ၜဳကလေၚ်၊ ဂျူလာၚ် ၂၉
အပ္ဍဲပွိုၚ်ဍုၚ်ၜဳကလေၚ် တွဵုရးမန် အပ္ဍဲပွိုၚ်မွဲသတ္တဟဏံ နူကဵုဒပ်ပၞာန်သီအဝဵုတံ တံၚ်ရပ်ဏာပဝ်တာသၟတ် ၁၇ တၠရဂှ် ညးဒေသတံ ဟီုလဴကဵုလဝ်ရ။
စနူဂိတုဂျူလာၚ် ၂၀ စဵုကဵု ၂၇ အပ္ဍဲပွိုၚ်အကြာကာလဏံဂှ် အပ္ဍဲကဵုဂၠံၚ်လ္တူဍုၚ်တံကီု အကြာဂၠံၚ်ဆက်လဝ် ကွာန်ကဵုကွာန်တံဂှ်ကီု ဒပ်ပၞာန်ဗၟာဗက်ရပ်မံၚ်သၟတ်တံရောၚ်။
ဗီုအခိၚ်ကၠာတေံ ဗက်ရပ်မံၚ်အကြာအခိၚ်ဗ္တံတံဟွံသေၚ်တုဲ၊ စိုပ်သဝ်တ္ၚဲ အခိၚ်သၟတ်တံကလေၚ်စဴနူကမၠောန်ဂှ် ပတဝ်စွံလဝ်တုဲ ဗက်ရပ်ကေတ်မံၚ်ရောၚ် ညးမံၚ်လ္တူဍုၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သၟတ်ဒးဒုၚ်ရပ်ဏာလဝ်တံဂှ် နွံမံၚ်အကြာ အာယုက် ၂၀ သၞာံ ၃၀ သၞာံတုဲ ရဲကွာန်စးကရုတ်ကဵု ကွာန်ပၞၚ်ဇြဲတံ ဂၠိုၚ်အိုတ်ရောၚ် သ္ဂးရ။
အပ္ဍဲဗ္ဒိုပ်ဗၠာဲသၟိၚ်ၜဳကလေၚ် ကောန်ပၞာန်ဗမာ ရပ်ချုက်ခြိုၚ်စွံလဝ် သၟတ်တံဏံဂှ်တှ်ေ အာတ်လဝ်သြန် ညးဒးဒုၚ်ရပ်လဝ် ပ္ဍဲ ၃ တၠဏံဂှ် ၁၀၀ ကိုတ်တုဲ ကလေၚ်ဗလးဖျဴကဵုလဝ်ကီုလေဝ်၊ သၟတ်ကဵုသြန်ဟွံမာန်တံဂှ် ဆက်တုဲဒးဒုၚ်ရပ်ထိၚ်လဝ်ဖိုဟ်ရ။
တုဲပၠန် ဂကောံဒပ်ပၞာန်ကဵု ပျုသဝ်ထဳတံဂှ် ပ္ဍဲဂိက်ကံက်သၠာကွဳစက် ပါၚ်လုပ်ဍုၚ်ၜဳကလေၚ်ကီု ပ္ဍဲဂိက်စၟဳစၟတ် မုက်ပါၚ်လုပ်ဂၠံၚ် ရုၚ်စက်သဂြာ ၜဳကလေၚ်တံဂှ် သၟတ်ဍိုက်ကၠုၚ်ကွဳစက် အာတရဴတံဂှ်တှ်ေ စၟဳစၟတ်တုဲရပ်မံၚ်ရောၚ် ဂွံတီရ။
ပ္ဍဲဂိတုအေဗရာ တုဲကၠုၚ်တေံလေဝ် ပ္ဍဲသကုတ်ဂၠံၚ် ၜဳကလေၚ်-ယှိုဲလှေဂှ် ဒပ်ပၞာန်ဗမာ ရပ်ဏာပဝ်တာသၟတ် ၂၃ တၠတံတုဲ ပလံၚ်ဗစိုပ်ဏာလဝ် ပ္ဍဲကဵုဒၞာဲဘာတန်ဗတောန် ယိုက်ဝန်ပၞာန်ဂှ်လေဝ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media