အပ္ဍဲတွဵုရးကရေၚ် ပွိုၚ်ဍုၚ်ဗြဝတဳ လပါ်ဗမံက်ဒဵုဒေါန ပ္ဍဲပေါဲဗတိုက်ဒှ်လဝ်ဂှ် ကရောၚ်ပၞာန်ဒပ်ပၞာန်ဗၟာ ထပက်ကၠုၚ်ဇြဟတ်ဗွဲမဂၠိုၚ်တံ ကြပ်အိုတ်အာသီုဖအိုတ်ရောၚ် ဗော်သွးကောန်ဂကူကရေၚ် KNU ဗဟဵု လလောၚ်တြးထ္ၜးလဝ် သီုကဵုဗီုရုပ်စၟတ်သမ္တီလဝ်တံရ။
အပ္ဍဲဒၞာဲပယျဵုသေံ-ဗၟာ လပါ်ဗမံက်ဒဵုဒေါန တိဍာ်ဒးဆောံလဝ်တံဂှ် ညံၚ်ဂွံကလေၚ်ထိၚ်ဒဝ်မာန် ဒပ်ပၞာန်သီအဝဵု စကာဇြဟတ်ဇၞော်ကဵုဇြဟတ်တုဲ ထပက်မံၚ်ကရောၚ်ပၞာန် မဒှ်ရ။
ပ္ဍဲဂိတုအဝ်ဂတ် ၃ လောန်ကၠုၚ်ဏံ ကရောၚ်ပၞာန်ဒပ်ပၞာန်ဗမာ ဇြဟတ်ဗွဲမဂၠိုၚ်တံကဵု ဒပ်ပၞာန်ဗၠးၜးကောန်ဂကူကရေၚ် KNLA ဂကောံဒပ်ပံၚ်တောဲပၠန်ဂတးတံ အကြာၜါလပါ်ဒှ်လဝ်ပေါဲဗတိုက် ဗွဲမသကာတ်မြဟ်ရ။
အပ္ဍဲပေါဲဗတိုက်ဂှ်တှ်ေ လပါ်ဒပ်ပၞာန်သီအဝဵု တမ်ဒပ် ခမရ ၂၀၃ သၟဝ်တဲၝောံဒပ် ၂၂ သ္ကိုပ်ကရောၚ်ပၞာန် အဆံၚ်သ္ကိုပ်ဗိုလ်ကီု သီုကဵုမွဲကရောၚ်ပၞာန် ကြပ်အိုတ်အာသီုဖအိုတ်ရောၚ် KNU သ္ဂးရ။
အပ္ဍဲပေါဲဗတိုက်ၜါလပါ်ဏံဂှ် KNU သီဂွံလဝ်လွဟ်မကမ်ကဵုကပေါတ်ပၞာန်ဆက်စပ်နာနာတံတုဲ ဇွကောန်ပၞာန်ဗၟာတံသှ်ေၜက်ပြးဇးမံၚ် ပ္ဍဲကဵုမုက်ပၞာန်တေံလေဝ် လလောၚ်တြးထ္ၜးလဝ် ဗီုရုပ်စၟတ်သမ္တီတံရ။
ဒပ်ပၞာန်သီအဝဵုတံဂှ် စနူတမ်သၞာံဏံတုဲ သွက်ဂွံကလေၚ်သီကေတ် ဒၞာဲဗ္ဒိုပ်ဒပ်ပၞာန်ဒးဗလးလဝ်တဲတံဂှ် စကာကောန်ပၞာန်စှ်ေနူဘာယိုက်ဝန်ပၞာန်တံတုဲ နကဵုဇြဟတ်ဗွဲမဂၠိုၚ် ထပက်မံၚ်ကရောၚ်ပၞာန်ရောၚ်။
ပေါဲဗတိုက်လပါ်ဗမံက်ဒဵုဒေါန လံကၠုၚ်ပွိုၚ် ၈ ဂိတုပြၚ်ဏံဂှ် ကောန်ပၞာန်စှ်ေဘာယိုက်ဝန်ပၞာန်တံ ချိုတ်ကီုဒးဝပ်ကီုဂၠိုၚ်မံၚ်တုဲ ရဲလုပ်ဖျေံလွဟ်တံလေဝ် နွံမံၚ်အရိုဟ်တ္ၚဲရောၚ် အတိုၚ်ဂကောံဇြဟတ်ပၠန်ဂတးတံ လလောၚ်တြးလဝ်ဂှ် ဂွံတီရ။
အပ္ဍဲပေါဲဗတိုက်ဗမံက်ဒဵုဒေါနဂှ် ဒပ်ပၞာန်သီအဝဵု ဒးဝပ်ဂိဂၠိုၚ်မံၚ်တုဲ နူပၞာန်ကျာလေဝ် ဆက်တုဲကြဳဗုမ်ဗတိုက်မံၚ် ဗွဲမသကာတ်မြဟ်ကီုရ။
အပ္ဍဲဂိတုဂျူလာၚ် ၂၈ လောန်ကၠုၚ်ဏံလေဝ် လပါ်သၠုၚ်ကျာဗြဝတဳ ကုန်ကျာ်ပိပ္ၚံက်ဂှ် ဒးဒုၚ်ကြဳဗုမ်ဒပ်ပၞာန်ကျာတုဲ ကျာ်ဇၞော်ဂဇအ်ဘာ ပဝ်စဴအာသွဝ်ရဂှ် ဂွံတီကေတ် နူရိုဟ်ကၞက်ပရိုၚ်ဒေသတံရ။
ပရိုၚ် – သြၚ်လောန်တိုၚ်မ်
Photo – KNU
