ၜၚ်ကံက်၊ အဝ်ဂတ် ၅
အပ္ဍဲအခိၚ်ကောံဓရီု အာသဳယာန် (ASEAN) ကၠောန်ဗဒှ်လဝ် ပ္ဍဲဍုၚ်ဂျာကာတာ ရးနိဂီုအေန်ဒဝ်နဳယှာဂှ် သွက်ဂွံကလေၚ်လုက်စုက် ဆက်ဆောံအာကဵု လတူရးနိဂီုဍုၚ်ဗၟာအဆံၚ်ၚ်ဂှ် အခိၚ်စိုပ်မံၚ်ယျ သ္ကိုပ်ဝန်ဇၞော်သေံ အနုတေန် ချာန်ဝဳရာကူ ဟီုကၠုၚ်ရ။
ကြဴနူဆဵုဂဗကဵု ညးအုပ်ကာနာနာအာသဳယာန် ကံၚ်ကေန်ဟန်တုဲ သ္ကိုပ်ဝန်ဇၞော် အနုတေန် ဟီုလဴထမံက်ကၠုၚ်မူဝါဒဏံတုဲ ပ္ဍဲစၟတ်တ္ၚဲအဝ်ဂတ် ၆-၇ တံဂှ် ညးတေံသွက်ဂွံဆဵုဂဗကဵု ဂဥုပ်သ္ကိုပ်ပၞာန်ဇၞော်တြေံ မေန်အံၚ်လှိုၚ် ကေတ်လဝ်တာလျိုၚ်သမ္မတဗၟာ ပ္ဍဲကဵုရးနိဂီုဍုၚ်သေံဂှ်လေဝ် ဖန်ဇန်လဝ် နွံမံၚ်ရ။
အတိုၚ်ဂလာန်ဟီုသ္ကိုပ်ဝန်ဇၞော် အနုတေန်မ္ဂး တၚ်တုပ်စိုတ်ဘုံ ၅ တၚ် အာသဳယာန် ဆေၚ်စပ်ကဵုရးနိဂီုဍုၚ်ဗၟာဂှ် စဵုကဵုလၟုဟ် ဆက်နွံအာမံၚ် အတိုၚ်မူပၞောန်ပၠတရဴအဓိကဏီတုဲ၊ ဒေါအ်ပရေၚ်ပဒေါအ်ပကီုပရာတ်တံ၊ သွက်ဂွံပလံၚ်ဗ္စိုပ် အထံက်ပၚ်ပရေၚ်ဓရ်ဗ္စာရဏာမၞိဟ်တံ စတမ် တၚ်ရန်တၟအ်တံဂှ် ဆက်တုဲဒးထမံက်အာရုပ်ရဴရောၚ် သ္ဂးရ။
ဆဂး အကာဲအရာဍာံတံဂှ်လေဝ် ဒးစုတ်ပၠုပ်တော်ချပ်လဝ်တုဲ ဂၠံၚ်တရဴသဳကၠဳတံဂှ် လ္ပကၟာတ်လဝ် ထေက်ကဵုကလေၚ်လုက်စုက်ဆက်ဆောံကဵု နတဲစှ်ေစှ်ေရောၚ် သ္ကိုပ်ဝန်ဇၞော်သေံ ဟီုရ။
ဂၠံၚ်တရဴဂှ် ကယျောဝ်ဆုဲအာမံၚ်လပါ် ဍာံစၟတ်ဂှ်လေဝ် ညးပတှ်ေကေတ်လဝ်တုဲ၊ ဒဝ်အံၚ်သာန်သုကျဳဂှ် တုဲကၠုၚ်ဟွံလံဏံ ဆဵုဂဗလဝ်ကဵုညးစၞး ကမ္မတဳဇိုၚ်ခရက်ဂၠးကဝ် (ICRC) တုဲ ပရေၚ်ထတ်ယုက်ခိုဟ်မံၚ်ရောၚ် ပရိုၚ်တံဂှ်လေဝ် နဒဒှ်ဥပမာ ထပ်ဗပေၚ်ဟီုလဝ်ရ။
သ္ကိုပ်ဝန်ဇၞော်သေံဂှ် “ဣဏံဂှ်တှ်ေ ဒှ်နဲကဲ ရးနိဂီုဍုၚ်သေံ ဗတိုက်ဖအောဝ်ကၠုၚ်မံၚ်ဆက်က်လၟိုန်ရ” သာ်ဝွံလေဝ် ထပ်ဟီုလဴပၠန်ရ။
တုဲပၠန် မူဝါဒ ညံၚ်လ္ပလုပ်ပြံက် အပ္ဍဲပရေၚ်ကေၚ်ကာဍုၚ်ညးတၞဟ်သ္အာၚ် အာသဳယာန်ဂှ် ကိစ္စဇၞော်မံၚ်ဏီကီုလေဝ်၊ သွက်ဂွံထိၚ်ဒဝ်အာ ပရေၚ်ညဳသာသၟဟ်သၟန်အာသဳယာန်ဂှ် အရာနွံပၟိက်ပွမပြံၚ်လှာဲလောဲ ကေုာံ ပွမဗက်ကၠောန်နတဲတံလေဝ် ဒးနွံထေက်ရောၚ် သ္ဂးရ။
ဆဂး ညးသ္ၚဳဂၠိပ်ပရေၚ်ဍုၚ်ကွာန်လ္ၚဵုတံတှ်ေ ပရေၚ်အာသဳယာန် ကလေၚ်လုက်စုက်ဆက်ဆောံကဵု အလဵုအသဳပၞာန်ဗၟာဏံဂှ် သွက်အလဵုအသဳပၞာန်ဂွံကလိဂွံအာ ပရေၚ်သ္ပသမ္တီလုပ်သၞောဝ် ပ္ဍဲအဆံၚ်ဂၠးကဝ်ဂှ် နွံမံၚ်အန္တရာဲရောၚ် ကဵုလဝ်သတိအိုတ်ရ။
မွဲလပါ်ပၠန် ဝန်ဇၞော်ပရေၚ်ဍုၚ်သအာၚ် ဖိလေတ်ပိုၚ် မာရဳယာ ထရဳသာ လာဇာရဝ် ကီုလေဝ် သွက်ရးနိဂီုဍုၚ်ဗၟာ ဂွံကလေၚ်တိုန်စိုပ် ကောံဓရီုအဆံၚ်သၠုၚ်အာသဳယာန်မာန်ဂှ် “အခိၚ်သ္ၚောဲမံၚ်ဏီဖိုဟ်” ရောၚ် ပ္ဍဲဂိတုလောန်ကၠုၚ်တေံ ဟီုလဴလဝ်နွံရ။
အခိၚ်လၟုဟ် ပရေၚ်သ္ကိုပ်ဝန်ဇၞော်သေံ ဟီုမံၚ်တံဏံကဵု အစဳဇန်သွက်ဂွံဆဵုဂဗကဵု မေန်အံၚ်လှိုၚ်ဂှ် လတူပြသၞာပရေၚ်ဗၟာ မူဝါဒအာသဳယာန် ပြံၚ်လှာဲကၠုၚ်ဟာ၊ ဟွံသေၚ်မ္ဂး ဒှ်ပရေၚ်ဂစာန်ကလုတ်တမာန်တၞဟ်ခြာ ရးနိဂီုဍုၚ်သေံဟာဂှ် နကဵုဂၠးကဝ် မၚ်ဗက်ရံၚ်အာမံၚ် ကြပ်ပ်ရ။
Ref:Reuters
