုၚ်ဖျေံအမိၚ် တပ်ဏာဒါဏ်သြန် ညးမွဲမွဲကိုတ် ညးပါလုပ်မံၚ်တံဂှ် ဒှ်မံၚ်သမ္ဘာ တၠကမၠောန်ပိုန်ဒြပ်အဆံၚ်သၠုၚ် ဍုၚ်မတ်မလီုတံကီု၊ သမ္ဘာညးတာဇၞော်ဇၞော်ဌာနနာနာတံကီု ကေုာံ သမ္ဘာညးတာလျိုၚ်ပၞာန်တံလေဝ် ပါလုပ်မံၚ်ဂၠိုၚ်ရောၚ်။
ပ္ဍဲဂိတုဂျူလာၚ် ၂၃ တုဲကၠုၚ်တေံ လ္တူကွဳပၟတ်မြက်ပြဟ် DEMU မတ်မလီု-လ္ဂုၚ်ဂှ် ဂကောံဝေၚ်ဒြဟတ် ဇိုၚ်ပြၚ်ၜဳမတ်မလီု အစာဗြဴဒဝ်မျတာန် သ္ကိုပ်သ္ကလဝ်တံဂှ် သွက်ရဲညးအာတရဴတံ ဂွံဒှ်ဒဒိုက်စိုတ် ကညာၚ်ဖအဴညာန် လှ်ေကွာဲဝေၚ်ဂြိုၚ်လဝ် လ္တူကွဳပၟတ်ဂှ်ရောၚ်။
ဟိုတ်နူပရူရာဏံတုဲ ပ္ဍဲမုက်လိက်ဇာဖိုၚ်မှာဇန်တံ ပရေၚ်အာတ်မိက် သွက်ဂွံကေတ်ကဵုအရေဝ် ဂၠိုၚ်တိုန်ကၠုၚ်ဂှ်ရ နူကဵုဂကောံအလဵုအသဳ ဒပ်ပၞာန်ပံက်လဝ်အမှု နကဵုၝောံပိုဒ် ၈၈(က) ဥပဒေကမၠောန်ပလံၚ်ဗ္စိုပ်ကွဳပၟတ်ဂှ် ကေတ်လဝ်အရေဝ်ရောၚ်။
အတိုၚ်ၝောံပိုဒ် ၈၈(က) ဥပဒေကမၠောန်ပလံၚ်ဗ္စိုပ်ကွဳပၟတ် ဒဝ်မျတာန် မပါလုပ်၅၄ တၠ ဒးဒုၚ်ပံက်လဝ်အမှုဏံဂှ် ယဝ်ရဒုဟ်နွံမ္ဂး ဒးဒုၚ်ဒုဟ်ထံၚ် ဟွံလောန်ၜက်နူပွိုၚ် ၃ ဂိတုဒှ်ဒှ်၊ သြန်ဒါဏ်အောန်အိုတ်နူ ၁ ဠက် စဵုကဵု ၁ ကိုတ်ဒကေဝ်ဒှ်ဒှ်၊ ဒုဟ်ဒဏ်သီုၜါသာ်ဒှ်ဒှ် ဖျေံမာန်ရောၚ် ချူခၞံလဝ်နွံရ။
ပ္ဍဲဂိတုဂျူလာၚ် ၂၁ တုဲကၠုၚ်တေံလေဝ် လ္တူကွဳပၟတ်မြက်ပြဟ် လ္ဂုၚ် – မာန္တလေဝ်ဂှ် ညးဗြဴပန်တၠ ဟိုတ်နူဟီုအရေဝ် ရမျှာၚ်ထတ်ညာန်အာ၊ စဇဗၠု၊ ကဵုပွဳဗွိုၚ်ညံၚ်ဂွံကၠိပပ်အာ ကၠောန်လဝ်တုဲ ဒးဒုၚ်ဖျေံဒုဟ်ထံၚ် ၂ ဂိတု နွံရ။
ပရိုၚ် – သြၚ်လောန်တိုၚ်မ်
Photo – Social Media