အပ္ဍဲတွဵုရးမန် ဒပ်ပၞာန်သီအဝဵု သီဂွံလဝ်ကပေါတ်မၞိဟ်ရပ်စပ်သုၚ်စောဲ နူကမၠောန်ကျာဖျတံဂှ် ကလေၚ်သွံစမံၚ် နကဵုၚုဟ်မးအောန်အောန်ရောၚ် တၠကမၠောန်ပိုန်ဒြပ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူတမ်သၞာံဏံတုဲ ပ္ဍဲကဵုတွဵုရးကရေၚ် ပွိုၚ်ဍုၚ်ဗြဝတဳ ဒၞာဲစမြိုၚ်ကျာဖျနွံမံၚ်ဒေသရွှေကုက္ကို ကေုာံ ဒေသ KK Park ကၠောန်မံၚ်ကမၠောန်ကျာဖျတံဂှ် ဒပ်ပၞာန်သီအဝဵုသရိုဟ်ပလီုထောအ်လဝ် မဒှ်ရ။
ကၠာဟွံသရိုဟ်ပလီုထောအ် ဒၞာဲစမြိုၚ်ကျာဖျတံဏီဂှ် ခုၚ်ဂဇအ်၊ ခုၚ်လး၊ စက်ဟဂံက်ကျာ၊ ကဠာဂံက် ကေုာံ ကပေါတ်ၚုဟ်မးနွံနွံတံဂှ် ဒပ်ပၞာန်သီအဝဵုသီကေတ်လဝ် သီုဖအိုတ်ရောၚ်။
ကပေါတ်မၞိဟ်တံရပ်စပ်စကာ သီဂွံဂှ်တှ်ေ ဒုၚ်သ္ဇိုၚ်ကဵုဂကူကပေါတ်တုဲ နကဵုဖျာဗွဝ် ခုတ်စွံကေတ်ၚုဟ်မး သြန်ကိုတ်ကဵုကၠံတုဲ ကလေၚ်သွံစမံၚ်ဂှ်တှ်ေ ပ္ဍဲတွဵုရးမန်ဂှ် ဒှ်ကၠုၚ်မံၚ်ဗီုပြၚ်ဗွဝ်ဖျာမွဲကီုရောၚ် တၠကမၠောန်ဟွံမိက်ထမံက်ယၟု ၂ တၠ ဟီုရ။
ဒပ်ပၞာန်သီအဝဵု အခိၚ်လုပ်ရပ်ကျာဖျတံ အဓိကသီကေတ်ဂှ်တှ်ေ စက် Star Link သုၚ်စောဲအေန်တာနိတ်၊ ကန်ပျူတာကေုာံ ဖုၚ်တံသၟး သီကေတ်ထောံရောၚ် ထမံက်ထ္ၜးလဝ်ပရိုၚ်တုဲ ကပေါတ်မၞိဟ်ရပ်စပ် တၞဟ်ဟ်တံဂှ်တှ်ေ ဟွံထမံက်ထ္ၜးလဝ်ပုဟ်။
သွံစကပေါတ်တုဲ ဂွံနၚ်သြန်တံဂှ်တှ်ေ နူကဵုညးတာလျိုၚ်ဒပ်ပၞာန်သီအဝဵုတံကီု သီုကဵုကောန်ပၞာန် အဆံၚ်ဆင့်တံကီု ကလေၚ်ပါ်ပရအ် ကေတ်မံၚ်အိုတ်ရ။
စပ်ကဵုသရိုဟ်ပလီုလဝ် ဒၞာဲစမြိုၚ်ကျာဖျတံဂှ်တှ်ေ တမ်ဒပ်နူသၟဝ်တဲ ဌာန်ဂအုပ်ပၞာန်ရးအဂၞဲ ပ္ဍဲဍုၚ်မတ်မလီုတံ အဓိကဒးကေတ်တာလျိုၚ်တုဲ ကၠောန်မံၚ်ရောၚ်။
နူကဵုအလဵုအသဳပၞာန်ပြံၚ်လဝ်ဗီုပြၚ်ဂှ်တှ်ေ အပ္ဍဲဒေသရွှေကုက္ကို စမြိုၚ်ဒၞာဲကၠောန်လဝ်ကမၠောန်ကျာဖျ ၇၇ မဂှ် သရိုဟ်ပလီုထောအ် ပေၚ်အာက္ဍိုပ်ကၠံယျရောၚ် နူကဵုလိက်ပရိုၚ် တြးဝါဒအလဵုအသဳတံ လလောၚ်တြးလဝ် ပ္ဍဲဂိတုဂျူလာၚ် ၂၇ တေံရ။
ပရိုၚ် – သြၚ်လောန်တိုၚ်မ်
Photo – Social Media