မတ်မလီု၊ အဝ်ဂတ် ၄
အပ္ဍဲတွဵုရးမန် ဍုၚ်မတ်မလီု ဒၞာဲအရာပ်ဇၞောဝ်ဒဵုဂှ် ဂစိုတ်လဝ်သၟာလိၚ်ဒဳတက္ကသဳ ကွဳလိုန်ဓါတ်မွဲတၠတုဲ ပၠံၚ်ကေတ်ဏာလဝ် သီုကွဳလိုန်ဓါတ် မၞိဟ်ကလိလောန်လဝ်ဒုဟ် ၃ တၠတံဂှ် ရပ်ဂွံလဝ်ယျရောၚ် ညးကြပ်ကဵုဒပ်ဗၠာဲသၟိၚ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ညးကလိလောန်လဝ်ဒုဟ်ဂစိုတ် မၞိဟ် ၃ တၠဂှ်တှ်ေ တိုဝ်ချေတ်လေန် အာယုက် ၂၀ သၞာံ နူပွိုၚ်ဍုၚ်ကျံက်ကျဳ ရးဗဂေါ၊ ဖျိုဝ်ဝေကျဝ် ကေုာံ လယံၚ်ခ အာယုက် ၁၉ သၞာံ နူပွိုၚ်ဍုၚ်ဟေန်တာတ ကေုာံ ပွိုၚ်ဍုၚ် ကျာန်ခေန် ရးဧရာဝတဳတံ မဒှ်ရ။
အပ္ဍဲပွိုၚ်ဍုၚ်ဗြဝတဳ တွဵုရးကရေၚ်၊ ဍုၚ်ဇိုၚ်ကျာ် တွဵုရးမန်၊ ပွိုၚ်ဍုၚ်ဟေၚ်တာတ ရးဧရာဝတဳတံဂှ် ဗက်ရပ်ဂွံလဝ် ညးတံ ၃ တၠ ဂှ်ရောၚ် အတိုၚ်လိက်စၟတ်သမ္တီ ဗၠာဲသၟိၚ်တံဂှ် ဂွံတီရ။
အတိုၚ်လိက်စၟတ်သမ္တီဗၠာဲသၟိၚ်တံမ္ဂး ညးတံ ၃ တၠဏံ သွက်ဂွံအာ KTV နွံပၟိက်သြန်တုဲ ဂစိုတ်မၞိဟ် ပၠံၚ်ၜးလဝ် ကွဳလိုန်ဓါတ်ရဂှ် ဒုၚ်ဝန်လဝ် အိုတ်ရ။
မၞိဟ်ကလိလောန်ဒုဟ် ပၠံၚ်ၜးကွဳလိုန်ဓါတ် ဂစိုတ်မၞိဟ် ၃ တၠတံဂှ်တှ်ေ ဒှ်ရဲကၠောန်မံၚ်ကမၠောန် ပ္ဍဲဆေၚ်စသုၚ် အကြာဍုၚ်မတ်မလီုတံတုဲ ကွဳလိုန်ဓါတ်ပၠံၚ်ဏာလဝ်ဂှ်တှ်ေ သွံလဝ် ၁၄ ကိုတ် ၇ လက် (၁,၄၇၀,၀၀၀) ဒကေဝ်တုဲ ဂြိပ်ပါဲဓလေတ်မံၚ် မဒှ်ရ။
သၟာတက္ကသဳ ဒးဒုၚ်ဂစိုတ်လဝ်ဂှ်တှ်ေ မံၚ်ဒၟံၚ်ပ္ဍဲအရာပ်သဳရိမျာၚ် ဍုၚ်မတ်မလီု အာယုက် ၄၃ သၞာံ သၟာလိၚ်ဒဳ ကွဳလိုန်ဓါတ်လိၚ် ဥူအံၚ်ဟိၚ် မဒှ်ရ။
ပ္ဍဲဂိတုဂျူလာၚ် ၁ တေံ ၜိုတ်အခိၚ်ဗ္တံ ၉ နာဍဳဂှ် ဍေံတံလိၚ် သၟာတက္ကသဳ ဥူအံၚ်ဟိၚ် ဍိုက်အာကွဳလိုန်ဓါတ်တုဲ ဒၞာဲက္တဵုဒှ် ကလိလောန်လဝ်အမှုဂှ်ရ ပၠံၚ်ၜးဏာကွဳလိုန်ဓါတ်တုဲ ဂစိုတ်လဝ်မၞိဟ် ဒှ်ကၠုၚ်လဝ်ရဂှ် မၞိဟ်ကလိလောန်လဝ်ဒုဟ် ၃ တၠတံ ဒုၚ်လဝ်ဝန်ရောၚ် ဂွံတီလဝ် အတိုၚ်လိက်စၟတ်သမ္တီ ဗၠာဲသၟိၚ်တံရ ။
မၞိဟ်ကလိလောန်လဝ် ၃ တၠတံဂှ်တှ်ေ အတိုၚ်ရာဇသာဒ်ဇၞော် ၝောံပိုဒ် ၃၀၂ ပံက်လဝ်အမှုတုဲ ယဝ်ရ ကလိလောန်ဒုဟ်ဍာံဍာံ မံက်ကၠးမ္ဂး အောန်အိုတ် ဒဏ်ထံၚ်နူ၂၀ သၞာံ စဵုကဵုအမိၚ်ဂစိုတ် ဖျေံသ္ဂုတ်သွာတ်မာန်ရ။
ပရိုၚ် – သြၚ်လောန်တိုၚ်မ်
Photo – Social Media