ၜဳကလေၚ်၊ အဝ်ဂတ် ၆
အပ္ဍဲတွဵုရးမန် ပွိုၚ်ဍုၚ်ၜဳကလေၚ် ဒပ်ပၞာန်ကဵုဂကောံဒပ်မၚ်ကွာန်တံ ဗက်ရပ်မံၚ်ပဝ်တာယိုက်ဝန်ပၞာန် သီုကဵုကောန်ဇာတ်ကၟိန်သ္ၚိဌာန် ရဲဒပ်ဗၠာဲသၟိၚ်တံဟွံသှ်ေပုဟ်ဂှ် ညးဍုၚ်ကွာန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုအဝ်ဂတ် ၄ လောန်ကၠုၚ်ဏံ ဂကောံပံၚ်တောဲဒပ်ပၞာန်ကဵုဒပ်မၚ်ကွာန်တံ ဍိုက်အာကွဳစက် သုၚ်စောဲစကာပ္ဍဲသ္ၚိတံတုဲ အပ္ဍဲသ္ကုတ်ဂၠံၚ်ၜဳကလေၚ်-မုဟ်ဒဵုကဵုၜဳကလေၚ် အရာပ်လ္ၚဵုတံဂှ် ဗက်ရပ်မံၚ်ပဝ်တာ သၟတ်ဒေသတံရ။
အပ္ဍဲကဵုသၟတ် ဒးဒုၚ်ရပ်ပဝ်တာ ၇ တၠ တံဂှ်တှ်ေ မွဲတၠဂှ် ဒှ်မံၚ်ဒေံ အကြာပ်ဒပ်ဗၠာဲသၟိၚ် နူဗ္ဒိုပ်ဗၠာဲသၟိၚ်ၜဳကလေၚ်တုဲ ၜိုန်ရရဲကၟိန်သ္ၚိဌာန် ညးတံ အာတ်ဗက်သောင်ကလးကီုလေဝ် စဵုကဵုလၟုဟ်ဟွံဗလးကဵု ဏီပုဟ် သ္ဂးရ။
ရဲဒးဒုၚ်ရပ်လဝ်တံဂှ်တှ်ေ ဒှ်ဒေံ ရဲဒပ်ဗၠာဲသၟိၚ် နူအရာပ်ဗိုလ်တေဇ ဍုၚ်ၜဳကလေၚ်တုဲ သၟတ်နူကွာန်ပံက်တဝ်ကဵု ကွာန်မုဟ်ဒဵု ၆ တၠ၊ သီုဖအိုတ် ၇ တၠ ဒးဒုၚ်ရပ်ဏာရ။
သၟတ်ဒးဒုၚ်ရပ်ပဝ်တာ သွက်ယိုက်ဝန်ပၞာန်တံဏံ ပ္ဍဲအခိၚ်သဝ်တ္ၚဲဂှ်ဟေၚ် ပလံၚ်ဏာဘာပကောံကောန်ပၞာန် ဒၞာဲအရာပ်မုဟ်ပန် ဍုၚ်မတ်မလီုယျဂှ် ဂွံတီရ။
ဒပ်ပၞာန်သီအဝဵု ဟိုတ်နူနွံမံၚ်ပၟိက်ကောန်ပၞာန်တံတုဲ သွက်ဂွံတိုန်ဘာတန်ဗ္တောန်ယိုက်ဝန်ပၞာန်ဂှ် ကောန်ဇာတ်ကၟိန်သ္ၚိဌာန် ရဲဌာနဆေၚ်စပ်တံကီု ကောန်ဇာတ်သ္ၚိဌာန် ရဲဒပ်ဗၠာဲသၟိၚ်တံလေဝ်ဟွံသှ်ေ ဗက်ရပ်မံၚ် ပဝ်တာရောၚ်။
အတိုၚ်တၚ်နၚ်နူ ဌာန်ပရိုၚ်သြၚ်လောန်တိုၚ်မ်ပကောံလဝ်မ္ဂး သွက်တန်ဗ္တောန်ယိုက်ဝန်ပၞာန်ညးဍုၚ်ကွာန် လၟေၚ် ၂၇ ပံက်လဝ် ပ္ဍဲဂိတုအဝ်ဂတ် ၃ လောန်ကၠုၚ်ဏံဂှ် သၟတ်နူတွဵုရးမန် ၂၀၀ တၠပြၚ် ဒးဒုၚ်ပကောံလဝ် ကောန်ပၞာန်တုဲအာယျ။
ပရိုၚ် – သြၚ်လောန်တိုၚ်မ်
Photo – Social Media
