မတ်မလီု၊ ဂိတုအဝ်ဂတ် ၄
အပ္ဍဲကဵုဒေသ ဒိုဟ်အဂၞဲဍုၚ်ဗၟာဂှ် အကြာကဝက်သၞာံဏံ ဒပ်ပၞာန်ဗမာ ကၠောန်လဝ် ပရေၚ်ဖံက်ပကဝ်အခေါၚ်အရာမၞိဟ် ပဵုတုဲပရေံကၠုၚ်မံၚ်တုဲ ညးဍုၚ်ကွာန်တံဒးဂြိပ်ပါဲဘဲပၞာန် ပဵုဂၠိုၚ်တိုန်မံၚ်ရောၚ် ဂကောံအခေါၚ်အရာမၞိဟ်ကရေၚ် KHRG ဟီုရ။
ပ္ဍဲလိက်ဒုၚ်စဳရေၚ် KHRG ပတိတ်လဝ် ဂိတုအဝ်ဂတ် ၃ နကဵုက္ဍိုပ် လိက် “ပရိုၚ်ဗီုတၞးရုပ် – ဒပ်ပၞာန်ဗမာၜက်ၜေတ်ကၠောန်လဝ် ပွမဖံက်ပကဝ်အခေါၚ်အရာမၞိဟ် ပ္ဍဲဒေသဒိုဟ်အဂၞဲဍုၚ်ဗၟာ” ဂှ် ထပ်ဗပေၚ် ဟီုစုတ်လဝ်ရ။
စနူသၞာံ ၂၀၂၆ ဂိတုဂျာန်နဝါရဳ စဵုကဵုဂိတုဂျောန်ဏံ နကဵုဗီုတၞးရုပ်တံထမံက်ထ္ၜးလဝ် ဒပ်ပၞာန်ဗမာၜက်ၜေတ်ကၠောန်လဝ် ပရေၚ်ဖံက်ပကဝ်အခေါၚ်အရာမၞိဟ် ပ္ဍဲကဵုဒေသဒိုဟ်အဂၞဲဍုၚ်ဗၟာဂှ် ကလိဂွံလဝ် ဗီုရုပ် သီုဖအိုတ် ၁၇၀၁ ဗီု ဒဒှ်ရ ပရေၚ်ဒးဒုၚ်ဇီုကပိုက်လဝ် အခေါၚ်အရာမၞိဟ်တံရောၚ် သ္ဂးရ။
ပ္ဍဲဗီုရုပ် ပရေၚ်ဒပ်ပၞာန်ဗမာ ဖံက်ပကဝ်လဝ်အခေါၚ်အရာမၞိဟ်မ္ဂး ပရေၚ်ဗတိုက်လဝ်ကဵုပၞာန်ကျာ၊ ပရေၚ်ပန်လွဟ်ဇၞော်၊ မါၚ်တပ်တိ၊ သၞောတ် ဆဵုတှ်ေပန်၊ ရပ်ကေတ်အတေၚ်အဓမ္မ ကေုာံ ပရေၚ်ဖံက်ပကဝ်အခေါၚ်အရာမၞိဟ်တၞဟ်ဟ်တံ ပါလုပ်မံၚ်ရောၚ် KHRG သ္ဂးရ။
အပ္ဍဲကဵုသၞာံ ၂၀၂၆ ဒပ်ပၞာန်သီအဝဵု ကၠောန်လဝ်ပေါဲရုဲမာဲ အလန်ဒုတိယကဵုတတိယ ဟွံဗဗွဲကဵုပရေၚ်ဒဳမဝ်ကရေဇြဳတုဲ စနူ ၂၀၂၆ ဂျာန်နဝါရဳ စဵုကဵုဂိတုဂျောန်ဂှ် ပရေၚ်ဒပ်ပၞာန်ဗမာ ဖံက်ပကဝ်အခေါၚ်အရာမၞိဟ်တံဂှ် ပဵုတုဲသကာတ်မြဟ်ပရေံကၠုၚ်မံၚ်ရောၚ် ပ္ဍဲလိက်လလောၚ်တြးဂှ် ထမံက်ထ္ၜးလဝ်ရ။
အတိုၚ်ပရေၚ်စၟတ်သမ္တီပရိုၚ် KHRG မ္ဂး ပ္ဍဲဒေသဒိုဟ်အဂၞဲဍုၚ်ဗၟာဂှ် ပရေၚ်ဗတိုက်ပၞာန်ကျာ၊ ပရေၚ်ဗတိုက်ကဵုဒရုၚ်ကေုာံ ပရေၚ်ပန်လွဟ်ဇၞော်တံ ပဵုဂၠိုၚ်ကၠုၚ်မံၚ်ရောၚ် ထမံက်ထ္ၜးလဝ်တုဲ ပွမဒးဝပ်၊ ချိုတ်၊ သ္ၚိဌာန် ကၠအ်ဝါဗ္ၚတဵုလွဳလဝ်တံကီု ဒၞာဲစမြိုၚ်ညးဍုၚ်ကွာန် ဒးဒုၚ်လီုလာ်အာ၊ ညးဍုၚ်ကွာန်တံ ဒးဂြိပ်ပါဲဘဲပၞာန်လေဝ် ပဵုတုဲဂၠိုၚ်တိုန်မံၚ်ရောၚ် သ္ဂးရ။
ဟိုတ်နူ ဒပ်ပၞာန်ဗမာပန်ပှော်ဗတိုက်လဝ်တုဲ စနူဂိတုဂျာန်နဝါရဳ စဵုကဵုဂိတုဂျောန်မ္ဂး ကောန်ၚာ် ၂၂ တၠ ချိုတ်အာ၊ ကောန်ၚာ် ဟွံအောန်နူကဵု ၂၅ တၠ ဒးလဝ်ဝပ်၊ သီုကဵုညးဗျုဗျု ၄၄ တၠ ချိုတ်အာတုဲ ၁၀၂ တၠ ဒးလဝ်ဝပ်ရောၚ် ပ္ဍဲလိက်လလောၚ်တြး ထမံက်ထ္ၜးလဝ်ရ။
တုဲပၠန် ဘာဗတောန်လိက် ၈ မ၊ ဘာလကျာ် ၁၀ မ၊ ဘာကျာ်ခရေတ်ယာန် ၅ မ ကေုာံ သ္ၚိဌာန်တၞဟ်ဟ် ဗွဲမဂၠိုၚ် လီုလာ်အာလဝ်နွံမံၚ်ရောၚ် KHRG သ္ဂးရ။
အပ္ဍဲသၞာံ ၂၀၂၆ ဂှ် ပရေၚ်ချဳဒရာၚ်ဒပ်ပၞာန်ဗမာတံကီု ကောန်ပၞာန်ဒပ်တိုက် လုပ်စိုပ်အာဒေသနာနာတံ ပဵုဂၠိုၚ်ကၠုၚ်တုဲ ကောန်ကွာန်ညးဒေသတံဂှ်တှ်ေ ဒးဒုၚ်ရပ်၊ ဒးဒုၚ်ဂစိုတ်၊ ဒးဒုၚ် ၜုၚ်တက်ပျဲပျာံ၊ ဒးဒုၚ်ရပ်ပဝ်တာ၊ ဒးဗက်ထ္ၜးဂၠံၚ်၊ ဒးဒုၚ်ရပ်ပကောံ ကောန်ပၞာန်အတေၚ်အဓမ္မ နနဲအဓ္ဓမ ကဵုမၞိဟ်တံဒးကၠေအ်အာတံလေဝ် ပဵုဂၠိုၚ်တိုန်မံၚ်ရောၚ် KHRG ထမံက်ထ္ၜးလဝ်ရ။
ပရေၚ်ဒပ်ပၞာန်ဗမာလောန်ၜက် ဖံက်ပကဝ်လဝ်အခေါၚ်အရာမၞိဟ်တံဏံဂှ် ညံၚ်ညးဍုၚ်ကွာန်တံ ဂွံဒှ်အာမံၚ် ဗဟက်စိုတ်လၟိုန်ကီု၊ ဟိုတ်နူဒးဂြိပ်ပါဲ ပြံၚ်မံၚ်ဒၞာဲတုဲ ပရေၚ်ဂီုကၠီုဟၟဲ၊ အရာပၟိက်ကိစ္စဇၞော် ညံၚ်ရဴပရေၚ်ထတ်ယုက်၊ ပရေၚ်ပညာကေုာံ ပရေၚ်ဂမျိုၚ်လမျီုတံဂှ် ဍစိုပ်အာဟွံမာန်တုဲ ဒးဆဵုဂဗဇီုကပိုက်မံၚ် ပရေၚ်အခက်အခုဲနာနာ သာ်နွံရောၚ် ဂကောံအခေါၚ်အရာမၞိဟ်ကရေၚ် KHRG လလောၚ်တြး လဝ်ရ။
ပရိုၚ် – သြၚ်လောန်တိုၚ်မ်
Photo – KHRG