အပ္ဍဲသ္ကုတ်ဂၠံၚ်ကၟိန်ဍုၚ် ပွိုၚ်ဍုၚ်ဍာ်ဗု ဒှ်ဒၞာဲအဆက်ပယျဵု အကြာတွဵုရးမန်ကဵု ရးတၞၚ်သဳတံဂှ် ဒပ်ပၞာန်ဗမာ ထပက်မံၚ်ကရောၚ်ပၞာန်တုဲ အကာဲအရာၜါလပါ် ပေါဲဗတိုက်ကြံၚ်မ္ၚိုဟ်မံၚ်ကွေံကွေံရောၚ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ကရောၚ်ပၞာန်ဒပ်ပၞာန်သီအဝဵု ဇြဟတ်ၜိုတ် ၂၀၀ ပြၚ်ၚ်တံ စနူတမ်ဂိတုဂျူလာၚ်လောန်ကၠုၚ်ဏံတုဲ ပ္ဍဲကဵုသ္ကုတ်ဂၠံၚ်ကၟိန်ဍုၚ် ပွိုၚ်ဍုၚ်ဍာ်ဗု ကွာန်ဍာ်တူ၊ ကွာန်ရတ်တၟး ကေုာံ ကွာန်ကျံက်ဂတေန်တံဂှ် ထပက်မံၚ်ကရောၚ်ပၞာန် မဒှ်ရ။
နူကဵုကွာန်ကျံက်ဂတေန်ဂှ် ကရောၚ်ပၞာန်ရပ်ကော်ဏာ ညးဒေသ မၞိဟ်တြုံ ၅ တၠ မွဲစွံကဵုကရောၚ်ပၞာန်တုဲ စဵုကဵုတ္ၚဲဏံ ဟွံကလေၚ်ဗလးကဵုဏီပုဟ် သ္ဂးရ။
လၟုဟ်ဏံမ္ဂး ကရောၚ်ပၞာန်ဒပ်ပၞာန်ဏံ ပရးလဝ်ဒပ် အကြာပွဳဗွိုၚ်ကွာန်ဍာ်တူကဵု ကွာန်ရတ်တၟးတံနွံမံၚ်တုဲ အကာဲအရာပေါဲဗတိုက်ၜါလပါ် ဆက်တုဲကြံၚ်မ္ၚိုဟ်မံၚ် မဒှ်ရ။
ကရောၚ်ပၞာန်ဏံဝွံ တင်လဝ်ယၟု ပရေၚ်ၚးတးတိဍာ်ဂးတုဲ ထပက်မံၚ်ကရောၚ်ပၞာန်ကီု ယဝ်ရဆက်တိုန်ကၠုၚ်ဂတးမ္ဂး ပေါဲဗတိုက်အကြာၜါလပါ် ဇၞော်ကဵုဇြဟတ်က္တဵုဒှ်မာန်ရောၚ် ဂကောံဇြဟတ်ပၠန်ဂတးတံ ဟီုလဝ်ရ။
ဟိုတ်နူကရောၚ်ပၞာန်ထပက်ကၠုၚ်မံၚ်တုဲ ညးဒေသလ္ၚဵုတံ ဂွိၚ်ဖေက်ပေါဲဗတိုက်ဒှ်ဂှ်ရ ဒစးဒုၚ်ဂြိပ်ပါဲဒဴလဝ်ပၞာန် နွံမံၚ်ဂှ်ကီု၊ ဗွဲမဂၠိုၚ်ဂှ်တှ်ေ မၚ်ရံၚ်အာအကာဲအရာတံရောၚ် သ္ဂးရ။
အပ္ဍဲဂိတုဂျူလာၚ် ၂၂ လောန်ကၠုၚ်တေံလေဝ် ပ္ဍဲကွာန်ဍာ်တူ ပွိုၚ်ဍုၚ်ဍာ်ဗု ဂကောံကွဳစက်ဒပ်ပၞာန် ဇြဟတ်ကောန်ပၞာန် ၅၀ ကၠုၚ်လှာဲဒပ်ဂှ် ဒးဒုၚ်တံၚ်ခတိုဟ်ကဵုမါၚ်တုဲ သီုကဵုကဆံၚ်ဗိုလ်မွဲတၠ မပါလုပ် ၄ တၠ ချိုတ်အာလဝ်ရောၚ် ဂကောံလကိုဟ်ရေဝ် လလောၚ်တြးလဝ်နွံရ။
ပရိုၚ် – သြၚ်လောန်တိုၚ်မ်
