ကိဗ်၊ အဝ်ဂတ် ၃
ပ္ဍဲဂိတုဂျူလာၚ် ၃၁ လောန်ကၠုၚ်ဏံ ပ္ဍဲလဒေါဝ်ဍုၚ်ကိဗ်ဂှ် ကောန်ဍုၚ် ယူခရုၚ် လၟိဟ်ကဵုလ္ၚီုပြၚ်တံ ပကောံဇြဟတ်တုဲ ဒစဵုဒစးထ္ၜးမံၚ်ဆန္ဒ လတူပရေၚ် ဇဳလေန်သကဳ နုက်ပတိတ်ထောံလဝ် ဝန်ဇၞော်ပရေၚ်စဵုဒၞာ မဳခေလို ဖဳဒိုရပ် ဂှ်ရ။
အပ္ဍဲပေါဲပၞာန် က္တဵုဒှ်မံၚ်ကဵု ရတ်ယှာဏံ သွက်ဒပ်ပၞာန်ဂှ် ဟိုတ်နူ ဝန်ဇၞော် ဖဳဒိုရပ် ကၠောန်ဗဒှ်ကဵုလဝ် ပရေၚ်ဖန်ဗ္ဒျ်တၟိတၟိတၟေၚ်တၟဟ်နာနာသာ်တံနွံတုဲ ဂွံဒုၚ်လဝ်အထိုၚ်အသးညးဂမၠိုၚ်တံကီု၊ ဒှ်မံၚ် ပူဂဵုကလိဂွံလဝ်ဇြဟတ်ထံက်ပၚ် ဗွဲမခိုၚ်ဗိုန်မွဲတၠ မဒှ်ရ။
အပ္ဍဲကာလပေါဲပၞာန် နူဂိတုဂျာန်နဝါရဳတေံ ဖဳဒိုရပ် ကေတ်လဝ်တာလျိုၚ်ဝန်ဇၞော်တုဲ ပ္ဍဲကဝက်ဂိတုဂျူလာၚ်ဏံမ္ဂး ပ္ဍဲအရာပြံၚ်လှာဲတာလျိုၚ်အလဵုအသဳ ညးဍိုန်လျးတံဂှ် ဟွံထေၚ်ခယျလဝ်မွဲသာ် ဒးဒုၚ်ပတိတ်ထောံလဝ် နူကဵုတာလျိုၚ်မဒှ်ရ။
ကြဴနူဂှ် ကောန်ဍုၚ် ယူခရုၚ်တံ ပကောံဂွံဇြဟတ် ကရပ်ဇိုၚ်ရုၚ် သမ္မတတုဲ တးပါထောံဝန်ဇၞော်ဖဳဒိုရပ် သွက်ဂွံကဵုကေတ်အာ ဒၞာဲတာလျိုၚ်အလဵုအသဳတၞဟ်ဟ်ဂှ်ရ ညံၚ်ဂွံကလေၚ်ခါန်ကၞက်ကဵု ပ္ဍဲဒၞာဲတာလျိုၚ် ဝန်ဇၞော်ပရေၚ်စဵုဒၞာပၠန်ဂှ် အာတ်မိက်မံၚ်အိုတ်ရ။
အခိၚ်တေံဂှ်တှ်ေ ဟိုတ်နူဒှ်လဝ်ပဋိပက္ခ ဇၞော်ကဵုဇြဟတ်ကဵု ဂဥုပ်သ္ကိုပ်က္ဍိုက်ပ်ဒပ်ပၞာန် အိုလက်သာန်တာ သိုၚ်ယျာသကဳတုဲ ညးတေံ ဒးပါဲပတိတ်ထောံ နူကဵုတာလျိုၚ်ရောၚ် သမ္မတ ဇဳလေန်သကဳ ကိုပ်ကၠာတေံ ဟီုလဴလဝ်ရ။
ဆဂး သွက်ဂွံဗတိုက်ပလီု ပရေၚ်စလာဘ်ဗဇဴ အဂတိဒဂေတ်လီု ပ္ဍဲကဏ္ဍပရေၚ်စဵုဒၞာတံဂှ် ဝန်ဇၞော် ဖဳဒိုရပ် ဂစာန်မံၚ်တုဲ ဒးဒုၚ်ပတိတ်ထောံ နူကဵုတာလျိုၚ်ရောၚ် ပရေၚ်ဟီုဂးမံၚ်တံ ပြာကတ်မံက်တိတ်ကၠုၚ် ဗွဲမသၠဲလးရ။
ပ္ဍဲဂိတုဂျူလာၚ် ၃၁ ဂှ်တှ်ေ သွက်ဂွံဂစာန်ကလိဂွံ ပရေၚ်စွံအာရီု နူကဵုသမ္မတတုဲ ရဲဆန္ဒထ္ၜးတံ ဇက်တိုန်တတ်ကၠောံအာ ဒၞာဲလဒေါဝ်ဍုၚ်ကိဗ် နွံကဵုစရာဲဝၚ်တံဂှ်တုဲ လုပ်စိုပ်ကၠုၚ် ဒၞာဲကောန်တၟံဍုၚ်ဇၞော်မဟာ ခရက်ရှာတိုင်ရ။
သၞောတ်ပရေၚ်နဲကဲဒပ်ပၞာန် ကြဴနူခေတ်လောန် သဵုဗဳယိတ် ဝန်ဇၞော် ဖဳဒိုရပ် ပြံၚ်လှာဲကဵုလဝ်ဂှ် ညံၚ်ဂွံဂတာပ်ခေတ် တၟေၚ်တၟဟ် ယဝ်ဟွံကၠောန်ဗဒှ်လဝ်ကဵုမ္ဂး ဂွံပေါဲအံၚ်ဇၞးပၞာန်ကဵု ရတ်ယှာဏံဒှ်မာန်ဟာဂှ် ကောန်ဍုၚ် ယူခရုၚ် လ္ၚဵုတံ သၟာန်မံၚ်အိုတ်ရ။
ပွန်ဒၞာဲပရေၚ်ပၞာန် ချိၚ်စွံလဝ်ကဵုဓါတ်အစောံ ရတ်ယှာတံဝွံ နူကဵုဒပ်ယူခရုၚ်တံ ပန်ဗတိုက်ဖံက်စိုပ်အာ ဒၞာဲဇြိုဟ်ဇြိုဟ်အခိၚ်ဏံဂှ် ညးဒးဒုၚ်ပတိတ်ထောံတုဲ ပ္ဍဲမုက်ပၞာန်တေံလေဝ် အခိၚ်ယူခရုၚ် အစောန်သၠုၚ်တိုန်မံၚ်ဏံဂှ် ဒးဒုၚ်ပတိတ်ထောံ တာလျိုၚ်မဒှ်ရ။
သွက်ဂွံပြံၚ်လှာဲထောံ တၚ်သ္ဂုတ်သွာတ်ဂှ် လကျှ်န် ဇဳလေန်သကဳ မုမွဲလေဝ် ဟွံထ္ၜးလဝ်ဏီပုဟ်။ သွက်ဂွံယိုက်ဝန် ဝန်ဇၞော်ပရေၚ်စဵုဒၞာယာယဳဂှ် ညးတေံရုဲစှ်လဝ် ယေဗဟန်နဳ ခါမာရာ သ္ကိုပ်ညးဇၞော်ယာယဳ ဌာနပရေၚ်ဂီုကၠီု ရးနိဂီုဍုၚ်ရ။
အတိုၚ်ဥပဒေမ္ဂး တာလျိုၚ်ဝန်ဇၞော်ပရေၚ်စဵုဒၞာ ပ္ဍဲယူခရုၚ်ဏံဂှ် ဒှ်ရုၚ်ဌာနသွာၚ်ပရေၚ်ညးဍုၚ်ကွာန်မွဲ မဒှ်ရ။
ဝန်ဇၞော်ပရေၚ်စဵုဒၞာတြေံဂှ် ယဝ်ရကလေၚ်ခါန်ကၞက်ကဵု ပ္ဍဲဒၞာဲမူလမ္ဂး ပရေၚ်ဂလာန်ပတှ်ေကောန်ဍုၚ် ယူခရုၚ် လ္ၚဵုတံ ကလေၚ်ကလိဂွံမာန်ကီုလေဝ် သွက်ဂွံကလိဂွံ ဂလာန်ပတှ်ေအလုံမွဲဍုၚ်ဂှ်တှ်ေ ဟွံလောဲသွာပုဟ် ဒါရိုက်တာ အေန်သတဳကျုတ် မူဝါဒယူရောပ် နွံပ္ဍဲဍုၚ်ကိဗ် မက်တဳယဝ် မဳကက်သဳ ဟီုရ။
ပ္ဍဲတာလျိုၚ်ဝန်ဇၞော်ပရေၚ်စဵုဒၞာ ဖဳဒိုရပ် ညံၚ်ဂွံယိုက်ဝန် ၜိုတ်မွဲသၞာံတုဲ ဍာ်ဒကေဝ်ထေက်မံၚ်ကဵုတာလျိုၚ်ဏံဟာဟီုဂှ် ရံၚ်အာလတူအစောန်စရာဲညးတုဲမှ နကဵုဇဳလေန်သကဳ ထေက်ကဵုဒးသ္ဂုတ်သွာတ်ရောၚ် ရဲသ္ကိုပ်သ္ကဆန္ဒထ္ၜးတံ ဟီုလဝ်ရ။
Ref:Reuters