ရးနိဂီုဍုၚ်ဗင်ဂလာဒေအ်ဂှ် ဟိုတ်နူသၟုဟ်ဓါတ်သဘာဝ အပ္ဍဲဍုၚ်ညးတံအောန်စှ်ေကၠုၚ်တုဲ သွက်ဂွံကလေၚ်ပၠုပ်လမျီု ပရေၚ်ပံၚ်တောဲဓါတ်အစောမ်မာန် ရန်တၟအ်တုဲ နူကဵုဍုၚ်ဗၟာ ဒှ်ဍုၚ်သ္ၚိဇိုၚ်ဝုတ်ဒိုဟ်ဂှ် မိက်ဂွံပလံၚ်ပၠုပ်နၚ် သၟုဟ်ဓါတ်သဘာဝ နကဵုပၠံၚ်ပိုက်ရောၚ် ပတိုန်ပၠုပ်လဝ်ဂလာန်ရ။
ဝန်ဇၞော်ဓါတ်လလဳ၊ ဓါတ်အစောမ် ကေုာံ ရိုဟ်ကၞက်သယံဇာတဓါတ်သတ္တု ရးနိဂီုဍုၚ်ဗင်ဂလာဒေအ် အေတ်ဗေလ် ဟာသာန် မာမေါတ်ဂှ် ပ္ဍဲဂိတုအဝ်ဂတ် ၂ တေံ ပ္ဍဲရုၚ်ဌာနဝန်ဇၞော် အခိၚ်ဆဵုဂဗကဵု အမာတ်ကလုတ်ဗမာ ဥူကျဝ်သဵုမဵု ခါန်ကၞက်လဝ် နူကဵုအလဵုအသဳပၞာန်တုဲ ပတိုန်ထ္ၜးလဝ် ဂလာန်ဏံ မဒှ်ရ။
အတိုၚ်လိက်လလောၚ်တြး ဌာနဝန်ဇၞော်ဓါတ်အစောမ် ဗင်ဂလာဒေအ်မ္ဂး လပါ်ဗင်ဂလာဒေအ်တံဂှ် ကိုန်အစဳဇန်သိုၚ်ခၞံပၠံၚ်ပိုက်သၟုဟ်ဓါတ်သဘာဝ စနူဍုၚ်ဗၟာ စဵုကဵုစိုပ်သေတ်တဂံၚ် ပတိုန်လဝ်အစဳဇန်ကၠာတေံဂှ်လေဝ် မိက်ဂွံကလေၚ်ထမံက်အာရုပ်ရဴပၠန်ရောၚ် ဂွံတီရ။
အပ္ဍဲပေါဲဆဵုဂဗဏံ ပ္ဍဲဗင်ဂလာဒေအ်ဂှ် နွံမံၚ်ပၟိက် သၟုဟ်ဓါတ်သဘာဝ ဗွဲမဂၠိုၚ်တုဲ သွက်ဂွံကလိဂွံသၟုဟ်ဓါတ် နကဵုပၠံၚ်ပိုက် နူကဵုဍုၚ်ဗၟာဂှ် ဗွဲတၟေၚ်စိုတ်လုပ်စမံၚ်ဗွဲမလောန်ရောၚ် ဝန်ဇၞော် မာမောတ် ဟီုလဝ်ရ။
လတူပတိုန်လဝ်ဂလာန်ဏံဂှ် အမာတ်ကလုတ်ဗမာ ဥူကျဝ်သဵုမဵု ကလေၚ်ဟီုလဝ် နကဵုလစွံစိုတ်လပါ်ခိုဟ်တုဲ ပါဲနူပလံၚ်ဗ္စိုပ်နကဵုပၠံၚ်ပိုက်ဟွံက နကဵုဗီုပြၚ် LNG (ဍာ်သၟုဟ်ဓါတ်သဘာဝ) လေဝ် သွက်ဂွံပလံၚ်ပၠုပ်ကဵု ဗင်ဂလာဒေအ်မာန်ဂှ် အကြာၜါဍုၚ်တံ သွက်ဂွံသဳကၠဳအာ အခေါၚ်အရာနွံမံၚ်ရောၚ် ဟီုလဝ်ရ။
ညးတာလျိုၚ်သီုၜါလပါ်တံဏံ သွက်ဂွံဆက်ကၠောန်အာ ပရေၚ်ပံၚ်တောဲကဏ္ဍဓါတ်အစောမ်မာန်တုဲ ဝန်ဇၞော်ဓါတ်အစောမ်ၜါဍုၚ်တံ ညံၚ်ဂွံဆဵုဂဗမာန်ဂှ်လေဝ် သဳကၠဳလဝ်ကီုရ။
ဝန်ဇၞော်ဓါတ်အစောမ်ဍုၚ်ဗၟာ ညံၚ်ဂွံကၠုၚ်စိုပ် ရးနိဂီုဍုၚ်ဗင်ဂလာဒေအ်မာန်ဂှ် ဝန်ဇၞော်မာမေါတ် ကော်ဘိက်အာ ဗွဲမလုပ်သၞောဝ်ကီု၊ ယဝ်နွံပၟိက်မ္ဂး အလဵုဇကုညးလေဝ် သွက်ဂွံအာသဳကၠဳ ပ္ဍဲဍုၚ်ဗၟာ နွံမံၚ်ရောၚ် ဟီုရ။
ပြဟ်ဟ်ဏံမ္ဂး ပရေၚ်ပတိတ်သၟုဟ်ဓါတ်သဘာဝ အပ္ဍဲဍုၚ်ဗင်ဂလာဒေအ်ဂှ် ယအ်စှ်ေအာမံၚ်ဆက်က်တုဲ သွက်ဂွံဗပေၚ်ကဵု တၚ်နွံပၟိက် ရုၚ်စက်ပတိတ်ဓါတ်လလဳတံ၊ ကမၠောန်ကွတ်စက်တံ ကေုာံ ရဲသုၚ်စောဲပရေၚ်တၞဟ်တံဂှ်တှ်ေ အကာဲအရာ ဒးဗ္ဒးဗ္ဒာဲဒၟံၚ်လတူ ပရေၚ်ပလံၚ်ပၠုပ်နၚ် LNG နူဍုၚ်သအာၚ်တံ ဂၠိုၚ်မံၚ်ရောၚ်။
ဗၟာ-ဗင်ဂလာဒေအ် ၜါဍုၚ်တံဂှ် သွက်ဂွံဇၞော်သၠုၚ်ပတိုန်အာ ပရေၚ်ကူသာန်သွံရာန်ဍာ်ဇမၠိၚ် ကေုာံ ပရေၚ်ပံၚ်တောဲဓါတ်အစောမ်တံဟွံက ပါဲနူဂှ် ပရေၚ်သီုၜါလပါ်တံ ဂွံဒုၚ်ဂုဏ်ဖဵု ပ္ဍဲကဏ္ဍတၞဟ်ဟ်တံဂှ်လေဝ် သွက်ဂွံသဳကၠဳလဝ်အာ အကာဲအရာနွံမံၚ်ရောၚ်။
ကိစ္စဏံဂှ် နူကဵုကောံဓရီု ကမ္မတဳနဲကဲပညာပံၚ်တောဲ ဗင်ဂလာဒေအ်-ဗၟာတံ မွဲအဆံၚ်ဂှ် ဆက်တုဲ သ္ၚဳဂၠိပ်သဳကၠဳအာမာန်ရောၚ် အမာတ်ကလုတ်ဗမာ ဥူကျဝ်သဵုမဵု ကဵုလဝ်ကသပ်နွံရ။
Ref:thedailystar