ဗြဝတဳ၊ အဝ်ဂတ် ၁
နူကဵုတမ်ဒပ် လၟိဟ် ၂၇ ဒပ်ပၞာန်ဗၠးၜးကောန်ဂကူကရေၚ် KNLA သ္ကိုပ်ဒပ်ပါ် ဗိုလ်ကျဝ်တိတ်ကဵုကောန်ပၞာန် ၃၅၀ တၠတံ ကလေၚ်ပံၚ်ကောံကၠုၚ်လဝ်ရဂှ် ဒပ်ပၞာန်ကရေၚ်ပတုဲဖဵုဒဳမဝ်ကရေသဳ DKBA ပတိတ်လဝ် လိက်လလောၚ်တြး ပ္ဍဲဂိတုဂျူလာၚ် ၃၁ တေံရ။
သ္ကိုပ်ကောပ်ကာဲပၞာန် ကလိုထူဝါတြေံ ဒုသ္ကိုပ်ပၞာန် သဝ်ကျဝ်တိတ် နူကဵုဒပ်ပၞာန်ကရေၚ်ပတုဲဖဵု ဒဳမဝ်ကရေသဳ DKBA ဂှ် ကလေၚ်သ္ပစၟတ်သမ္တီပရေၚ်ပံၚ်ကောံညးသ္ကံတုဲ ခါန်ကၞက်ကဵုအာတာလျိုၚ် ကု သ္ကိုပ်ကောပ်ကာဲပၞာန် စၟတ် (၃) သ္ဂးရ။
ဒုသ္ကိုပ်ပၞာန်သဝ်ကျဝ်တိတ် ကလေၚ်ပံၚ်ကောံကဵု DKBA ဏံဂှ် ပ္ဍဲအကြာပွဳဗွိုၚ်ပၠန်ဂတးတံ ယၟုပြာကတ်မံၚ် ဗိုလ်ကျဝ်တိတ်တုဲ အပ္ဍဲကာလပရေၚ်သီအဝဵုဏံ ဒှ်မၞိဟ်လုပ်ပေါဲဗတိုက်သီဍုၚ်၊ သီဗ္ဒိုပ်ပၞာန်ဗမာတံ မွဲတၠရ။
ဒုသ္ကိုပ်ပၞာန် သဝ်ကျဝ်တိတ် သ္ကိုပ်သ္ကလဝ်ကောန်ပၞာန် DKBA တံဂှ် ပ္ဍဲဂိတုဂျူလာၚ် သၞာံ ၂၀၁၅ တေံ ဟိုတ်နူဒှ်လဝ်ပေါဲဗတိုက်ကဵု ဒပ်ပၞာန်သီအဝဵုတံတုဲ ပတိတ်ထောံလဝ် နူကဵုဂကောံဒပ်ပၞာန်ကရေၚ် ပတုဲဖဵုဒဳမဝ်ကရေသဳ DKBA ပိုတ်တ်နွံရ။
စပ်ကဵု ဒုသ္ကိုပ်ပၞာန် သဝ်ကျဝ်တိတ်ကဵု ကောန်ပၞာန်ၜိုတ် ၃၅၀ တၠတံ ကလေၚ်ပံၚ်ကောံကဵု DKBA ဂှ်တုဲ နူကဵုဗဟဵုဗော်သွးကောန်ဂကူကရေၚ် KNU စဵုကဵုလၟုဟ် လလောၚ်တြးပတိတ်လဝ်ပရိုၚ် မုလေဝ်ဟွံဂွံဆဵုလဝ်ဏီပုဟ်။
ဗိုလ်ကျဝ်တိတ်ကဵု ကောန်ပၞာန်ၜိုတ် ၃၅၀ တၠတံ ပြံၚ်လုပ်အာ DKBA ဏံဂှ် သွက်ပရေၚ်ပၠန်ဂတးမ္ဂး ဒှ်ပရေၚ်ဆောံလေၚ်အာဇၞော်ဇၞော်မွဲရောၚ် ပ္ဍဲအကြာပွဳဗွိုၚ်ပၠန်ဂတးတံ ဟီုဂးမံၚ်အိုတ်ရ။
ကုအလဵုအသဳပၞာန်ပြံၚ်လဝ်ဗီုပြၚ် သဳကၠဳမံၚ်ပရေၚ်ၜိုဟ်လလမ် DKBA ဂှ် ပ္ဍဲအကြာပရေၚ်ပဋိပက္ခပၞာန် ဒေသဖလူ လပါ်သၠုၚ်ကျာဗြဝတဳဏံ ညံၚ်ကောန်ပၞာန် DKBA တံ ဟွံဂွံပါလုပ်အာဂှ် ပတိတ်လဝ်အမိၚ်တာဒၞာ ပ္ဍဲဂိတုဂျူလာၚ် ၂၉ တေံရ။
အပ္ဍဲတိဍာ်ညးတံထိၚ်ဒဝ်လဝ်ဂှ် DKBA ကေုာံ က္ဍိုပ်သ္ကိုပ်အဆံၚ်သၠုၚ် ၅ တၠတံ ဟိုတ်နူကဵုလဝ်အခေါၚ် ကၠောန်လဝ်ပရေၚ်လီသြန်အန်လာၚ် ဗွဲမဂၠိုၚ်နွံတုဲ စုတ်ပၠုပ်လဝ် ပ္ဍဲစရၚ်ဖျေံဒဏ် ပရေၚ်ကၟာတ်ဆိုအ်ရောၚ် ပ္ဍဲဂျူလာၚ် ၃၀ တေံ နူကဵုသမဂ္ဂယူရောပ် EU လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
Photo – Social Media