လံၚ်လုၚ်၊ အဝ်ဂတ် ၃
အပ္ဍဲရးတၞၚ်သဳ ပွိုၚ်ဍုၚ်လံၚ်လုၚ်ဂှ် ဒပ်ပၞာန်သီအဝဵု နကဵုဇြဟတ်ဗွဲမဂၠိုၚ် ထပက်မံၚ်ကရောၚ်ပၞာန်တုဲ ရပ်လဝ်ညးဒေသ ၂၀ တၠပြၚ် သ္ပလဝ်ဂဒံၚ်မၞိဟ်နွံမံၚ်ရဂှ် ဂကောံဒပ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စနူဂိတုဂျူလာၚ် ၂၈ တေံတုဲ ဒပ်ပၞာန်သီအဝဵု ၃ ကရောၚ်ပၞာန် ဇြဟတ်ၜိုတ် ၅၀၀ ၜိုတ်တံဂှ် ပတဝ်လဝ်ကဵု ကွာန်ဍုၚ်တြေံ၊ တံၚ်မေန်ပျံၚ်၊ မံၚ်မကာန်ကေုာံ ကွာန်သောန်တံၚ်မန်တုဲ ထပက်မံၚ်ကရောၚ်ပၞာန် မဒှ်ရ။
နူကဵုကရောၚ်ပၞာန်ဏံရပ်ကေတ်လဝ် ညးဒေသ ၂၀ တၠပြၚ်တံဂှ် သ္ပလဝ်ဂဒံၚ်မၞိဟ်ကီု၊ ပ္ဍဲကဵုကွာန်တံၚ်မေန်ပျံၚ်၊ ဍုၚ်တြေံကေုာံ ကွာန်ပိၚ်ယှံၚ်တံဂှ် သီုကဵုစံၚ်ပလီုလဝ်သ္ၚိ ၁၀ မ နွံကီုတုဲ ကပေါတ်သ္ၚိ နွံကဵုၚုဟ်မးတံဂှ်လေဝ် ကေတ်ဏာဖအိုတ်ရ။
ပရေၚ်ကမၠောန် ဒပ်ပၞာန်ဗမာတံဂှ်တှ်ေ ဒှ်မံၚ်အကာဲအရာဆၜိုတ်စံၚ်သ္ၚိ ရပ်မၞိဟ်တံသၟးရောၚ် ညးတာလျိုၚ်လလောၚ်ပရိုၚ် LLPDF ဂကောံစဵုဒၞာညးဍုၚ်ကွာန် ပွိုၚ်ဍုၚ်လံၚ်လုၚ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ညးဒေသရပ်လဝ်တံဂှ် ကော်ဏာကရောံ ကရောၚ်ပၞာန်မွဲစွံ ဟွံကလေၚ်ဗလးကဵုဏီတုဲ အခိၚ်ကရောၚ်ပၞာန်တံလုပ်ကၠုၚ်ဂှ် ဂြိပ်ပါဲတုဲ မၞိဟ်ကၠေံအာလဝ်လေဝ်နွံမံၚ်ကီုရောၚ် သ္ဂးရ။
ပ္ဍဲဂိတုဂျူလာၚ် ၂၈ တေံ သၟတ်ဂြိပ်ပါဲမံၚ်ဘဲပၞာန်မွဲတၠ မံၚ်ဗိုလ်ဖျူ နူကွာန်ဍုၚ်တြေံ အာယုက် ၁၆ သၞာံဂှ် ကရောၚ်ပၞာန် ထ္ၜးဟိုတ်ဂြိပ်တိတ်ဂှ်ရ ပန်ဂစိုတ်ကဵုသေနာတ်တုဲ ဇွဂှ်တှ်ေ ထောံကၠဟ်လဝ်အပ္ဍဲဂၠံၚ် အတိုၚ်ဏံရ။
အပ္ဍဲကဵုရးတၞၚ်သဳ ပွိုၚ်ဍုၚ်လံၚ်လုၚ် ဒပ်ပၞာန်သီအဝဵု နကဵုဇြဟတ်ဂၠိုၚ်ၚ် ဍိုက်ထပက်မံၚ်ကရောၚ်ပၞာန်တုဲ ညးဒေသ ၈၀၀၀ တၠပြၚ် နူကဵု ၁၀ ကွာန်ပြၚ်တံ ထောံဌာန်ဒၞာဲဝါဲတုဲဒးဂြိပ်ပါဲ အောပ်မံၚ်ဘဲပၞာန်တံရ။
ပရိုၚ် – သြၚ်လောန်တိုၚ်မ်
Photo – Social Media