နေပျဳဒဝ်၊ အဝ်ဂတ် ၃
သွက်ဂွံဒက်ပတန်အာ ရးနိဂီုဍုၚ်တၟိဂှ် ညံၚ်ဂွံဂွံအသိၚ်ကေတ်အခိၚ်ပွိုၚ် ၂ သၞာံ ကၠောန်အာပရေၚ်ဒက်ပတန်တုဲ နူကဵုအလဵုအသဳပၞာန်ပြံၚ်လဝ်ဗီုပြၚ် ကေတ်အခိၚ်ပွိုၚ် ၃ သၞာံတုဲ နကဵုအသိၚ်အလိုန်ဇၞော်ဇၞော် ကၠောန်ကဵုရောၚ် သမ္မတသီအဝဵု ထ္ၜးလဝ်အယောၚ်အလာညးဍုၚ်ကွာန် မေန်အံၚ်လှိုၚ် ဟီုကြီုစမံၚ် ပၠန်ရ။
အလုံညးဍုၚ်ကွာန်တံ နူကဏ္ဍစုၚ်စုၚ် ညံၚ်ဂွံပါလုပ်ရီုဗၚ်အာကဵု ကရောံညးတံမွဲစွံ ဗွဲမက္တိုၚ်ကၟိုဟ်ညိဂှ် ပ္ဍဲကောံဓရီုလၟေၚ်ဍာံ အလန်ဒုတိယ စၠတ်ထဝ်ကၟိန်ဍုၚ် ကၠောန်လဝ် ဂိတုဂျူလာၚ် ၃၁ တေံ အဟိန်သမ္မတဟီုမံၚ်ဂလာန် ကိုန်အစဳဇန်ပွိုၚ် ၁၀၀ တ္ၚဲဂှ် ထပ်ဗပေၚ်ဟီုဏာလဝ် မဒှ်ရ။
သွက်ဍုၚ်ဂွံၜိုဟ်လလမ် သွက်ရးနိဂီုဍုၚ် ဂွံဇၞော်မောဝ်ဖောအ်ဗြဳတိုန်အာမာန် တၚ်ရန်တၟအ်ကိစ္စဇၞော်ဇၞော် ၂ တၚ်ဂှ် နူကဵုအလဵုအသဳရပ်စပ်တုဲ အပ္ဍဲကဏ္ဍစုၚ်ကၠောန်မံၚ်နကဵုအသိၚ်အလိုန်ဇၞော်ဇၞော်ရောၚ် ဥူမေန်အံၚ်လှိုၚ် ဟီုရ။
ပရေၚ်တၚ်ကော်ဆောတံ အခက်အခုဲဒးဆဵုဂဗမံၚ်တံ ၜိုတ်လဵုဇၞော်မံၚ်ကီုလေဝ် ညးဍုၚ်ကွာန်တံကဵုအလဵုအသဳ ယဝ်ရရပ်တဲညဳညဳ ဂွံယှအ်လွဳပတိတ်ဇဲ လွဳပရာဂစာန်ကၠောန်အာမ္ဂး အခက်အခုဲတံဂှ် ပြံၚ်လှာဲဖန်ဗဒှ်အာ အခေါၚ်အရာတံမာန်ရောၚ် ညးပတှ်ေကေတ်လဝ်ရ။
တုဲပၠန် နူကဵုဒပ်ပၞာန်ညးတံ ပြံၚ်လဝ်ဗီုပြၚ်အလဵုအသဳဂှ် အတိုၚ်ပၟိက်ဆန္ဒ ညးဍုၚ်ကွာန်နွံနွံ ဒက်ပတန်အာ ရးနိဂီုဍုၚ် ကၟိန်ဍုၚ်ပံၚ်ကောံတၟိဒုၚ်သ္ဇိုၚ်ကဵု သၞောတ်ဒဳမဝ်ကရေသဳကဵုဖိတ်ဒရေဝ်ရောၚ်ဒှ်တုဲ ညံၚ်လညာတ် ဟွံဂွံသှ်ေၜက်လ္ဇုဲလ္ဇအာမံၚ် လက်ကရဴတေံဂှ်လေဝ် ဥူမေန်အံၚ်လှိုၚ် ဗတိုက်ဖအောဝ်လဝ်ကီုရ။
အပ္ဍဲကဵုအစဳဇန် ထပ်သၠဲပတိုန် ကိုန်အစဳဇန်ပွိုၚ် ၁၀၀ တ္ၚဲဂှ် သွက်ညးဍုၚ်ကွာန် အဆံၚ်သ္ဇိုၚ်သၟဝ်တံ ဂွံဒှ်ဂုဏ်ဖဵုအခေါၚ် သွက်ကလိဂွံမာန်ဂှ် ညိလေဝ်ဟွံမွဲပုဟ် ညးဍုၚ်ကွာန်မွဲတၠ ပါ်ပါဲလဝ်ရ။
“ကိုန်အစဳဇန်ပွိုၚ် ၁၀၀ တ္ၚဲဍေံဂှ် သီုကဵု အစဳဇန်မိက်ဂွံထပ်ထပဵုပတိုန်မံၚ်ဏီ။ ဟိုတ်ဍေံတှ်ေ သွက်ညးတံ ကလိဂွံလဝ်ဖဵု ခိုဟ်ဟ် ဗွဲမဂၠိုၚ်နွံမံၚ်လေဝ်။ သွက်ညးဍုၚ်ကွာန်တှ်ေ မုဖဵုလေဝ်ဟၟဲပုဟ်။ သွက်ဍုၚ်လေဝ် မုဂုဏ်ဖဵုဟၟဲပုဟ်။ ရးနိဂီုဍုၚ်တၟိဍေံဂှ် လံကၠုၚ်ဟဍၚ် မၞိဟ်တံပဵုတုဲဖေက်တိုန်ဟဍၚ်ရ။ ဟီုမံၚ်ဒက်ပတန်ရးနိဂီုဍုၚ်တၟိဂးတုဲ ရးနိဂီုဍုၚ်ဏံဂှ် ဒးၜိုဟ်လလမ်သာယာရာၚ်ဆာဲဏောၚ်။ သွက်ညးဍုၚ်ကွာန်အဆံၚ်သ္ဇိုၚ်သၟဝ်တံဂှ် အခေါၚ်ကလိဂွံဖဵုဟီုဂှ် အောန်အိုတ်ညိညိညည ဒးနွံထေက်ရ။ ၁၀၀ ဟွံဂွံကီုလေဝ် ၜိုတ် ၂၀ ဒးနွံထေက်ရ။ လၟုဟ်ဂှ် မုမုမွဲလေဝ် ဟၟဲပုဟ်” သာ်ဝွံ သ္ဂးရ။
အပ္ဍဲကိုန်အစဳဇန်ပွိုၚ် ၁၀၀ တ္ၚဲ လောန်အိုတ်ကၠုၚ်လဝ်ဏံ ဗီုပြၚ်ပရေၚ်မံၚ်စံၚ်မၞိဟ်တံဂှ် ပရေၚ်ဗၠးၜးဟၟဲ ပဵုတုဲကြေပ်ဂြတ်ကၠုၚ်တုဲ ပရေၚ်တံၚ်ရပ်ပဝ်တာ၊ ပရေၚ်ပကီုပရာတ်ဍဵုဍိုက်မၞိဟ်၊ ပရေၚ်ရပ်ကပေါတ် လုပ်ကၠုၚ်နူပယျဵု၊ ပရေၚ်ၚုဟ်မးကပေါတ် သၠုၚ်တိုန်တံဂှ် ဒးဒုၚ်စသိုၚ်မံၚ်ရောၚ် ညးဍုၚ်ကွာန်တံ ဟီုပတိတ်လဝ်အိုတ်ရ။
ဟိုတ်တမ်မူလ ၚုဟ်မးကပေါတ်ဂွံတိုန်မံၚ်တံဂှ်တှ်ေ အပ္ဍဲဏံ ၚုဟ်ကၠေၚ်စက်သၠုၚ်တိုန်ဂှ်ကီု၊ ပရေၚ်ကၠောန်ပတိတ်ကပေါတ်တံ အောန်မံၚ်၊ ဟိုတ်နူသြန် ပရေၚ်ကူသာန်ဗၞိက်ယအ်အာတုဲ သြန်ဖောဝ် ၚုဟ်မးသြန်ယအ်အာ က္တဵုဒှ်ကၠုၚ်တုဲ စရိတ်သြန်စကာ တံလေဝ် ဂၠိုၚ်တိုၚ်မံၚ်ရောၚ် ဥူမေန်အံၚ်လှိုၚ် ဟီုရ။
တုဲပၠန် မူဝါဒသြန်၊ မူဝါဒဘဏ္ဍာ၊ မူဝါဒကူသာန်ဗၞိက်၊ မူဝါဒ ဓလိုက် တမ်ရိုဟ်တံဂှ် ကလေၚ်သ္ၚဳဂၠိပ်လ္ၚတ်အာတုဲ သွက်ပရေၚ်ပိုန်ဒြပ် ဂွံဇၞော်မောဝ်ဖောအ်ဗြဳတိုန်အာဂှ် ဇၞော်ပတိုန်အသိၚ်တုဲ ကၠောန်အာရောၚ် ပ္ဍဲဂလာန်သမ္မတဂှ် ညးဟီုလဝ်ရ။
အပ္ဍဲပွိုၚ် ၁၀၀ တ္ၚဲဂှ်တှ်ေ စပ်ကဵုပရေၚ်ၜိုဟ်လလမ်၊ ပရေၚ်စဵုဒၞာ၊ ပရေၚ်ဂီုကၠီုကဵု အုပ်ဓလီုသၞောဝ်ဓရ်တံကီု၊ ပရေၚ်ဍုၚ်ကွာန်၊ ပရေၚ်တဵုလွဳ၊ ပရေၚ်လွဳလွတ်၊ ပရေၚ်ပိုန်ဒြပ်ကွတ်စက်၊ ပရေၚ်ယှအ်သုၚ်စောဲ ကၠေၚ်စက်၊ ပရေၚ်ဆက်စၠောံအာကၠုၚ်၊ ပရေၚ်ပလံၚ်ဗ္စိုပ် စတမ်ကိုန်အစဳဇန် ၁၀ တၚ်တံဏံဂှ် ထမံက်လဝ် ရုပ်ရဴ အံၚ်ၚ်ဇၞးဇၞးမာန်ကၠုၚ်လဝ်ရောၚ် သ္ဂးရ။
အပ္ဍဲကဵုပွိုၚ်၁၀၀ တ္ၚဲ အလဵုအသဳပၞာန်ပြံၚ်လဝ်ဗီုပြၚ် ကေတ်လဝ်တာလျိုၚ်ဏံဂှ် ဒှ်ကာလလုပ်ဝၚ် သွက်အနာဂတ် ရးနိဂီုဍုၚ် ဂွံစပ္တံဖျေံဏာလဝ် ပၞက်သေဝ်သ္ဇိုၚ် ဗိုန်ဗိုန်ဗတ်ဗတ်ရောၚ် ညးဟီုကြီုလဝ်ကီုလေဝ် ကိုန်အစဳဇန်ပွိုၚ် ၁၀၀ တ္ၚဲဏံဂှ် တင်အံၚ်ဇၞးဂွံလဝ် မုလေဝ်ဟၟဲပုဟ် ညးသ္ၚဳဂၠိပ်တံ ထံက်ထ္ၜးလဝ်ရ။
မွဲလပါ်ပၠန် ရးနိဂီုဍုၚ်ၜိုဟ်သြိုဟ်အာမှ ကၠောန်ပရေၚ်ဇၞော်မောဝ် သၠုၚ်ပတိုန်ပရေၚ်ပိုန်ဒြပ် ပရေၚ်မၞိဟ်ကောန်ဍုၚ်တံမာန်တုဲ ပရေၚ်လညာတ်တၞဟ်ခြာ ဟွံတုပ်သၟဟ်ဒးဆဵုဂဗမံၚ်တံဏံ ဂၠာဲအာသွဟ် နကဵုနဲကဲပရေၚ်ဍုၚ်ကွာန် ၜိုဟ်ဟ်သြိုဟ်ဟ်အိုတ်ညိဂှ် ဥူမေန်အံၚ်လှိုၚ် ထပ်ဗတိုက်ဖအောဝ်ဏာလဝ်ရောၚ်။
ပရေၚ်လုက်စုက်ကၠောံဍ ဆေၚ်စပ်ကဵုၜိုဟ်လလမ်ဂှ်တှ်ေ ဒုၚ်လဝ်သ္ဇိုၚ်ပရေၚ်သဳကၠဳဍုၚ်ကွာန် တုပ်သၟဟ်ဟွံသေၚ်တုဲ ပ္ဍဲဗလးတိဂှ် နဲကဲပၞာန်နာနာသာ် ကဵုမံၚ်ဇြဟတ်ဗီုပြၚ်တံရောၚ် ဒါရိုက်တာပရဝ်ဂရမ် ဖံၚ်ဒေယှေန်အခေါၚ်အရာမၞိဟ်ညးဍုၚ်မန် နာဲအဲမန် သ္ၚဳဂၠိပ်လဝ်ရ။
“နကဵုအဲဂှ်တှ်ေ နကဵုယၟု ပရေၚ်ညိၚ်ဝပ် ဟွံသေၚ်မ္ဂး ပရေၚ်ၚးတးသ္အးဇ္ၚးတိဍာ်တုဲ ပန်ဗတိုက်နူဗလးကျာတံ၊ ပန်လွဟ်ဇၞော်တံ၊ ထပက်ပၞာန်အကြာကွာန်တံတုဲ စံၚ်သ္ၚိတံ၊ ပရေၚ်ရပ်မၞိဟ်ဟၟဲကဵုပရေၚ်ဓဝ်ဍာံ အာတ်ဓရတ်သြန် ကေုာံ ပရေၚ်ရပ်သၟတ် ပကောံကေတ်ကောန်ပၞာန်အတေၚ်အဓမ္မတံဂှ် ဆက်တုဲက္တဵုဒှ်မာန် ဘဲအန္တရာဲတံသၠုၚ်မံၚ်ဖိုဟ်ရောၚ် ပိုဲတံသ္ၚဳဂၠိပ်ဂွံလဝ်ရ” သာ်ဝွံ သ္ဂးရ။
သွက်ဂွံဆဵုဂဗသဳကၠဳအာကဵု ဂကောံရပ်လွဟ်ကောန်ဍုၚ်အရၚ်တံသီုဖအိုတ်ဂှ် အလဵုအသဳကော်ဘိက်မံၚ်လၟိုန်တုဲ အပ္ဍဲကိုန်အစဳဇန်ပွိုၚ် ၁၀၀ တ္ၚဲဏံ ဆဵုဂဗသဳကၠဳလဝ်ကဵု ဂကောံလွဟ်ကောန်ဍုၚ်အရၚ် ၁၃ ဂကောံတံ မာန်ကၠုၚ်လဝ်ရောၚ် ဟီုလဴလဝ်ရ။
မွဲလပါ်ပၠန် ပ္ဍဲတ္ၚဲသမ္မတ ယဵုဒုၚ်လဝ်သစ္စာဂှ် ရးနိဂီုဍုၚ်ဗၟာဏံကလေၚ်ဖျေံလဝ်ဇိုၚ် လတူဂၠံၚ်တရဴဒဳမဝ်ကရေသဳတုဲ ပတဝ်အာက္ဍိုပ် သွက်အနာဂတ်ခိုဟ်ဆာဲတိုန်ရောၚ် ဥူမေန်အံၚ်လှိုၚ် ဟီုပတိတ်လဝ် ကီုလေဝ် နတဲဂှ်မ္ဂး ဍာ်ဒကေဝ်ဒဳမဝ်ကရေသဳတံဂှ် ဆက်တုဲ ဒးမာတ်ကဠက်လဝ်မတ် သီုဖအိုတ် မဒှ်ရ။
နူကဵုပၞာန်သီအဝဵု ပြံၚ်လဝ်ဗီုပြၚ်အလဵုအသဳပၞာန်တုဲ ဗွဲကြဴ ရဲချူပါ်ပါဲမံၚ် လတူသိုဲယှေဝ်မဳဒဳယာတံဂှ် နကဵုၝောံပိုဒ် ၅၀၊ ၅၂ သၞောဝ်ဗတိုက်ပလီု ပကီုပရာတ်ကေုာံ ၝောံပိုဒ် ၅၀၅ (က) ရာဇသာဒ်ဇၞော်တံဂှ် ကေတ်အရေဝ်ရပ်စောဲလဝ်အမှုနာနာသာ်တုဲ ဌာန်မဳဒဳယာပရိုၚ် ၆ ဂကောံတံဂှ်လေဝ် သီကၟာတ်ထောံလာၚ်ဇြေန် တံနွံရ။
မွဲလပါ်ပၠန် ဟိုတ်နူသၞောဝ်ယိုက်ဝန်ပၞာန်ဂးတုဲ သၟတ် ဒးဒုၚ်ပကောံဏာလဝ်နဲကဲနာနာသာ်တံ စိုပ်အာဗလးမုက်ပၞာန်တေံမ္ဂး စကာလဝ်ညံၚ်ရဴဂဒံၚ်မၞိဟ်တံတုဲ ဒပ်ပၞာန်ကြဳဗုမ်နူဗလးကျာတုဲ ကဵုမံၚ်အရီုဗၚ်ဂှ် ဂွံဆဵုရောၚ်။
ဟိုတ်နူကဵုအကာဲအရာတံဏံဒှ်မံၚ်တုဲ ပရေၚ်ဒက်ဗတန် ရးနိဂီုဍုၚ်တၟိအလဵုအသဳပၞာန်ဟီုမံၚ်ဂှ် သွက်ညးဍုၚ်ကွာန်တံ ပရေၚ်ဂွံဂွံဂုဏ်ဖဵုခိုဟ်ဟ်ဂှ် ကလိဂွံအခေါၚ်မာန်ဟွံသေၚ်တုဲ သွက်ဂကောံပၞာန် တံကဵု ကောန်ရဲတဝ်သွာ မိတ်သဟာဲဍေံတံ အဝဵုသွက်ဂွံတန်ကြန် ကေုာံ သွက်ဖဵုပုဂ္ဂလိက လမျီုသၞောတ်တၠအဝဵုပၞာန်ပရေံပရေံဍေံတံ ဏံဂှ် ဆက်တုဲဂၠိၚ်သ္ၚောဲမံၚ်ဏီရောၚ် ညးသ္ၚဳဂၠိပ်တံ ထံက်ထ္ၜးလဝ်ရ။
ပရိုၚ် – သြၚ်လောန်တိုၚ်မ်
Photo – Social Media