နေပျဳဒဝ်၊ ဂိတုအဝ်ဂတ် ၁
အပ္ဍဲကဵုရးနိဂီုဍုၚ် သွက်ဂွံကလိဂွံအာအစောန်စရာဲ ပရေၚ်စဵုဒၞာကေုာံ အစောန်စရာဲပရေၚ်ဂီုကၠီု ညံၚ်ဂွံရှ်ေသှ်ေအဲပရဲထေက်တံတုဲ ဆက်စကာအာသၞောဝ်ဥပဒေယိုက်ဝန်ပၞာန် ညးဍုၚ်ကွာန်ရောၚ် သမ္မတသီအဝဵု ဥူမေန်အံၚ်လှိုၚ် ဟီုလဝ်ရ။
အပ္ဍဲကောံဓရီုစၠတ်ထဝ် ကၟိန်ဍုၚ်နေပျဳဒဝ် ကၠောန်လဝ် ဂိတုဂျူလာၚ် ၃၁ တေံ အခိၚ်သမ္မတ ဟီုမံၚ်ဂလာန် ကိုန်အစဳဇန်ပွိုၚ် ၁၀၀ တ္ၚဲ အလဵုအသဳပၞာန်ပြံၚ်လဝ်ဗီုပြၚ်ဂှ် ဥူမေန်အံၚ်လှိုၚ် ထပ်ဗပေၚ်ဟီုဏာလဝ် မဒှ်ရ။
သွက်ဂွံစဵုဒၞာအာ ရးနိဂီုဍုၚ် ညံၚ်ဂွံဒှ်ဒပ်ပၞာန်ဂတာပ်ခေတ် နွံကဵုအစောန်ဇြဟတ်ဗတိုက်၊ အစောန်စရာဲဗတိုက်တံမာန်ဂှ် ဒက်ပ္တန်အာတုဲ၊ ဇြဟတ်ဗတိုက် ညံၚ်ဂွံနွံအာပေၚ်ၚ်ဂှ် သွက်ဂွံဂွံ ရိုဟ်ကၞက် အရာနွံပၟိက်တံမာန် ဆက်တုဲဗပေၚ်ကဵုအာရောၚ် ဥူမေန်အံၚ်လှိုၚ် သ္ဂးရ။
တုဲပၠန် အတိုၚ်ၝောံပိုဒ် ၃၄၀ သ္ဇိုၚ်သၞောဝ်ဥပဒေ ၂၀၀၈ ဂှ်တုဲ ပ္ဍဲပရေၚ်ဂီုကၠီု ပရေၚ်စဵုဒၞာရးနိဂီုဍုၚ်မ္ဂး အလုံညးဍုၚ်ကွာန်တံညံၚ်ဂွံပါလုပ်အာမာန်ဂှ် နူကဵုဒပ်ပၞာန်ပၠတရဴတုဲ ဒးထမံက်အာရုပ်ရဴဗျူဟာဒပ်မၚ်ကွာန်ရောၚ် ဟီုရ။
သွက်အဝဵုဂကောံပၞာန်သီအဝဵု ညးတံဂွံတန်ကြန်အာတုဲ ပ္ဍဲသၞာံ ၂၀၂၄ ဂိတုဖေဖဝ်ဝါရဳ ၁၀ တေံဂှ် စထမံက်ကၠုၚ်ရုပ်ရဴ ပၠုပ်လဝ်လမျီု သၞောဝ်ဥပဒေယိုက်ဝန်ပၞာန်ညးဍုၚ်ကွာန် မဒှ်ရ။
ကြဴနူ စထမံက်ရုပ်ရဴပရေၚ်ယိုက်ဝန်ပၞာန်ဏံတုဲ သွက်ဂွံဂွံကောန်ပၞာန် နကဵုနဲကဲနာနာဗက်ပကောံကေတ်လဝ် သၟတ်တံတုဲ ပံက်ကၠုၚ်လဝ်တန်ဗ္တောန်ဘာပၞာန် စနူလၟေၚ် ၁ စဵုကဵုလၟေၚ် ၂၆ စိုပ်အာယျ။
မွဲလပါ်ပၠန် ဒပ်ပၞာန်သီအဝဵု ကဵု ဂကောံသၟဝ်တဲညးတံဂှ် သၟတ်တံစိုပ်အဝဲလုပ်အဝေါၚ်ယိုက်ဝန်ပၞာန်မ္ဂး အတေၚ်အဓမ္မရပ်ဏာပဝ်တာကီု ကလေၚ်သွံလဝ် နကဵုသြန်ကဵုကိုတ်ဗွဲမဂၠိုၚ်တံလေဝ် ကၠောန်စမံၚ်အိုတ်ရ။
ဟိုတ်နူသၞောဝ်ဥပဒေယိုက်ဝန်ပၞာန် ဂကောံပၞာန်သီအဝဵုတံတုဲ အပ္ဍဲဍုၚ် သၟာကမၠောန်အောန်စှ်ေအာကီု၊ သၟတ်တံဗွဲမဂၠိုၚ် တိတ်အာဍုၚ်သအာၚ်ဂၠိုၚ်မံၚ်တုဲ ဒးဆဵုဂဗမံၚ်ကဵုပြသၞာရိုဟ်ကၞက် တမ်ဇြဟတ်မၞိဟ်ဆောံလေၚ်ဇၞော်ကဵုဇြဟတ် ဒှ်ကၠုၚ်ပရေၚ်ဇီုကပိုက်တံ နွံမံၚ်ရ။
ပရိုၚ် – သြၚ်လောန်တိုၚ်မ်
Photo – MOI