တဳဟဳရာန်၊ ဇူလာၚ် ၃၀
အပ္ဍဲပွိုၚ်မွဲၜါသတ္တဟဏံမ္ဂး လွဟ်ကမ်သၠောဝ် ပရေၚ်စဵုဒၞာဗလးကျာ လံၚ်ဆာယိုက်လ္တူပၞး ၄၀၀ မ ပတိတ်လဝ်နူဍုၚ်ကြုက် တံဂှ် အဳရာန် သွက်ဂွံကလိဂွံဒုၚ်တဲကေတ် အသုတ်ပထမကၠာအိုတ်ရောၚ် အတိုၚ်ရိုဟ်ကၞက်ပရိုၚ် ၃ ဒၞာဲ နွံကြပ်ကဵု တၚ်တုပ်စိုတ်တံ ဟီုကဵု ဌာန်ပရိုၚ်ရိုက်တာ ရ။
အပ္ဍဲအခိၚ် အဟိန်ဒှ်မံၚ်ပေါဲပၞာန်ကဵု အမေရိကာန်ဏံ အဳရာန် ကလေၚ်ဒက်ပ္တန်မံၚ် ပရေၚ်စဵုဒၞာညးတံတုဲ ပရိုၚ်သာ်ဏံ မံက်တိတ်ကၠုၚ် မဒှ်ရ။
ပရေၚ် ၚုဟ်မးရာန်ကေတ် အကြာဒဝ်လာအမေရိကာန် ၆၀- ၇၀ ပြကောတိကိုတ်ဏံဂှ် ဒှ်မံၚ် ပရေၚ်ဂိုတ်ဂစာန်ဇၞော်အိုတ်မွဲ နူတဳဟဳရာန် သွက်ဂွံသၠုၚ်ပတိုန်အာ ဇြဟတ်ပရေၚ်စဵုဒၞာ ဗလးကျာတရဴဇမၠိ ကြဴနူ စဒှ်လဝ်ပေါဲပၞာန် အမေရိကာန်၊ အေတ်သရေဝ် တံရောၚ်။
ဇြဟတ်ပၞာန် အမေရိကာန် ကဵု အေတ်သရေဝ်တံဂှ် ထ္ၜးဒၟံၚ် ဒၞာဲပၞော်အကြာ ဍာ်ဒကေဝ်ပရေၚ်စဵုဒၞာဒၞာဲဝါဲပၞာန် ကေုာံ စမြိုၚ်သ္ဇိုၚ် အပ္ဍဲအဳရာန်တံ ရ။
အဳရာန် ထ္ပက်လဝ်လိက်ကသုက် သွက်ဂွံရာန် သၞောတ်ပရေၚ်စဵုဒၞာဗလးကျာ ယိုက်ကဵုမၞိဟ် ပတိတ်နူဍုၚ်ကြုက် အကြာ ၃၀၀- ၄၀၀ မ ပါလုပ်သီုကမ်သၠောဝ် QW-12 ကေုာံ FN-16 တံရောၚ် ရိုဟ်ကၞက်ပရိုၚ်တံဟီုရ။
ကမၠောန်ဓလိုက်တမ်ရိုဟ်ဂၠးကဝ် ကျံၚ်ကျာန်ပဝ်ယှာန် ဖျေံလဝ်သ္ဇိုၚ်ဟံၚ်ကံၚ်ဂှ် နကဵုပရေၚ်ဒုၚ်မၞိဟ်အကြာ အဳရာန် ကဵု ကြုက်တံတုဲ ထ္ပက်လဝ်စၟတ်တဲ တၚ်တုပ်စိုတ်ဂှ်ရောၚ် ဂွံတီကေတ်ရ။
သွက်ဂွံသ္ပတၚ်သမ္တီမာန် ၜိုန်ရဆက်စၠောံလဝ် ဌာနဝန်ဇၞော်ပရေၚ်ဍုၚ်သအာၚ် အဳရာန်ကီုလေဝ် ပရေၚ်ဟီုခၠေဝ်လဝ်ဟၟဲပုဟ် နူကဵုဌာန်ပရိုၚ်ရိုက်တာ ဟီုရ။
ပရေၚ်ကေၚ်ကာဏံဂှ် ဒှ်မံၚ်အရာနွံကဵုဘဲအန္တရာဲမာန်တုဲ ရိုဟ်ကၞက်ပရိုၚ်တံဂှ် ဟွံထမံက်ယၟုတုဲ ဟီုလဴလဝ်ရောၚ်။
ပ္ဍဲအရာ သွက်ပရေၚ်ၜိုဟ်လလမ် ဂွံတောတက်တိုန်အာ အရာပဋိပက္ခတံ ဂွံအိုတ်အာဂှ် နူဍုၚ်ကြုက် နကဵုကဏ္ဍမွဲမွဲ ပါလုပ်မံၚ်လၟိုန်တုဲ ပရိုၚ်တံဏံ ဒှ်ဟွံမာန်ပုဟ် ဌာနဝန်ဇၞော်ပရေၚ်ဍုၚ်သအာၚ်ကြုက် ဟီုရ။
အခိၚ်ဆက်စၠောံသၟာန်အာ ကာန်ပနဳဖျေံသ္ဇိုၚ်ဟံၚ်ကံၚ် ဟီုမံၚ်ထ္ပက်လဝ်စၟတ်တဲ တၚ်တုပ်စိုတ်ဂှ်လေဝ် ပရေၚ်ခၠေဝ်သှ်ဟၟဲပုဟ် ဂွံတီကေတ်ရ။
ကြဴနူ အမေရိကာန် ကဵု အေတ်သရေဝ်တံ ဗတိုက်သ္အးဇ္ၚးထောံ ကမ်သၠောဝ်တံ၊ ဒရုၚ်တံ ကေုာံ ကိုန်အစဳဇန်စဵုဒၞာဗလးကျာတံ လံမံၚ်ကဵုဂိတုတုဲ နူကဵုအဳရာန် နွံမံၚ်ပၟိက် ဒးထပ်ဗပေၚ်လွဟ်တံရောၚ်။
ပေါဲပၞာန်ဏံဝွံ ထမံက်ထ္ၜးမံၚ် တၚ်ကော်ဆော သွက်ဂွံစဵုဒၞာ နူဘဲအန္တရာဲ ကမ်သၞောဝ်ထိၚ်သၞေဝ် ပန်ဗတိုက်တဝ်ဝ် နကဵုၜၚ်ကျာဗတိုက်အဆံၚ်သၠုၚ်တံ လတူဗ္ဒိုပ်ပၞာန် ဗျူဟာနွံတံရောၚ် တၠပညာလွဟ်တံ ဟီုလဴလဝ်ရ။
Ref:Reuters