မကွေ၊ ဂျူလာၚ် ၂၉
အပ္ဍဲပွိုၚ်ဍုၚ်သဝ် ရးမကွေ ပေါဲဗတိုက်ဒှ်လဝ်ဂှ်ရ ရပ်သီဂွံလဝ်ဂၠုဲပၞာန် ကေုာံလွဟ်မကမ်ဗွဲမဂၠိုၚ် နူကဵုဒပ်ပၞာန်သီအဝဵုတံရောၚ် ဌာန်ဂအုပ်ပၞာန် ရးမကွေ လလောၚ်တြးလဝ်ပရိုၚ်ရ။
အပ္ဍဲဂိတုဂျူလာၚ် ၁၆ ကဵု၂၅ တေံ ကရောၚ်ပၞာန်ဒပ်ပၞာန်သီအဝဵု နူပွိုၚ်တိုက်လံၚ်ယှေ ပတဝ်လဝ်က္ဍိုပ် လုပ်ကၠုၚ်ဍုၚ်သဝ်ဂှ် ဒးဒုၚ်ကြတ်ဗတိုက်လဝ်ရောၚ်။
အပ္ဍဲပေါဲဗတိုက်တံဂှ် လပါ်ဒပ်ပၞာန်သီအဝဵု ဒးဒုၚ်ဗတိုက်ဂိလောန်အာတုဲ အဟိန်ဂြိပ်ပါဲဆုတ်တိတ်အာဂှ် နူကဵုဂကောံ ဒပ်စဵုဒၞာတံထဍေၚ်ဗက်ဗတိုက်လဝ်တုဲ ရပ်သီဂွံလဝ်လွဟ်မကမ်ဂမၠိုၚ်ကဵု ဂၠုဲပၞာန်တံရောၚ် ဂွံတီရ။
အပ္ဍဲကဵုပေါဲဗတိုက် ဂိတုဂျူလာၚ် ၁၆ ဂှ် ဗက်ဍံၚ်ဗတိုက်လဝ် ကရောၚ်ပၞာန်ဒပ်ပၞာန်သီအဝဵု ဇြဟတ် ၃၀ တံတုဲ ရပ်သီဂွံလဝ်လွဟ်မကမ်၊ ကွဳစက်ဖ္ဍိုက် စၞစဇွောံမ ၃ မ၊ စၞစဇွောံမတံကဵု ကပေါတ်သုၚ်စောဲပၞာန်တံဂှ်ရောၚ် ဂွံတီရ။
အပ္ဍဲဂိတုဂျူလာၚ် ၂၅ ဂှ် လပါ်ဒပ်ပၞာန်သီအဝဵု ဇြဟတ် ၁၈၀ တံ ကေတ်အရီုဗၚ်ဗလးကျာတုဲ နူကဵုလံၚ်ယှေ ပတဝ်က္ဍိုပ်လပါ်ပွိုၚ်ဍုၚ်သဝ်တုဲ ကရောၚ်ပၞာန်ထပက်လုပ်ကၠုၚ်မံၚ်ရောၚ် ဂွံတီရ။
ကရောၚ်ပၞာန်ဝွံ ဂကောံဒပ်စဵုဒၞာတံ ဒၞာဗဒေါအ် တတ်ဗတိုက်လဝ်မာန်ဂှ်ကီု ပ္ဍဲအခိၚ်ကလေၚ်ဆုတ်အာဂှ် ထဍေၚ်ဗက်ဗတိုက်တုဲ ရပ်ဂွံလဝ်ဂၠုဲပၞာန် ၉ တၠဂှ်ရောၚ် ဂွံတီရ။
ပ္ဍဲပွိုၚ်တိုက် လံၚ်ယှေဂှ် ရုၚ်စက်ကၠောန်ပတိတ်ကပေါတ် ဒပ်ပၞာန်ဗမာ ကပစ-၂၅ နွံမံၚ်တုဲ၊ နူဏံမွဲကဆံၚ် သွက်ဂွံထပ်ဗပေၚ် ဇြဟတ် လပါ်ပွိုၚ်ဍုၚ်သဝ်ဂှ် ထပက်မံၚ်ကရောၚ်ပၞာန်တုဲ စဵုကဵုဂျူလာၚ် ၂၈ ဂှ် ပေါဲဗတိုက်ဇၞော်ကဵုဇြဟတ် ဆက်ဒှ်မံၚ်ဖိုဟ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – PDF