အပ္ဍဲကဵုရးတၞၚ်သဳ ပွိုၚ်ဍုၚ်လံၚ်လုၚ် ကရောၚ်ပၞာန်ဒပ်ပၞာန်သီအဝဵုတံ ထပက်ကၠုၚ်ဂအုံကွာန်တၟအ်စိၚ်ဂှ် ၜိုတ်ဆဵုညာတ်ကွဳလိုန်ဓါတ် ညးဒေသတံအတိုၚ်မွဲဂၠံၚ် သီကေတ်ဏာၜိုတ် ၂၀ မရဂှ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုအဝ်ဂတ် ၃ အခိၚ်နူဂယးဂှ် ကရောၚ်ပၞာန်ဇြဟတ်ၜိုတ် ၁၂၀ တံ နူကဵုကွာန်မံၚ်မကာန်မွဲအဆံၚ် ထပက်လုပ်ကၠုၚ်ဂအုံကွာန်တၟအ်စိၚ်တုဲ ကွဳလိုန်ဓါတ် ဆဵုပ္ဍဲဂၠံၚ်တံဂှ် သီကေတ်ဏာဟွံမွဲကဵုဗဗွဲဓရ်ရောၚ်။
ကရောၚ်ပၞာန် ဒပ်ပၞာန်ဗမာဂှ် နူကွာန်မံၚ်မကာန်တတ်အာကွာန်တၟအ်စိၚ်၊ ကွာန်တဗအ်သိက်တံတုဲ အဟိန်လုပ်ကၠုၚ်ဂှ် ဆဵုညာတ်အာကွဳလိုန်ဓါတ်ညးဍုၚ်ကွာန်တံ ၜိုတ် ၂၀ မဂှ်တှ်ေ သီကေတ်ဏာ အတေၚ်အဓမ္မရောၚ် ညးဒေသတံ ဟီုရ။
အပ္ဍဲလ္တူဂၠံၚ်ကွာန်တဗအ်သိက်ဂှ် ဆဵုညးတြုံမွဲတၠတုဲ ကရောၚ်ပၞာန်အဟိန်ဗဒေါအ်ဂှ် ဟိုတ်နူကွဳလိုန်ဓါတ်ဟွံဒေါအ်ကဵုတုဲ ပန်လဝ်ကဵုသေနာတ်ဂှ် ဒးအာဝပ်ပ္ဍဲဇိုၚ်ဂှ်ရ လၟုဟ်ဒးတိုန်လွဳမံၚ် ပ္ဍဲရုၚ်ဂဥုဲထဝါဲရ။
တုဲပၠန် အဟိန်ကရောၚ်ပၞာန်ထပက်မံၚ်ဏံဂှ်တှ်ေ နူကွာန်မံၚ်မကာန်၊ တၟအ်စိၚ်၊ တဗအ်သိက်တံဂှ် ရပ်ဏာညးဍုၚ်ကွာန် ၁၀ တၠပြၚ် သ္ပလဝ်ဂဒံၚ်မၞိဟ်တုဲ ရဲကလေၚ်ဗၠးကၠုၚ်လေဝ်နွံ၊ ရဲဆက် ဒးဒုၚ်ရပ်ထိၚ်လဝ်တံလေဝ် နွံမံၚ်ဏီရောၚ် သ္ဂးရ။
အပ္ဍဲဂိတုအဝ်ဂတ် ၃ အခိၚ်သဝ်တ္ၚဲဂှ် ကရောၚ်ပၞာန်ကလေၚ်စိုပ်ကၠုၚ် ကွာန်မံၚ်မကာန်တုဲ ဖျေံလဝ်ဗဒပ် ပ္ဍဲဟဝ်တေဝ်တၞၚ်သဳ ဇိုၚ်သၞေဟ်ပြၚ်ၜဳ မံၚ်မကာန်ရ။
အပ္ဍဲဂိတုဂျူလာၚ် ၂၉ လောန်ကၠုၚ်ဏံလေဝ် ပ္ဍဲပွိုၚ်ဍုၚ်လံၚ်လုၚ် ကွာန်တၟအ်စိၚ်ဂှ် ကရောၚ်ပၞာန်ထပက်လဝ်နွံတုဲ လၟုဟ်ဏံဂှ်တှ်ေ ဒှ်အလန်ဒုတိယရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – CJ