နေပျဳဒဝ်၊ ဂျူလာၚ် ၃၁
က္ဍိုပ်သ္ကိုပ်ပၞာန်သီအဝဵု ဥူမေန်အံၚ်လှိုၚ် ပၠတရဴလဝ် အလဵုအသဳပၞာန် ပြံၚ်လဝ်ဗီုပြၚ်တံ စိုပ်ဂိတုဂျူလာၚ် ၃၁ ဏံမ္ဂး ၜိုန်ရဟီုမံၚ် ကိုန်အစဳဇန်ပွိုၚ် ၁၀၀ တ္ၚဲ အာယုက်အိုတ်အာကီုလေဝ် သွဟ်ဍေံဂှ်တှ်ေ တၟေၚ်ၚ်တၟဟ်ဟ် ပြံၚ်လှာဲအာဟၟဲပုဟ် ညးဍုၚ်ကွာန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သွက်ဂွံထ္ၜးဗီုပြၚ် ပရေၚ်ညးဍုၚ်ကွာန်တံအုပ်ဓုပ်ဂးတုဲ ဗလးထောံတာလျိုၚ်ဂဥုပ်ဒပ် ဒှ်ကၠုၚ်သမ္မတ ဇကုဇကု ခါန်ကၞက်လဝ်ကေတ်တ် ဥူမေန်အံၚ်လှိုၚ်ဝွံ ဒက်ပ္တန်လဝ်အလဵုအသဳ ဆဂွံယၟုဒးဒုၚ်ရုဲစှ်တုဲ ပ္ဍဲဂိတုအေဗရာ ၂၀ တေံ လလောၚ်တြးလဝ် ကိုန်အစဳဇန်ပွိုၚ် ၁၀၀ တ္ၚဲရ။
အပ္ဍဲကိုန်အစဳဇန်ပွိုၚ် ၁၀၀ တ္ၚဲဂှ်မ္ဂး အခေါၚ်အရာမၞိဟ်ကဵု အခေါၚ်အရာဒဳမဝ်ကရေသဳညးဍုၚ်ကွာန်တံ သုန်ဂြာံအာလဝ် အပ္ဍဲကာလသီအဝဵု ၅ သၞာံပြၚ်တံကီု သီုကဵုအစဳဇန်ကလေၚ်လွဳလွတ် မကဵုအာဂုဏ်ဖဵု ပရေၚ်ပိုန်ဒြပ်မၞိဟ်တံဂှ်တှ်ေ ဟွံဂွံဆဵုဏီပုဟ်။
သမ္မတသီအဝဵု ထ္ၜးလဝ်အယောၚ်ညးဍုၚ်ကွာန် ဥူမေန်အံၚ်လှိုၚ် ဇၟာပ်တိုန်ကောံဓရီု ဟီုကြီုစမံၚ် ညံၚ်ရဴအလဵုအသဳဒးဒုၚ်ရုဲစှ်ကီု၊ အလဵုအသဳညးတံဂှ် လတူဂၠံၚ်တရဴဒဳမဝ်ကရေသဳဗော်ဇဳ ဂါံမံၚ်ဇိုၚ်ဗိုန်န်ဗတ်တ်ရောၚ် ဂလာန်ဗီုဏံသၟး ဟီုဂးမံၚ်လၟိုန်ရ။
မွဲလပါ်ပၠန် အပ္ဍဲကာလမွဲဒမြိပ်သီလဝ်အဝဵုဂှ် သွက်ဂွံချုက်လဝ်ညးဍုၚ်ကွာန်တံတုဲ ၝောံပိုဒ်ပရေၚ်ဍုၚ်ကွာန် ဖန်ဖက်ကၠောန်စကာလဝ် ညံၚ်ရဴလွဟ်တံဂှ်လေဝ် ဟွံဂွံတးပလီုဏီကီု၊ စပ်ကဵုအခေါၚ်ဗၠးၜးမဳဒဳယာပရိုၚ်၊ အခေါၚ်ဟီုပတိတ် ဗွဲမဗၠးၜးတံဂှ်လေဝ် ဒုၚ်တၚ်တာလျိုၚ်ပေၚ်ၚ်ရောၚ် ဟီုဂးလဝ်ဂှ် ဟွံဂွံဆဵုဏီပုဟ် ISP-Myanmar သ္ဂးရ။
အပ္ဍဲကိုန်အစဳဇန်ပွိုၚ် ၁၀၀ တ္ၚဲဂှ်တှ်ေ သွက်ညးဍုၚ်ကွာန်တံ တၟေၚ်ၚ်တၟဟ်ဟ် ပြံၚ်လှာဲအာလဝ်ဂှ် မုလေဝ်ဟွံဆဵုကေတ်ကီု၊ ဍာ်ဒကေဝ်ဒဳမဝ်ကရေသဳတံဂှ်လေဝ် နွံမံၚ်ဆၜိုတ် ဟီုတွံမံၚ်ဂလာန် သၟးနွံတုဲ ၜိုတ်တၠအဝဵုဆက်အုပ်ဓုပ်အာမံၚ်ဏီဂှ် သွက်ဂွံကလိဂွံအခေါၚ်အရာဒဳမဝ်ကရေသဳ ဍာံစၟတ်မာန်ဟွံသေၚ်ပုဟ် ညးသ္ၚဳဂၠိပ်တံ ထံက်ထ္ၜးလဝ်ရ။
ဟိုတ်နူပရေၚ်ဂီုကၠီုဟၟဲတုဲ ပ္ဍဲဒေသဇကုတံဂှ် အာကၠုၚ်ချဳဒရာၚ်ဗၠးဗၠးၜးၜးတုဲ ကၠောန်ကမၠောန်ဟွံဂွံကီု ဒးဆဵုဂဗမံၚ် ဒဒိုက်ကၞာပရေၚ်နာနာသာ်တုဲ အပ္ဍဲပွိုၚ် ၁၀၀ တ္ၚဲဏံဂှ် ညိလေဝ်ဟွံပြေပြံၚ်ပုဟ် ညးဒေသတွဵုရးမန်မွဲတၠ ဟီုလဝ်ရ။
“ကိုန်အစဳဇန်ပွိုၚ် ၁၀၀ တ္ၚဲဂှ်တှ်ေ မုလေဝ်တၟေၚ်ၚ်တၟဟ်ဟ်ဟၟဲပုဟ်။ တုဲပၠန် ပရေၚ် ဒုၚ်ရုဲစှ်သ္ကိုပ်အုပ်ဓုပ်ကွာန်/ အရာပ်တံဂှ်လေဝ် မုလေဝ်ဟၟဲပုဟ်။ ဗီုဏံဗီုဏံရ အာမံၚ်။ ပရေၚ်ဂီုကၠီု ညးဍုၚ်ကွာန်တံဂှ်လေဝ် ပဵုတုဲသ္ၚောဲအာ။ မုဍေံတံကဵုဟွံမာန်ပုဟ်၊ မုလေဝ်ဟၟဲပုဟ်။ ပ္ဍဲပွိုၚ် ၁၀၀ တ္ၚဲဏံဂှ် ဟွံပြေပြံၚ်ပုဟ်။ ယဝ်ရဆက်အာမံၚ်အတိုၚ်ဗီုဏံမ္ဂး ဆၜိုတ်ဂၠိုၚ်အာပၠန်ရနွံ။ ဗီုဏံမ္ဂး သွက်မၞိဟ်တံဂွံမံၚ် ပဵုတုဲပရေံတိုန်ရ။ တုဲပၠန် သွက်ဂွံကၠောန်ကမၠောန်ဂှ်လေဝ် ညးဒေသတံ ဗၠးဗၠးၜးၜး အာကၠုၚ်ဟွံဂွံပုဟ်။ ကၠအ်ရာဘာတှ်ေ ကၠအ်ရာဘာရ။ သြောံလေဝ် သြောံရ။ လၟုဟ်ၚုဟ်ကၠေၚ်စက် သွက်ဂွံဂွံကၠေၚ်လေဝ် မုလေဝ်ဟွံဂွံပုဟ်။ မၞိဟ်လ္ၚဵုကလိဂွံ၊ မၞိဟ်ဟွံဂွံဂှ် နွံဂၠိုၚ်ရ။ ၚုဟ်ကၠေၚ်ဂှ်လေဝ် တိုန်အာမံၚ် လောန်ဗွဲမလောန်ရ။ ဗီုလဵုလေဝ် ကၠောန်ဟွံဂွံပုဟ်။ ပ္ဍဲအဏံဂှ် ဒှ်မံၚ်ဒဒိုက်နာနာသာ်ရ” သာ်ဝွံ သ္ဂးရ။
ဥူမေန်အံၚ်လှိုၚ် ကေတ်လဝ်တာလျိုၚ်သမ္မတ အလဵုအသဳပၞာန် ပြံၚ်လဝ်ဗီုပြၚ်ဂှ် ဒက်ပ္တန်လဝ် ဌာနဝန်ဇၞော်အဆံၚ်ကၟိန်ဍုၚ် ၃၁ ဌာနကီုလေဝ် တၚ်ရန်တၟအ်ပါလုပ်မံၚ် အပ္ဍဲကိုန်အစဳဇန်ပွိုၚ် ၁၀၀ တ္ၚဲ တံမ္ဂး ဆေၚ်စပ်မံၚ်ကဵု ဌာနဝန်ဇၞော် ၅ ဌာနသၟးရောၚ် အတိုၚ်တၚ်နၚ်နူ ISP-Myanmar တံဂှ် ဂွံတီလဝ်ရ။
အပ္ဍဲကဵုတၚ်ရန်တၟအ်ဂှ်တှ်ေ နူဌာနဝန်ဇၞော်ပရေၚ်ဘဏ္ဍာအကံက်ခေါန်ဂှ် သွက်သၟာဗ္ၚတံ ပဵုတုဲသွက်ဂွံပတိတ်ကဵုအာ သြန်ဒမၠိ စရိတ်ပရေၚ်တဵုလွဳ ကပေါတ်စက်ဝါဗ္ၚတံကီု ပ္ဍဲသွာၚ်ထတ်ယုက်ဂှ် သွက်ထပ်ထပဵု ခါန်ကၞက်အာရိုဟ်ကၞက် ဇြဟတ်မၞိဟ်ကေုာံ သၠုၚ်ပတိုန်အဆံၚ် ဘာတန်ဗ္တောန်တံလေဝ် ပါလုပ်မံၚ်ရ။
အပ္ဍဲသွာၚ်ပရေၚ်ပညာဂှ်တှ်ေ တက္ကသိုလ်လ္ၚဵုတံဂှ် စၟတ်သမ္တီလဝ် ဗီုပြၚ်တက္ကသိုလ်စမ်ၜတ် ကဵုလဝ်ဇြဟတ်ကဵုပရေၚ်သုတေသန၊ ပ္ဍဲဘာသ္ဇိုၚ်ပရေၚ်ပညာတံဂှ် စုတ်ပၠုပ်လိက်ဇုတ်ဟရံၚ်တၟိ ကေုာံ ကိုန်အစဳဇန်စမ်ၜတ်ဆေၚ်စပ်ကဵု ပရေၚ်ဇၞော်မောဝ်ကွးဘာတံကဵု သၠုၚ်ပတိုန်အဆံၚ်ဘာတန် ရံၚ်စံၚ်ကောန်ၚာ်တံ မဒှ်ရ။
တုဲပၠန် သၠုၚ်ပတိုန်အဆံၚ်သၞေဟ်ၜၚ်ကျာ အနဳသခါန်၊ ကဵုလဝ်ဖျုန်ပရေၚ်သိုၚ်ခၞံ ရုၚ်ခြိုၚ်ကပေါတ်သၞေဟ်ၜၚ်၊ သၠုၚ်ပတိုန်အဆံၚ်ဂၠံၚ်ကွဳပၟတ်ကေုာံ ထပ်သၠဲပတိုန်ပရေၚ်ဆက်စၠောံ တိုၚ်မဝ်ဗာၚ်တၟိတံတုဲ သၠုၚ်ပတိုန်လဝ်အဆံၚ်တံလေဝ် ပါလုပ်မံၚ်ရ။
မွဲလပါ်ဂှ် သွက်ဒေသကွာန်ရး ဂွံကလိဂွံဍာ်သုၚ်ကေုာံ ဍာ်သွက်ဂွံတဵုလွဳတံဂှ် ညံၚ်ဂွံကၠောန်အာ နကဵုသၞောတ်သိုလာ စကာဇြဟတ်တ္ၚဲတံကီု၊ စပ်ကဵုလၟေၚ်ကမၠောန်ပရေၚ်ၜိုဟ်လလမ်တံတုဲ သွက်ဂွံသဳကၠဳအာဂှ် ကော်ဘိက်လဝ် ဂကောံလွဟ်ကောန်ဍုၚ်အရၚ်တံကီုလေဝ် သွက် PDF တံဂှ်တှ်ေ ဒးလုပ်ဖျေံပအပ်လွဟ်ရောၚ် သ္ဂးရ။
အပ္ဍဲကိုန်အစဳဇန်ဗွဲမဂၠိုၚ်ဂှ်တှ်ေ နွံသၟဝ်တဲပရေၚ်ပၠတရဴ ရဲၜးလဝ်ကယျိုၚ်ယူနဳဖံၚ်ပၞာန်တံတုဲ ညံၚ်ဂွံတုဲဒှ်အာ အပ္ဍဲပွိုၚ် ၁၀၀ တ္ၚဲဂှ် အကာဲအရာဟၟဲတုဲ ဒှ်မံၚ်ကိုန်အစဳဇန်အရာဒးကၠောန်အာ ကာလဍာ်ဇမၠိၚ်ရောၚ် ညးသ္ၚဳဂၠိပ်တံ ထံက်ထ္ၜးလဝ်ရ။
နူကဵုပရေၚ်အုပ်ဓုပ်ပၞာန် ပြံၚ်လှာဲအုပ်ဓုပ်အာ ဗီုပြၚ်ညံၚ်ရဴအလဵုအသဳညးဍုၚ်ကွာန်ဂှ်တှ်ေ မွဲတ္ၚဲတုဲမွဲတ္ၚဲ အကာဲအရာပရေံစှ်ေကၠုၚ်မံၚ်တုဲ မုပရေၚ်လေဝ်ဟွံအံၚ်ဇၞးပုဟ် ညးလ္ၚတ်ပရေၚ်ဍုၚ်ကွာန်မွဲတၠ သ္ၚဳဂၠိပ်လဝ်ရ။
“အပ္ဍဲကိုန်အစဳဇန်ပွိုၚ် ၁၀၀ တ္ၚဲဂှ်တှ်ေ ဒးကလိဂွံပရေၚ်ၜိုဟ်လလမ်ဏောၚ် ပရေၚ်ပိုန်ဒြပ် ဒးဇၞော်မောဝ်ဏောၚ် နာနာသာ်ရ။ ဆဂး ပွိုၚ် ၁၀၀ တ္ၚဲ နူပရေၚ်အုပ်ဓုပ်ပၞာန်ဂှ် ပြံၚ်လှာဲဗီုပြၚ် အလဵုအသဳညးဍုၚ်ကွာန် လပါ်ဏံ အကာဲအရာနွံမံၚ်။ ပရေၚ်အုပ်ဓုပ်ဂှ် မွဲအဆံၚ်တုဲမွဲအဆံၚ် မုဒှ်ကၠုၚ်ရောတှ်ေ ပဵုတုဲအကာဲအရာပရေံကၠုၚ်မံၚ်။ စဵုကဵုအခိၚ်လၟုဟ် ပိုဲတံကၠောန် ပရေၚ်ၜိုဟ်လလမ်လေဝ် ဟွံမာန် ၚုဟ်မးကပေါတ်တံလေဝ် ဗီုဂှ်ရ။ အပ္ဍဲကိုန်အစဳဇန်ပွိုၚ် ၁၀၀ တ္ၚဲညးတံဂှ် အဓိကတှ်ေ ၚုဟ်မးကပေါတ်ကဵု ကဏ္ဍတၞဟ်ဟ်တံ ဇၞော်မောဝ်တိုန်ဟီုဂှ် ၚုဟ်မးကပေါတ်တံလေဝ် သၠုၚ်တိုန်ကၠုၚ်မံၚ်တှ်ေ သဳသဳတုဲ ကိုန်အစဳဇန်ပွိုၚ် ၁၀၀ တ္ၚဲဏံဂှ် မုအံၚ်ဇၞးရောတှ်ေ မုလေဝ်ဟွံအံၚ်ဇၞးပုဟ်။ လၟုဟ် ညးစၞးစၠတ်ထဝ် တိုန်ကၠုၚ်နူပေါဲရုဲမာဲအလီတံ ညးတံဟီုကၠုၚ်ကေတ်တ်ရ။ ဟိုတ်ဂှ်ရ ကိုန်အစဳဇန်ပွိုၚ် ၁၀၀ တ္ၚဲဏံဂှ် ဟွံအံၚ်ဇၞးပုဟ်ဂှ် မၞိဟ်ဖအိုတ်တံ တီမံၚ်အိုတ်ယျ” သာ်ဝွံ သ္ဂးရ။
ဟိုတ်နူအဆက်ဖဵုဂုဏ် ဒပ်ပၞာန်သီလဝ်အဝဵုတုဲ ပ္ဍဲကဵုကဏ္ဍစုၚ်ပရေၚ်နာနာ ပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်ပညာ၊ ပရေၚ်ထတ်ယုက်၊ ပရေၚ်မၞိဟ်တံ စရာဲဒးယအ်စှ်ေအာဗွဲမလောန် နွံတုဲ ၜိုန်ရပြံၚ်လှာဲအယောၚ်အလာ ဗီုပြၚ်အလဵုအသဳကီုလေဝ် လၟုဟ်ဏံဍုၚ်ဂှ်တှ်ေ ကလေၚ်ယာတိုန်က္ဍိုပ် ဟွံမာန်ဏီပုဟ်။
လၟုဟ်ဏံ ပရေၚ်တာဒၞာကၟာတ်လဝ်ကပေါတ်ထပၠုပ်နၚ်တံ ကၠောန်ကၠုၚ်မံၚ်တုဲ ကပေါတ်လုပ်ကၠုၚ်နူပယျဵုတံဂှ်လေဝ် ရပ်သီကေတ်မံၚ် ပ္ဍဲဂိက်သၞေဟ်ကၚ်စၟဳစၟတ်တံမ္ဂး ဖဵုသွဟ်ဍေံဂှ်တှ်ေ ညးဍုၚ်ကွာန်တံရ ဒးဒုၚ်ဘဲဒဏ် ၚုဟ်မးကပေါတ်သၠုၚ်တိုန်အာ ဗွဲမသကာတ်မြဟ်လောန်ရ။
တုဲပၠန် ဟိုတ်နူပရေၚ်စဳရေၚ်အုပ်ဓုပ် အလဵုအသဳပၞာန်ဗၠေတ်ၚ်မံၚ်တုဲ ၚုဟ်မးကပေါတ်သၠုၚ်တိုန်မံၚ်တံဂှ် ထိၚ်ဒဝ်ဟွံမာန်ကီု၊ ပ္ဍဲဒၞာဲဒေသမွဲကဵုမွဲ အကာဲအရာပရေၚ်တိဍာ် ဟွံတုပ်မံၚ်တံဂှ် ဟွံကေၚ်လ္ၚတ်တုဲ ကဵုမံၚ်စၞောန်ပ္ညုၚ်သၠုၚ်ဇြဟတ်တုဲ ညံၚ်ဂွံပတိတ်ကပေါတ်ဂှ်လေဝ် ဟွံကိတ်ညဳမံၚ်ကဵု အကာဲအရာဗလးတိဍာံဍာံပုဟ် ညးဍုၚ်ကွာန်တံ ပါ်ပါဲမံၚ်ရ။
လတူ ပရေၚ်ၚုဟ်မးကပေါတ်သၠုၚ်တိုန်မံၚ်တံဂှ် နူအဆံၚ်သၟဝ်ဏံ ဟွံစှ်ေလ္ၚတ်စၟဳစၟတ်လဝ်ချိုတ်တ်ပၠိုတ်တ်တုဲ နူအဆံၚ်လတူတေံ ဆက်စဳရေၚ်မံၚ်ဗၠေတ်ဗၠေတ်မ္ဂး အကာဲအရာဏံ ပဵုတုဲပရေံအာမာန်ရောၚ် ညးဒေသတွဵုရးမန် မွဲတၠပၠန် ဟီုလဝ်ရ။
“လၟုဟ် ၚုဟ်ခၟာဲစာၚ်သၟးဟွံသေၚ်ပုဟ် တိုန်မံၚ်သီုဖအိုတ်ရ ဆၜိုတ်ခၟာဲစာၚ်မွဲ ဟွံသေၚ်ပုဟ်။ အရာအိုတ်သီုတိုန်မံၚ်။ ပ္ဍဲပိုဲဏံတှ်ေ မာတ်လဝ်ကပေါတ်ဍုၚ်သေံတံရ။ ဟိုတ်ဂှ်ရ ကပေါတ်ဍုၚ်သေံတံ ၚုဟ်တိုန်အာရ။ ဗီုဂှ်ဟွံသေၚ် နကဵုအကံက်ခေါန်လုပ်သၞောဝ် ကၠောန်အာဗွဲမစှ်ေသၞောတ်မ္ဂး ကပေါတ်ပၠုပ်ကီု ကပေါတ်ပတိတ်ကီု ယဝ်ရဟလေၚ်ညဳအာမ္ဂး ၚုဟ်မးကပေါတ်ဏံဂှ် ၜိုတ်သၞောတ်ထ္ၜတ်မွဲမွဲ ထိၚ်ဒဝ်အာမာန်ရောၚ် ထေၚ်ရ။ ယဝ်ရ ပရေၚ်စဳရေၚ်ဗၠေတ်မံၚ်တှ်ေ ဆက်တုဲ ပဵုတုဲ ပရေံအာမာန်ရ။ ပရေၚ်စဳရေၚ်ဒးအာမ္ဂး ထိၚ်အာၚုဟ်မးကပေါတ်မွဲမာန်ရောၚ်။ ဗီုဏံရ စဳရေၚ်မံၚ် အကာဲအရာ လတူတိလေဝ်ဟွံတီ။ အဆံၚ်သၟဝ်ဂှ်လေဝ် ဟွံလ္ၚတ်စၟဳစၟတ် ဗွဲမစှ်ေသၞောတ်တုဲ နူလတူတေံ ဆဟီုမံၚ်ဂလာန်ဂှ်သၟးတှ်ေ ဟွံပြေပြံၚ်ပုဟ်” သာ်ဝွံ သ္ဂးရ။
လၟုဟ်ဏံမ္ဂး အတိုၚ်နူသၟဝ်သ္ဇိုၚ်သၞောဝ်ဥပဒေ ၂၀၀၈ ဂှ် အလဵုအသဳဒုၚ်ယၟုရုဲစှ်လဝ်တုဲ စၠတ်ထဝ်တံမံက်တိုန်ကၠုၚ်ကီုလေဝ် ယန္တရာသၞောတ်တၠအဝဵုပြံၚ်လဝ်ဗီုပြၚ်တုဲ ချဳဒရာၚ်မံၚ်ဂှ်တှ်ေ ပၠန်ဂတးရပ်လွဟ်တံလေဝ် ဆက်တုဲချဳဒရာၚ်ဆုဲအာမံၚ်ဏီရောၚ်။
တုဲပၠန် တိဍာ်ဒေသ ဒပ်ပၞာန်ဒးဗလးလဝ်တဲတံ သွက်ဂွံကလေၚ်သီကေတ်မာန်ဂှ် စကာမံၚ်သၟတ်တံညံၚ်ရဴဂဒံၚ်မၞိဟ်တုဲ ထပက်မံၚ်ကရောၚ်ပၞာန်ကီု သီုကဵုကြဳမံၚ်ဗုမ် ဇၞော်ပတိုန်အသိၚ် ကၠောန်မံၚ်မ္ဂး ဍုၚ်ဏံဂှ် သွက်ဂွံပတဝ်အာက္ဍိုပ်ကုပရေၚ်ညိၚ်ဝပ်ဂှ် ဒှ်ဟွံမာန်ဏီပုဟ်။
မွဲလပါ်ပၠန် အလဵုအသဳပၞာန်ပြံၚ်လဝ်ဗီုပြၚ် ညးဍုၚ်ကွာန်ဂှ် ပါဲနူဍုၚ်မိတ်သဟာဲညးလ္ၚဵုတုဲ ပ္ဍဲအကြာပွဳဗွိုၚ်ဂၠးကဝ်တံဂှ် ပရေၚ်သ္ပစၟတ်သမ္တီလုပ်သၞောဝ် နကဵုပရေၚ်ဍုၚ်ကွာန်ဂှ်ဟွံကလိဂွံဏီတုဲ သွက်ဂွံကလေၚ်လုပ်စိုပ် ပ္ဍဲအကြာအာသဳယာန်ကဵု ကုလသမဂ္ဂတံဂှ် ဆက်တုဲသ္ၚောဲခြာမံၚ်ဏီရောၚ်။
ပရိုၚ် – သြၚ်လောန်တိုၚ်မ်
Photo – MOI