အပ္ဍဲတွဵုရးမန် ခရိုၚ်သဓီု ဒပ်ပၞာန်သီအဝဵုကေုာံဒပ်ဗၠာဲသၟိၚ်တံ ထ္ၜးဟိုတ်ကဵု ပရေၚ်ဖံက်ပကဝ်အမိၚ်ဒေသန္တရဂးတုဲ ရပ်မံၚ်ညးဒေသတံအဆက်က်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲခရိုၚ်သဓီု ပွိုၚ်ဍုၚ်ပံၚ်၊ သဓီု၊ ၜဳကလေၚ်ကေုာံ ကျာ်ထဝ်တံဂှ် ပ္ဍဲလက်ထက်အလဵုအသဳပၞာန် ပြံၚ်လဝ်ဗီုပြၚ်ဏံလေဝ် ညးတြုံၜါတၠ ဍိုက်ကွဳလိုန်ဓါတ်မွဲစွံဟွံဂွံ၊ နူဗ္တံ ၁၂ နာဍဳ စဵုကဵုဂယး ၄ နာဍဳ အမိၚ်တာဒၞာ တိတ်မ္ၚးအခိၚ်ဗ္တံဟွံဂွံ အမိၚ်ဒေသန္တရတံဏံဂှ် ဆက်တုဲပတိတ်လဝ်ရောၚ်။
ထ္ၜးဟိုတ်ကဵုအမိၚ်ဒေသန္တရတုဲ ညးအာကၠုၚ်အပ္ဍဲဂၠံၚ်အခိၚ်ဗ္တံတံဂှ် ဒပ်ပၞာန်၊ ဒပ်ဗၠာဲသၟိၚ်ကေုာံ ဒပ်မၚ်ကွာန် နွံသၟဝ်တဲအလဵုအသဳပၞာန် ပြံၚ်လဝ်ဗီုပြၚ်တံဂှ် ရပ်မံၚ်ဆက်က်ကၠောန်မံၚ်ရောၚ်။
ထ္ၜးဟိုတ်ကဵုအမိၚ်ဒေသန္တရတံတုဲ ရပ်မံၚ်ဆက်က်နွံကီု၊ အပ္ဍဲဂှ်မ္ဂး သၟတ်အဝဲလုပ်အဝေါၚ်ယိုက်ဝန်ပၞာန်တံဂှ် ပတဝ်က္ဍိုပ် စွံလဝ်ပွန်ဂၠိုၚ်ရောၚ် ညးဒေသၜဳကလေၚ် မွဲတၠဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ကိုပ်ကၠာဂှ်တှ်ေ နကဵုဗီုပြၚ် ဍိုက်ကွဳလိုန်ဓါတ် ၂ တၠ ၃ တၠ ဟွံဂွံ ဖံက်ပကဝ်အမိၚ်ဒေသန္တရဂးတုဲ ရပ်မံၚ်ရ၊ လက်ကရဴဏံဂှ်တှ်ေ အခိၚ်ဗ္တံ ၁၀ နာဍဳ/ ၁၁ နာဍဳမ္ဂး စရပ်ယျ။ မၞိဟ်ဒးဒုၚ်ရပ်တံဂှ်လေဝ် ဟီုဖံက်ပကဝ်အမိၚ်ဒေသန္တရဂးတုဲ ရပ်တံၚ်ဏာဟဂှ်ရ” သာ်ဝွံ သ္ဂးရ။
ရဲဒးဒုၚ်ရပ်နကဵုအမိၚ်ဒေသန္တရတံဂှ် ယဝ်ရကြပ်ကဵုရဲဒပ်ပၞာန်မ္ဂး အာတ်ကေတ်သြန်ကလေၚ်ဗလးကဵုနွံတုဲ ရဲကဵုသြန်ဟွံမာန်တံဂှ်တှ်ေ ပကောံပလံၚ်ဏာ သွက်ဂွံယိုက်ဝန်ပၞာန်ရောၚ် ညးဆက်ဟီုရ။
ဒပ်ပၞာန်ကဵုဗၠာဲသၟိၚ်တံ စိုပ်အခိၚ်ဗ္တံမ္ဂး ဂေတ်ကၚ်ဗက်ရပ်မံၚ်ညးဒေသတံတုဲ အခိၚ်ဗ္တံဂှ်တှ်ေ ဟွံဂံၚ်တိတ်မ္ၚးဒးဒှ်မံၚ် နကဵုဒဝိၚ်အိုတ်စောန်ရောၚ် ညးဒေသဍုၚ်ပံၚ် မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဗ္တံ ၁၀ နာဍဳကဝက်/ ၁၁ နာဍဳမ္ဂး ဍေံတံဂေတ်ကၚ်ရ။ ဆဵုတှ်ေရပ်ရ။ ရပ်တုဲမ္ဂး လ္ၚဵုဂှ် ညိလဝ်ဟွံကဵုဆဵုပုဟ်။ လောန်ကၠုၚ်ဏံဂှ်တှ်ေ ၂၅ ကိုတ်ဟာ ၃၀ ကိုတ်ဟာဟွံတီပုဟ်၊ နုက်ကေတ်ကဵုသြန်တုဲမှ ဗၠးစဴကၠုၚ်ရ။ အပ္ဍဲဍုၚ်ဂှ် အခိၚ်ဗ္တံ ဟွံဂံၚ်တိတ်မ္ၚးကွေံကွေံပုဟ်” သာ်ဝွံ သ္ဂးရ။
မွဲလပါ်ဂှ်တှ်ေ ဒပ်ပၞာန်ကဵုဗၠာဲသၟိၚ်တံဂှ် ထ္ၜးဟိုတ်ကဵုပရေၚ်ဂီုကၠီုတုဲ စၟဳစၟတ်မံၚ်ဂိက်လုပ်တိတ်ဍုၚ်တံကီု၊ အပ္ဍဲဍုၚ် ဒၞာဲမၞိဟ်ဂၠိုၚ်ၚ်အာကၠုၚ်တံကီု ဒၞာဲဟွံထေၚ်ခယျတံလေဝ် မာတ်ဆိုအ်စၟဳစၟတ်မံၚ် မဒှ်ရ။
အပ္ဍဲအခိၚ်စၟဳစၟတ်မံၚ်ဏံဂှ် သၟတ်တံဟွံသၟးက ညးဒေသဟွံတီကၠိုဟ် ပရူပရာအမိၚ်ဒေသန္တရတံဂှ်လေဝ် ရပ်ကေတ်ဏာတုဲ ဓရတ်အာတ်သြန် ဍဵုဍိုက်မံၚ်ကီုရောၚ် ဂွံတီရ။
တုဲပၠန် လၟုဟ်ဒှ်မံၚ်အခိၚ်ဗြဲတုဲ ပ္ဍဲခရိုၚ်သဓီု ညးကၠုၚ်ဝေၚ်ဍာ်ဆၚ်၊ ကၠုၚ်ကြေဝ်ဝေၚ် ဍာ်စောဝ်၊ ဟွံတီလဝ်အမိၚ်ဒေသန္တရတံဂှ်လေဝ် ပတဝ်က္ဍိုပ်ရပ်မံၚ်ကီုရောၚ် ညးဒေသတံ ဟီုရ။
အပ္ဍဲခရိုၚ်သဓီုဝွံ ကြဴနူပၞာန်သီအဝဵုဂှ် ထ္ၜးဟိုတ်နာနာတုဲ ရပ်မံၚ်ညးဒေသတံသၟးဟွံက ကြဴနူ ပၠုပ်လမျီုသၞောဝ်ယိုက်ဝန်ပၞာန်ဂှ် ထ္ၜးဟိုတ်အမိၚ်ဒေသန္တရတုဲ ဗက်ရပ်မံၚ်ညးဒေသတံအဆက်က်တုဲ ပကောံမံၚ်ကောန်ပၞာန်တၟိတံ နွံမံၚ်ရောၚ်။
ပရိုၚ် – သြၚ်လောန်တိုၚ်မ်
Photo – CJ
