မတ်မလီု၊ နဝ်ဝေမ်ဗာ (၁)
ဟိုတ်နူပရေၚ်သီအဝဵုတုဲ ကမၠောန်အဇာဍောတ်၊ အဇာလဒေါဝ် (SME )မဒးဂိဒၟံၚ်တံဂှ် က္ဍိုပ်သ္ကိုပ်ပၞာန် ရီုဗၚ်အာကဵု ဍိုက်က်ပေၚ်ၚ်ရောၚ် ၜိုန်ရဟီုဂးလဝ်ကီုလေဝ် ပ္ဍဲဗလးတိဏံ ကမၠောန်ဗွဲမဂၠိုၚ် သ္ဂောံဆက်ဒတူလိုၚ်အာဂှ် သာခက်ခုဲကၠုၚ်ရောၚ် တၠကမၠောန် SME တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
က္ဍိုပ်သ္ကိုပ်ပၞာန်ဂှ် အပ္ဍဲအခိၚ်ကာလ ညးမကေတ်လဝ်အဝဵုဂှ် ဒဒှ်ရပရေၚ်ပိုန်ဒြပ်ကၟိန်ဍုၚ် တောတက်ကၠုၚ်ဂှ်ကီု၊ သွက်ကမၠောန် SME တံ ဂွံဖောအ်ဗြေဝ်ကၠုၚ်တံဂှ် ပ္တိတ်အာကဵု သြန်ဂၠေံရောၚ် ဟီုဂးလဝ်ကီုလေဝ် နတဲဏံ ဟွံဒှ်ကၠုၚ်ဂှ်ရ တၠကမၠောန်တံ ညံၚ်ဂွိုအ်ဒးကၟာတ်ကၠေံ ကလောန်ဂှ် ဒးရုန်ဂ္စါန်ဒၟံၚ် တၟာဂလှ်ေရ။
ကမၠောန် SME တံဝွံ ကြဴနူဒပ်ပၞာန်သီအဝဵုတုဲဂှ် ဟိုတ်နူကပေါတ်ဗၞိက်အပြောံတံ ၚုဟ်တိုန်ကီု၊ ၚုဟ်ဒဝ်ဠာ ဟွံညိၚ်ဝတ်ကီု၊ ၚုဟ်ကၠေၚ်စက် သၠုၚ်တိုန်ဒၟံၚ်ကီုတံဂှ်ရ သွက်ဂွံဆက်ကၠောန်ကမၠောန်တံဂှ် ဒးဂဗဒၟံၚ် အခက်အခုဲရ။
“အကာဲအရာ ပရေၚ်ပိုန်ဒြပ်ဂှ် ဟွံခိုဟ်ပုဟ်၊ တၟော်ကဵုကၠာတေံမ္ဂး ပရေၚ်သွံရာန်ဂှ် ၜိုတ်ပိဂအုံ မွဲဂအုံဂှ် ဟွံမွဲရပုဟ်၊ ပ္ဍဲဗလးတိဏံ ကမၠောန် SME တံဂှ် ခက်ခုဲဒၟံၚ်ဏောၚ်၊ ၚုဟ်ကပေါတ်တံ က္ဍၚ်ဒၟံၚ်ကွေံကွေံတုဲ ပရေၚ်သွံရာန်ဂှ်လေဝ် အောန်ကြဳဒၟံၚ်၊ သွံဟွံတိတ်ပုဟ်၊ မွဲလ္ပာ်ဂှ်လေဝ် ၚုဟ်ဖျာဂှ် ဗက်တိုန်ဂၠိုၚ်ၚ် ဟွံဂွံပုဟ်၊ ၜိုတ်သၟာကမၠောန်မၞုံဂှ်ရ ဒးထိၚ်လဝ်၊ မံၚ်ဒၟံၚ် ဆၜိုတ်ဗၞတ် ဂွံစပုၚ်ရ၊ ဟွံဒးကၟာတ်ထောံကမၠောန်ဂှ် ကုသိုဟ်ခိုဟ် ဒးဟီု၊ မၞိဟ်ပရေံ နူဇကုဂှ် နွံဒၟံၚ် ဘောနဘောနံၚ်” သာ်ဝွံ ဟီုတဴရ။
ကမၠောန် SME တံဝွံ ကံၚ်ဇြဳပၞာန် ဟိုတ်နူထိၚ်ဒက်လဝ် သြန်ဒဝ်ဠာဂှ်ရ ပ္ဍဲအရာရာန်ကေတ် ကပေါတ်ဗၞိက်အပြောံတံဂှ်လေဝ် ကဵုၚုဟ်အတိုၚ်ဗွဝ်ဖျာမ္ၚးတံဏံ မွဲဆမွဲတာန်တုဲ ဒးရာန်ဒၟံၚ်ဂှ်ကီု၊ ကြဴနူဒပ်ပၞာန်သီအဝဵုတုဲ သၟာကမၠောန်အပ္ဍဲကၟိန်ဍုၚ်တံ တိတ်ဍုၚ်မ္ၚးတုဲ ကၠောန်ကၠုၚ်ဒၟံၚ်ကမၠောန်အိုတ်ဂှ်ရ ဒးဆေၚ်ဒၟံၚ်မုက်ကဵု သီုကဵုပြသၞာ သၟာကမၠောန်အောန်တံရ။
သ္အာၚ်နူဂှ်ပၠန် ကမၠောန် SME တံဝွံ အပ္ဍဲကာလဒပ်ပၞာန်သီအဝဵုဂှ် ဟိုတ်နူပၟတ်ဓာတ်လလဳ ဟွံမှာန်တံတုဲလေဝ် ကမၠောန်ဂမၠိုၚ် သွက်ဂွံဆက်ဂေတ်ဂြိပ်ဂှ် အခက်အခုဲနွံကၠုၚ်ရောၚ် တၠကမၠောန်သတဳဇာပသဲ မွဲတၠ ဟီုရ။
“စိုပ်ကၠုၚ်ရာသဳတၟးဇးတုဲ ကလောန်တံဂှ် ဂၠိုၚ်ကၠုၚ်ကီုလေဝ် ကပေါတ်တံ ပိုတ်ဒၟံၚ်တုဲ ၜိုတ်ခယျလဝ်ဂှ် ဟွံဒှ်ကလောန်ပုဟ်၊ မုလေဝ် ဟွံတၟေၚ်ပုဟ်၊ သ္ပကဵု ကိစ္စပၟတ်ဏံ ဟွံမာန်တှ်ေ ကမၠောန် (SME) ဏံ ကြေပ်ဂြတ်တၟာဂလိုၚ်ဏောၚ်၊ ကမၠောန် SME ဂှ် ဒးသ္ပပဓာန်ဒၟံၚ် ကဵုပၟတ်ဓာတ်လလဳဏံတုဲမှ ဂွံကၠောန်ဒၟံၚ်၊ ပၟတ်ဏံသၟးရဂှ် ကဵုလၟေၚ်ၚ် ဟွံမာန်ဏီပုဟ်၊ ပၟတ်ဓာတ်လလဳ ဒှ်အာခိုဟ်ဟ်တှ်ေ ပြေပြံၚ်စညိညမာန်မံၚ်ဏီ၊ အခိၚ်လၟုဟ် ပၟတ်ဟွံကၠုၚ်တုဲ ဒဳဇြေဝ်တံလေဝ် ၚုဟ်ဟွံစှ်ေစအှ်ေဏီပုဟ်၊ ၚုဟ်ကၠေၚ်ဂှ်လေဝ် ဟွံစှ်ေ၊ ပၟတ်ဂှ်လေဝ် ဟွံမှာန်ပုဟ်ဟီုတှ်ေ ဗီုလဵုမှ ဟွံပြေပြံၚ်ပုဟ်၊ အဓိက သွက်သ္ဂောံဂွံပၟတ် လၟေၚ်ၚ်ဂှ်ကဵု ဖျေံကဵုၚုဟ်ကၠေၚ်စက်တံတုဲ ဇၟာပ်ပ်ဆေၚ်ဖျာ ညံၚ်ဂွံဒှ် ၚုဟ်ဓမ္မတာဂှ် မိက်ဂွံကဵုကၠောန်ရ” သာ်ဝွံ ညးဟီုရ။
ယဝ်ရ အကာဲအရာ စပ်ကဵုပရေၚ်ဍုၚ်ကွာန်တံ၊ မူဝါဒပရေၚ်ပိုန်ဒြပ် အပ္ဍဲကၟိန်ဍုၚ်တံ ဟွံညိၚ်ဝတ်မ္ဂး ပရေၚ်ပိုန်ဒြပ်တံ ခိုဟ်ကၠုၚ်ဟွံမာန်ဂှ်ရ နကဵုက္ဍိုပ်သ္ကိုပ်ပၞာန်ဂှ် ညံၚ်ဂွံကၠိုဟ်ကေတ် အကာဲအရာဗလးတိဏံ နကဵုမူဝါဒချိုတ်တ်ပၠိုတ်တ် ကၠောန်သ္ပတုဲ သွက်ဂွံကဵုအရီုဗၚ် မစိုပ်တရဴတံဂှ် တၠကမၠောန်အဇာဍောတ်၊ အဇာဒေါဝ်တံ စၟဳဒၟံၚ်အိုတ်ရ။
ဆ္ဂး အကာဲအရာလၟုဟ်ဝွံ ပရေၚ်ဓလိုက်တမ်ရိုဟ်ဍုၚ်သ္အာၚ်တံ သဝ်စှ်ေဒၟံၚ်တုဲ တမ်ရိုဟ်သ္ဂောံကၠောန်ပ္တိတ်ဗၞိက်တံ ၚုဟ်က္ဍၚ်ဒၟံၚ်ဂှ်ရ တၠကမၠောန်ပ္တိတ်ဗၞိက်တံဝွံ ဒးဆေၚ်ဒၟံၚ်မုက်ကဵု တၚ်ဝါတ်ဂါတ် ဇၞော်ကဵုဇြဟတ်ဖိုဟ်ရဂှ် တၠပညာပရေၚ်ပိုန်ဒြပ်မွဲတၠ ထံက်ထ္ၜးဟီုဂးလဝ်ရ။
အလုံကၟိန်ဍုၚ်မွဲဂှ် ကမၠောန် SME ဂၠိုၚ်ကဵုကိုဋ် နွံဒၟံၚ်ရ၊ ဆ္ဂး ကမၠောန် SME တံဝွံ ဟိုတ်နူဒပ်ပၞာန်သီအဝဵုတုဲ ကမၠောန်တံ ဆက်ဂွံဂေတ်ဂြိပ်ရဂှ် ဒးရုန်ဂ္စါန်ဒၟံၚ် တၟာလှ်ေဂှ်ကီု ကမၠောန်လ္ၚဵုတံမ္ဂး ကျဗြံဒၟံၚ်တုဲ ကၟာတ်သီကၠုၚ် ကမၠောန်တံအိုတ်ရ။
ပရိုၚ်−သြၚ်လောန်တိုၚ်(မ်)